Read Achang CHUNGH 10 Bible Online

CHUNGH 10 - Achang bible

CHUNGH 10

¹YHENSAIN eh, nvng chamus we mas yap joq lah? Chiqjyen xauh dah shishenh lyis nvng chamus tamh joq lah?

²Lhung bang dah khwank cho ka shohjyen bang lyis shoeuhshih. Hauh bang khaujeini las lhaink yvmas nyamoq nyih.

³Lhung soeu dah khwank cho ka ma gis zis kuot mes. Nyoqnoq soeu ka YHENSAIN lhyi peq las nhoengh nyeis.

⁴Khwank dah lhung soeu ka Mangso lhyi ma xo. Nyah ehnyet mas Mangso ma bos ge dvnghamh.

⁵Nyah cho jens vjangh ung los; nah soetuon cho ka nyhang lha nyang ma daq gyo; nyang nyah jeswus dvnganh lyis chaxwe ma nhang.

⁶Ngos khanhamp eq ma dyoq ma bis das, khanhamp eq shanghsenh das zis ma nghuot ge nyah ehnyet mas taiqzo.

⁷Nyamoq nhuot mas nhoengh, mhuih, zaiq cho yah dyingh joq. Nyang gas ma gis dah hoeng phoh dang lvnyap taiq.

⁸Wukhau jens mas tswi ma bos bang lyis sat das ge gauh lhom nyeis. Nyang hauh bang lyis choq yoeuh nyeis.

⁹Khangkhyi teh, nyang gas tamh joqyos mas lhom nyeis. Shohjyen bang lyis lhom nyeis. Nyang twih khyoq las nyhik she loh.

¹⁰Nyamoq lyis thungh thyi lha lains loeu nyeis; nyah yom yah nyamoq lyis ung tyamp.

¹¹Nyah ehnyet mas taiqzo zis gas, Mangso tohnyhik goeus: nyah nyoqjeih chenh toh las ngos lyis khanhamp eq ma nyvng das, ge.

¹²YHENSAIN Mangso eh, lhung bang lyis joeng das zis toq aq, shohjyen xauh bang lyis vtohnyhik.

¹³Lhung soeu ka Mangso lhyi dius ngis khasoeh yoh khyoq lah! Nyah ehnyet mas, Nyang ngos lyis yobos dyei das zis ma nghuot, ge khasoeh yoh taiqzo lah?

¹⁴Yau cho yahge kuk cho lhyi nvng nyvng nyeis las pangh das zis vjangh cicont nghuot. Shohjyen soeu ka Mangso dah pangh cho lhyi loms nyeis. Nvng gas gyvzaiq gyvnang xauh bang lyis pangh soeu nghuot.

¹⁵Lhung soeu yahge ma gis soeu dah yomsoq yoeus tyamp dyei aq. Nyamoq kuot shuot dah cho lhyi ma doms kuot lo shoq yobos dyei aq.

¹⁶YHENSAIN ka vcaiq vto hwankti nghuot; gohtoeu mangso lhyi paiq bang nyah mau masyah dyoq dyuk loh das.

¹⁷YHENSAIN eh, ehnyet nyhen mha gyoh bang dah omes cho lhyi nvng gyo yoeus dyei. Nvng nyamoq lyis yomdyei das.

¹⁸Chauhlo jens yahge zaiq zis xauh bang dah ngaus thwe lhyi nvng gyo dyei. Nvng nyamoq shot pheh soetuon dyei las nyeisjvng dius jens gyuk cho ma bos lo bas jungh.