Read Achang CHUNGH 105 Bible Online

CHUNGH 105 - Achang bible

CHUNGH 105

¹YHENSAIN lhyi nhaiqshoqlang chungh geh, nyah kuhxing cho lhyi taiq hoeuh geh: nyang kuot goeus cho, dius nyau jens lyis taiq kyoh geh.

²YHENSAIN lhyi chunghthwe kat las chungh geh; nyang kuot goeus dah mauhphoh cho lhyi taiq geh.

³Yang gas nyang yah sen lha gausyis geh; nyang lyis paiq bang dvnganh gauslaus bas jungh.

⁴Pangh das xiklyis YHENSAIN jyank mas loh geh, nyang lyis vjangh tsoq paiq geh.

⁵Nyah jyeidwis Abraham dah vnyau vshih, Yakop dah lo jens, nyang khyen yoeus toh bang eh,

⁶nyang kuot khoq mauh loqmuh, nyah yomsoq muh, nyang dyei toh soetuon cho lhyi soh geh.

⁷YHENSAIN ka yah Mangso nghuot. Nyah vmingh gas mungkvn gonh xiklyis nghuot.

⁸Nyang nyah thanghchvp lyis vcaiq vto toh, nyah dangthoengh dius caiq dvkhyoengh goeng nhang das.

⁹Houka nyang Abraham yah xamxonh goh toh, Isak lyis dangthoengh toh cho nghuot.

¹⁰YHENSAIN ka Yakop yah thanghchvp toh, hauh zis vcaiq vto goeng joq das.

¹¹Nyang taiq zis gas, Khanan mau ngos nvng lyis dyei das, hauh zis gas nvng vcaiq vto sain toh das.

¹²Mangso dah dius jens gas ma tham, Khanan mau mas boengh dvlos duot nyeis.

¹³Dius nyau dvnyau masyah dvnyau, munghdan dvkoeuq masyah dvkoeuq dyung yenh.

¹⁴Nghuot laus eq Mangso ka hank yah eq nyamoq lyis ma zaiq nhang, nyamoq lyis gos zis yah hwankti jens lyis zaih nhang.

¹⁵Nyang taiq zis gas, Ngos khyen toh, ngah jyeidwis jens lyis vzangh goh, ngah lvpe jens lyis vtanh goh, ge.

¹⁶YHENSAIN ka nyamoq mau mas phanghkhauq khyoq zis yah nyamoq dah zonoms dvnganh yoeus tyamp.

¹⁷Nghuot laus eq nyang nyamoq dah xik pheh dius dvyuk nhang kat. Houka Yosep jons teh ungh kat zis xauh soeu nghuot.

¹⁸Nyang gas khyei lhyi jvngchoh twih, lainzain lyis thyeq yah twih zis xauh.

¹⁹Houka YHENSAIN dah dang nyang mas kyink lyis jus las nyang taiq toh dang nyuk los shoq nghuot.

²⁰Hauh thang lhyi Egutu hwankti ka nyang lyis phank kat nhang lha dius nyau jens dah guon soeu ka nyang lyis lhuiq kat.

²¹Hwankti ka nyang lyis nyah vtsuyaq lyis shwih nhang; mau gonh lyis guon soeu kuot nhang.

²²Housoeh nyang gas hwankti dah muh wons bang thoq mas yomsoq bos; nyang lyis joeui dyei bang lyis eq taiq shet das toeuh yoh.

²³Hauh thang lhyi Yakop gas Egutu mas e lha, hauh mau mas nyeis.

²⁴YHENSAIN ka nyah dius nyau lyis svsoh jebais los nhang lha, nyamoq dah jeswus jens thoq lyis yom zes bos nhang.

²⁵Nyang gas Egutu bang nyah dius jens lyis hoeng lha nyah jyeidwis jens lyis mhuihzo das khyvlyis kuot.

²⁶Nyang nyah jyeidwis Moshe yahge nyang khyen toh dah Aron lyis nhang kat.

²⁷Nyah aiq yuk gas Egutu mas Mangso dah yomzains muh yahge yomsoq muh tsain kuot.

²⁸Mangso ka hauh mau mas mauchuot cho nhang kat las chuot joq nhang. Nghuot laus eq Egutu bang nyang tying dang lyis domsyos ma gyo.

²⁹Housoeh las nyang nyamoq dah jeislvng jens lyis suih bweh nhang lha nyamoq dah oengdoq lyis sat.

³⁰Nyamoq mau mas puh los nhang lha, hwankti yhen mas yangh dyingh joq.

³¹Mangso taiq toh goeus ya, dvmau gonh yvngkhungh dyingh joq, dvmau gonh tyop yah dyingh joq.

³²Nyang nyamoq mau mas gyutomp lyis mau soeh wus nhang, maunyoq eq nyik nhang.

³³Nyamoq dah zvbiq nwis yahge maiphang zains lyis bat las mau gonh dah saiq lyis khyauh tyamp.

³⁴Nyang taiq toh las, janghgyik ma thoq suon lo shoq los zis yah,

³⁵mau gonh mas anghphoq zo tyamp, yos mas jyo eq zo tyamp.

³⁶Nyang Egutu yhenbang dvnganh dah yukgis lomons lyis sat.

³⁷Hauh thang lhyi nyang Israel jens lyis shwih thuq los; nyamoq ngwis xing yah dvgeh thuq los. Nyamoq dvnganhmoq yanghzan las yombos.

³⁸Nyamoq thuq los lyis Egutu bang gaus nyeis: khasoeh ge lyis, nyamoq hauh bang lyis gyuk.

³⁹Mangso ka nyah dius jens lyis jyommauh yah lhywa nghop dyei, nyenh lyis nyamoq bvng zis yoh das nyhenshang nyi tuonh dyei.

⁴⁰Nyamoq dung las, nyang mvne nghoq khyoq dyei; nyamoq lyis maukhung mha dah zonoms yah nhaiqtap nhang.

⁴¹Nyang lukmuh lom phank lyis jeis thuq los las kyuk yvmas jeismuh lvng teh yaus loh.

⁴²Nyang nyah jyeidwis Abraham lyis taiq toh, nyah gyingshang dangthoengh lyis soh.

⁴³Housoeh nyang khyen toh, nyah dius jens lyis shwih thuq los, nyamoq gas gaus dah chunghthwe kaiq kat.

⁴⁴Nyang nyamoq lyis gohtoeu dius jens dah maunyeis dyei. Gohyuk kuot toh danh lyis yoeus nhang.

⁴⁵Houka nyah dius jens gas nyang tyingtoh dang chank las nyah lyi domsyos gyo bas jungh ge zis nghuot. Haleluya!