Read Achang CHUNGH 103 Bible Online

CHUNGH 103 - Achang bible

CHUNGH 103

¹Ngah dyos eh, YHENSAIN lhyi chungh aq. Ngah ehnyet dvnganh yah nyah gyingshang nyings lyis chungh aq.

²Ngah dyos eh, YHENSAIN lhyi chungh aq. Nyang kha iq nhaiqbos yvlyis vtohnyhik.

³Nyang ngah yaunos dvnganh khyuot dyei. Ngah noslom dvnganh gis los nhang.

⁴Nyang ngos lyis lop masyah gomh kat las, jyetdap zis yah eq nhaiqnyen zis yah shvmanh dyei.

⁵Nyang ngah kang lhyi gis zis yah tyink dyei, housoeh ngos loyvm bweh las zonsmuh teh yombos das.

⁶YHENSAIN ka zaiq zis xauh bang lyis lyi jus khyvlyis soetuon dyei, nyamoq dah toeuh lyis dyei.

⁷Nyang Moshe lhyi nyang nghamh toh cho chixoeuq, Israel jens lyis nyah yomzains muh nyvng nhang.

⁸YHENSAIN ka jyetdap, nhaiqnyen shohgyo, nhaiq lvnyap ma yo, mathank magons nhaiqnyen cho yah dyingh joq.

⁹Nyang yang lyis vjangh nyho nyeis zis ma nghuot; vjangh eq nhaiq ma yo toh.

¹⁰Nyang gas yang kuot nyhoq yobos dyei zis ma nghuot, yang yobos kuot las yang shuot teh tauh dyei zis ma nghuot.

¹¹Maukhung ka nyeisjvng thoq lyis nyhang joq zis yah dvyhangteh, nyang lyis gyukwoms bang thoq mas nyah nhaiqnyen cho kuhxing joq.

¹²Buisthuq gas buiswvng yah we goh joq teh, nyang yah yaunos lyis we loh nhang.

¹³Uwus gas nyah lo jens lyis nhaiqbos teh YHENSAIN ka nyang lyis chungh bang lyis nhaiqbos.

¹⁴Yang lyis cha yah kuot toh zis nyang seq, yang gas tsohmop dvnghuot yvlyis soh dyei.

¹⁵Yah kang ka mhanh teh nghuot. Yang gas pa mha ban teh kuh los las buh joq.

¹⁶Lyeis muot los lyis hauh zis dyuk loh, hauh yvlyis hank ma doms nyvng lo.

¹⁷Nghuot laus eq YHENSAIN lhyi chungh bang xiklyis gas nyah jyetdap cho vcaiq vto joq joq. Dan cho ka nyang lyis gyukwoms bang yahge nyah lo jens vcaiq caiq thoq mas joq.

¹⁸Nyah thanghchvp lyis chank bang yahge nyah tyingtoh dang chank kuot bang thoq mas joq das.

¹⁹YHENSAIN ka maukhung mha nyah hwankti tank toh; nyang dvnganh thoq mas hwankti nghuot.

²⁰Nyah vmingh lyis domsyos gyo bang, nyang cha taiq yvlyis gyo bang, yombos dah yomzains loeuswons bang eh, YHENSAIN lhyi chungh geh.

²¹YHENSAIN dah jyeidwis jens, nyang o khyvlyis chank kuot bang, maukhung mha dah yomsoq bos bang dvnganhmoq eh, nyang lyis chungh geh.

²²YHENSAIN guon ya guon yvmas dah kang bos zis dvnganh eh, nyang lyis chungh geh. Ngah dyos eh, YHENSAIN lhyi chungh aq.