Read Achang CHUNGH 102 Bible Online

CHUNGH 102 - Achang bible

CHUNGH 102

¹YHENSAIN eh, ngos dung dang gyo dyei aq. Ngos kaiq dung yvlyis gyo yoeus dyei aq.

²Ngos chiqjyen buisnyeis lyis, ngos lyis nungs vphuk loh! Ngos lyis gyo dyei aq, Ngos lui lyis lvnyap toeuh aq.

³Ngah kang nyikhauh teh bi tyamp, ngah gungsdom nyi teh ngeh tyamp.

⁴Ngos gas mhanhkyuk teh bat khyop zis xauh; ngos wom zo mes ehnyet ma bos lo.

⁵Ngos nos kaiq kyingh nyeis; ngos yau mas yeis dvjons lo.

⁶Ngos gas mhanhdyvp mas dah nghoq teh, nyeiskyuk yos mas dah khunghbop teh nghuot.

⁷Ngos gying lhain toh; ngos gas yhenkhung mha dvdoeu kyingh tsung toh dah jos teh nghuot.

⁸Ngah jeswus jens ngos lyis dvnyeih yah laihwangh nyeis; ngos lyis jwangh bang ngah nyings yoeus las mau tsain khi.

⁹Nvng nhaiqlom dyis nhaiq gis yo gvng mas nyiyvp gas ngah wom, ngah nyoqdyeis eq ngah shukphoh yah lhoeuq loh. Nvng ngos lyis kui doeuh tyamp.

¹¹Ngah kang ka nyenhthang lhyi dah siyet teh nghuot; ngos mhanh kyuk teh bweh joq.

¹²Nghuot laus eq YHENSAIN eh, nvng gas vcaiq vto hwankti nghuot. Dius vcaiq caiq nvng lyis soh nyeis das.

¹³Nvng toq las Zion lhyi nhaiqnyen das: nghuot goeus, nyang lyis nhaiqnyen das shishenh jweh goeus; haih zis gas jus dah shishenh nghuot.

¹⁴Nyang gas mhont zis xauh laus eq nah jyeidwis jens hauh wus lyis jyetdap; nyang gas dyoqbis goeus laus eq nyamoq gas nyang lyis nhaiqnyen.

¹⁵Housoeh las dius nyau jens YHENSAIN lhyi gyukwoms das, nyeisjvng hwankti dvnganh gas nah yomsoq lyis gyukwoms das.

¹⁶YHENSAIN ka Zion lhyi doms kuot lyis nyang nyah kuhxing cho chixoeuq das.

¹⁷Nyang she tyamp toh dius jens lyis gyo dyei das, nyamoq shvmanh dung dang lyis gyo dyei.

¹⁸YHENSAIN kuot khoq goeus dah cho lhyi thang pheh bang nyhenshang lhaih toh. Housoeh lyis ma khoeu los shih bang nyang lyis chungh das.

¹⁹YHENSAIN ka nyah dah nyhang thank gyingshang joqyos masyah yoeuh kat. Nyang gas maukhung mhayah nyeisjvng mas yoeuh nyeis.

²⁰Nyang thung lungh bang noskyingh yvlyis xauhgyo. Shei das zis toeuq toh bang lyis lhuiq kat.

²¹Housoeh las Zion mha YHENSAIN nyings lyis Zion mha taiq hoeuh das, Yerusalem mas chungh das.

²²Dius nyau jens yahge munghdan jens dvgeh huom uhlyis YHENSAIN lhyi paiq das.

²³Ngos ngis shih yoq lyis YHENSAIN ngos lyis yomnhuk nhang; nyang ngah kang shungh dyei.

²⁴Hauh uhlyis ngos taiq zis gas, Mangso eh, gvshih ngos ma mang shih lyis ngah kang lhyi vyoeus tyamp. YHENSAIN eh nvng gas vcaiq caiq nyeis.

²⁵Nvng gohlhain yah nyeisjvng vpom lhyi kuot toh. Nah loq yah maukhung lhyi kuot toh.

²⁶Hauh zis gas dyuk loh das laus eq nvng gas goeng joq das. Dvnganh zis gas dyimis teh tyang loh; nvng hauh yvlyis dyimis teh thaiq tyamp las, hauh zis tsain dyuk loh.

²⁷Nghuot laus eq nvng gas vjangh dvyhangteh nghuot, nah kang eq khanhamp eq ma thank loh.

²⁸Ngamoq lo jens gas jesluiq shohluiq tsoq nyeis das, nvng gomh toh yvmas nyeis. Nyamoq dah diusjangh caiq gas gau joq das.