Read Achang CHUNGH 104 Bible Online

CHUNGH 104 - Achang bible

CHUNGH 104

¹Ngah dyos eh, YHENSAIN lhyi chungh aq. Ngah YHENSAIN Mangso eh, nvng gas svsoh kuhxing. Nvng gas shoenkkhyi yahge phunk wuot toh.

²Nvng bvng yvlyis dyimis teh wuot toh. Maukhung lhyi mis teh lhywa toh.

³Nvng nah yhen lhyi jeis thoq mas tsuk toh. Jyommauh lyis nah lhyingh teh yhung lha, lyeis dah dungs yah dang loh.

⁴Lyeis lyis nah loeuswons bang, maunyoq lyis nah jyeidwis jens khyvlyis yhung.

⁵Nvng nyeisjvng lyis goeng yvmas vpom tsuk toh, houka khanhamp eq ma lop ma loeh das.

⁶Nvng hauh thoq mas thomh yah misseh teh nghop toh. Jeis gas boms jens lyis nghop toh.

⁷Nvng jeis lyis nyho lhyi nyamoq phang loh; nyamoq nah vmingh thwe xauhgyo lyis nyap nyap loh.

⁸Nyamoq gas boms thoq cho yah yaus las langhkhau mha yaus gyoh loh. Nvng nyamoq lyis toh yvmas joq.

⁹Nvng nyamoq ma yoh lai das maukyo toh, nyamoq nyeisjvng lyis ma yoh doms nghop shoq kyoq toh.

¹⁰Nvng gas langhkhau mha jeis thuq nhang lha, boms jens dah vjo chank yaus nyeis.

¹¹Houka yewus jens lyis shuk nhang. Ye luzoe jens shet lyis xauh shuk.

¹²Hauh vyvm mas dah saiqzains jens mas nghoq jens sot sot las chunghthwe tsain kat nyeis.

¹³Nvng boms mas maukhung mhayah mau wus gyuon; nyeisjvng gas nah shvmanh yah dyingh joq.

¹⁴Nvng noeu jens xiklyis mhanh, dius yhung das xiklyis vzains yuk los nhang. Housoeh nyang jyo yoh khyoq zo.

¹⁵Zvbiq gas nyang lyis pyo nhang, tsanlun coeu ka nyoqnho diu nhang; wom eq nyang lyis yombos nhang.

¹⁶Lebanon mas YHENSAIN nyang tsungh toh, nyah arit zains jens mau jeis nyoshoq xauh shuk nyeis.

¹⁷Houmha nghoq sot tsain sot; nghoq kywank eq xoeuh zains mas sot sot toh.

¹⁸Ye shvbeq jens gas boms nyhang mha nyeis, lukkhyung mha tyoeu jens gas lukmhung mha tamh joq.

¹⁹Lhamhmuh khyvp suon das xiklyis nvng lhamhmuh lyis kuot toh. Buis eq nyang wvng das shishenh seq.

²⁰Nvng nyenh lyis kuot toh las, mauchuot lyis yewus dvnganh thuq los.

²¹Khangkhyi kyoh lo jens gas Mangso dyei toh dah zonoms xo, shoh khat uhlyis nyings.

²²Buisthuq los lyis nyamoq khyung mha tauh loh las whop joq.

²³Dius jens gas nyamoq yoszoh pheh loh las nyenhthang jweh shoq muh tsain zwi khank.

²⁴YHENSAIN eh, nvng vyhang nyoshoq kuot toh! Nvng dvnganh yvlyis joeui yah kuot toh. Nyeisjvng gas nah dah dwis ya dwis zis yah dyingh joq.

²⁵Kuh las lvm dah thomh tsain joq, hauh yvmas ngis ja kuh ja ma yoh thoq suon lo dah dwis ya dwis zis bos.

²⁶Houmha sangpho jens loh las nvng gvnkhanh toh mvnjung eq yang nyeis.

²⁷Nyamoq chah uhlyis nyamoq lyis zonoms dyei das xiklyis dvnganh gas nvng lyis nges toh.

²⁸Nvng nyamoq lyis zonoms dyei las nyamoq zo, nvng nyamoq lyis zo das wom dyei las nyamoq zo jo.

²⁹Nvng nungs phuk loh lyis nyamoq chiqh; nvng nyamoq dah soq lhyi yoeus tyamp goeus ya, nyamoq shei lha nyamoq los dah tsoh mas tauh e.

³⁰Nghuot laus eq nvng nah soq nyamoq lyis dyei lyis nyamoq gas gvnkhanh toh zis xauh las, nvng nyeisjvng mas kang dwis zis vsaiq dyei.

³¹YHENSAIN dah phunk vcaiq vto joq bas jungh. YHENSAIN ka nyang kuot toh muh mas pyo bas jungh.

³²Nyang nyeisjvng lyis yoeuh las houka nvn nyeis; nyang boms lyis tanh lyis nyikhauh thuq los.

³³Ngos dvcaiq gonh YHENSAIN lhyi chunghthwe kat das. Ngos dwis nyeis dvchank ngah Mangso lhyi chunghthwe kat las chungh das.

³⁴Ngos gaus cho ka nyah jyank masyah los yvmvyah ngah chunghthwe ka nyang lyis nhaiqdoeus nhang bas jungh.

³⁵Yaunos wons bang nyeisjvng masyah dyoqbis tyamp bas jungh, lhung bang ma bos lo bas jungh. Ngah dyos eh, YHENSAIN lhyi chungh aq. YHENSAIN lhyi chungh aq!