Read Achang YOBA 9 Bible Online

YOBA 9 - Achang bible

YOBA 9

¹Nghuot goeus, ngos hau dvnganh xauhgyo ku: Nghuot laus eq cangsoeu dius gas Mangso yah tyi dah soe mha khasoeh yoh ung das lah?

³Dvyuk yuk nyang yah khasoeh taiq khyank goh das? Nyang gas hank khanhamp eq ma yoh toeuh dah dang dvkhyoengh yoh nyei.

⁴Mangso ka joeui bos, yomsoq bos las nyang lyis tyi lha hank ma yoh yap.

⁵Nyang gas boms lyis hank ma soh kat xwih tyamp. Nyang nhaiqyo zis yah hauh yvlyis mhont tyamp.

⁶Nyang gas maunyeis dwis nhang lha nyeisjvng lyis nhont. Nyang gas nyeisjvng lyis thuk toh dah zains lyis tsain nhont.

⁷Nyang buis ma canh das xiklyis yoh zwi toh. Nyenh lyis kyi ma bvng das xiklyis eq gos toh.

⁸Mangso maukhung lhyi lhywa toh, nghuot ya thomh jeisphauq thoq mas yomsoq bos.

⁹Mangso ka Woms kyi, Shohkhat kyi, Kyijyon, yahge mautyi shot kyijyon jens lyis maukhung mha lhangh toh.

¹⁰Nyang kuot dah muh zains jens, ma thank lo dah nyah yomsoq muh jens lyis yang ma yoh thoq seqgyo.

¹¹Mangso lai loh laus eq ngos nyang lyis ma yoh nyvng.

¹²Nyang o zis yoeus loh laus eq hank eq nyang lyis ma yoh tomp toh; hank eq nyang lyis, Nvng cha kuot nyeis, ge ma womh nyei.

¹³Mangso ka nyah nhaiqyo zis ma bi; nyang yah loqyom tyonh goh dah thomh mvnjung lyis thungh thyi tyamp.

¹⁴Housoeh las ngos Mangso lhyi phuk taiq das dang khasoeh yoh xo nyvng das lah?

¹⁵Ngos yobos ma bos laus eq ngos yoh kuot zis gas ngos lyis soetuon soeu Mangso jyank masyah nhaiqnyen cho dvyoh dung.

¹⁶Ngos nyang lyis lui las nyang toeuh lyis yangh, nyang ngah thwe lhyi gyo dyei oen ma loms shih.

¹⁷Ngos chah soe ma bos yvmas nyang lyeisjyang nhang lha ngos lyis batthyi dvmtap.

¹⁸Ngos lyis daus ma bi nhang, ngah kang dwis cho mha khoh zis yah dyingh nhang.

¹⁹Yombos cho mha oen lhyi, Mangso ngah thoq lyis yombos; lyi jus cho mha oen lhyi nyang lyis[3] hank shwih los das?

²⁰Ngos yobos ma bos lomluk, nghuot laus eq ngah dang gas yobos bos teh nghuot. Ngos taiq ya taiq zis dvnganh gas ngos lyis dang thang thyet teh nghuot.

²¹Ngos yobos ma bos laus eq, ngah xiklyis cha ma nghamh, ngos kang ma mes dwis nyeis lo. Yobos bos laus, ma bos laus cha nghuot laus eq Mangso ka yang lyis mhont das.

²³Yobos ma bos soeu nyetlos nyettant shei lhyi Mangso yis.

²⁴Mangso ka lhung bang lyis mungkvn dyei; soetuon bang dvnganh lyis nyoqjet nhang. Hauh zis Mangso ma kuot lyis hank kuot?

²⁵Ngah buisnyeis gas wuih khyank goh lai, dvkoeuq eq ma gis.

²⁶Ngah kang ka nyap thank lhyik teh lai loh, shoh dyvm dvng dah zonsmuh teh nyap.

²⁷Ngos nos zis tohnyhik shoq kuot laus eq hauh zis ngos lyis los doms thungh nhont. Housoeh Mangso ngos lyis yobos bos ge zwi toh zis ngos seq.

²⁹Housoeh ngos yobos bos ge zwi toh goeus ya ngos chamus loeutyonh lo das?

³⁰Ngah yaunos lyis chah sapya yah ma yoh cheih tyamp.

³¹Mangso ngos lyis ma lhoq dwang mas doeuh kat las, ngah dyimis yangh ngos lyis xoq das.

³²Mangso ka dius nghuot ya ngos nyang lyis yoh phuk taiq; ngamoq soetuon jang mas loh las ngamoq dyoqgoh cho lhyi yoh thyet.

³³Nghuot laus eq ngamoq jo mas los las Mangso yahge ngos lyis soetuon dyei das zis hank ma bos.

³⁴Mangso eh, ngos lyis joeng cho no lo aq! Nah gyukphoh zis yoeus tyamp dyei aq.

³⁵Ngos, ngvnyang ehnyet seq yvmvyah, ngos ma gyuk, ngos dang taiq das.