Read Achang YOBA 8 Bible Online

YOBA 8 - Achang bible

YOBA 8

¹Nvng hauh cho khanyhank jweh shoq taiq das? Nah dang gas lyeis than dvnghuot.

³Mangso ka lyi jus cho lhyi khanhamp eq malhyent; nyang gas jus yvlyis ma jus khyvlyis ma kuot.

⁴Nah lo jens gas Mangso yah tyi dah yaunos kuot las nyamoq kuot zis yah dvyhangteh nyang nyamoq lyis joeng.

⁵Nghuot laus eq nvng gvshih tauh los las Maukhung Jesphung Mangso lhyi shangphu aq.

⁶Nvng koptoq las shangkyei nghuot lyis, Mangso nvng lyis los pangh das, nvng lyis phauh shangh khyvlyis nah yhenbang lyis doms toeu dyei das.

⁷Thang pheh Mangso nvng lyis dyei das zis yah byi lyis nvng chithyuk dah yohkhuiq cho dvnganh gas cha ma nghuot.

⁸Gohlhain dius cauh dah joeui lhyi dvsoq xo lha, yah phauh thyeih moq xuq dah jyoeng cho lhyi nghamh yoeuh aq.

⁹Yah kang ka lyung las yang cha ma seq; nyeisjvng thoq mas, yah buisnyeis gas siyet lai loh teh dvnghuot.

¹⁰Nghuot laus eq gohlhain dah dius cauh joeui bos bang lyis jyauh nhang aq; nyamoq cha taiq chah zis gyo geh.

¹¹Jeis ma joq yvmas jvmbu ma yoh yuk, hauh zis thomhbop ma joq yvmas khanhamp eq ma nyvng.

¹²Jeis kanh loh lyis hauh zis shih nyhauh loh, hauh zis thyet yhung das nyhenshang nyo ngis shih.

¹³Mangso ma bos bang gas hauh jvmbu teh nghuot. Mangso ma bos dah nghamhloms cho ka dyuk loh das.

¹⁴Nyamoq loms zis gas janghnyholvkhyank yhen dah khying teh lvnyap dyet tyamp das.

¹⁵Nyamoq janghnyholvkhyank yhen lhyi nges lyis vyoh kham das lah? Nyamoq hau khying lhyi lang lyis vyoh goeng joq das lah?

¹⁶Ma gis bang gas buis tso yvmas dah mhanh teh yuk los. Hauh dvzains masyah dvkhyam gonh yuk nyenh loh teh nghuot.

¹⁷Hauh vnyet gas lukzungs mas chent las, hauh luklom khanghmuh lyis lang toh.

¹⁸Nghuot laus eq hauh yvlyis nuot tyamp las hauh zis houmha nghuot khoq zis hank khanhamp eq ma seq.

¹⁹Nghuot goeus, hau dvnganh gas ma gis bang yoh dah gaus cho nghuot. Gvshih nyamoq joqyos lyis gohyhamh bang los yoeus toh.

²⁰Nghuot laus eq Mangso ka lomluk soeu lhyi khanhamp eq ma tyamp das, nghuot ya ma gis zis kuot bang lyis gas ma pangh.

²¹Nyang nvng lyis doms yis las kaiq nhang das.

²²Nghuot laus eq nvng lyis hoeng bang lyis nyang xoqphuh cho she los dyei das; lhung bang dah yhen ka dyoq dyuk das.