Read Achang CHUNGH 106 Bible Online

CHUNGH 106 - Achang bible

CHUNGH 106

¹Haleluya! YHENSAIN ka gis yvmvyah nyah jyehjuh lyis chungh goh; nyah jyetdap cho ka vcaiq vto joq.

²YHENSAIN dah yomzains muhzoh lyis hank yoh thoq taiq lah? Nyang lyis hank ma yoh thoq chungh!

³Nyah dang lyis domsyos gyo las, vjangh dan khyvlyis kuot bang gas ngelhoq.

⁴YHENSAIN eh, nvng nah dius jens lyis pangh uhlyis ngos lyis soh aq. Nyamoq lyis khyuot yoeus uhlyis ngos lyis pangh aq.

⁵Nvng khyen toh bang dah nyeisgis yaplhoq cho ngos lyis nyvng nhang aq. Nah dius nyau gausyis yvmas ngos lyis gauslaus nhang aq. Nvng yah sen bang nvng lyis chungh yvmas ngos yoh bos bas jungh.

⁶Ngamoq gas ngamoq phauh thyeih moq teh yaunos kuot goeus. Ngamoq lhung lha ma gis khyvlyis kuot goeus.

⁷Egutu mau mas ngamoq phauh thyeih moq Mangso dah mauh loqmuh lyis ma seqgyo, nyoshoq lhain nyah jyetdap cho chixoeuq yvlyis nyamoq tohnyhik las nyamoq gas Thomh Nes mas Yomzains lyis gomloeus tsain toq.

⁸Nghuot laus eq, nyah kuhxing yomsoq lyis chixoeuq das xiklyis nyang dangthoengh toh zis yah dvyhangteh nyang nyamoq lyis khyuot yoeus.

⁹Nyang Thomh Nes lyis vmingh dyei lyis hauh zis kanh loh. Housoeh nyang nyah dius jens lyis tungyos cho shwih lai los.

¹⁰Nyang nyamoq lyis, nyamoq hoeng bang loq masyah khyuot yoeus las nyamoq dah jeswus loq masyah khyuot kat.

¹¹Jeis gas nyamoq dah jeswus jens lyis nghop tyamp; nyamoq dvyuk eq ma nyet lo.

¹²Hauh uhlyis nyah dius jens gas nyah dangthoengh lyis lomsjingh las, nyang lyis chunghthwe kat las chungh.

¹³Nghuot laus eq nyamoq gas nyah muh lyis lvnyap tohnyhik las, nyang joeui dyei yvlyis ma langh lo kuot loh.

¹⁴Nyamoq mhanhdyvp mas obos las, nyeis kyuk yos mas Mangso lhyi shiyoeuh.

¹⁵Nyang nyamoq sang zis tyink dyei laus eq, nyamoq lyis gyukphoh noslom dyei.

¹⁶Hau mhanhdyvp mas nyamoq gas Moshe yahge YHENSAIN dah gyingshang jyeidwis Aron lyis tsain noh.

¹⁷Nyeisjvng ghoh los las Dathan lhyi nyhau tyamp. Abiram yahge nyah yhenbang lyis nghop tyamp.

¹⁸Nyamoq dah thang chank bang mas nyi gyoh las lhung bang lyis ngheq tyamp.

¹⁹Nyamoq Sina boms mas xing noeulu lo kuot las, hauh gungslho lyis tsain paiq.

²⁰Nyamoq gas Mangso dah phunk lyis mhanh zo noeulu lho yah thaiq tyamp.

²¹Egutu mas nyah yomzains muh yah nyamoq lyis khyuot yoeus dah Mangso lhyi tsain tohnyhik tyamp.

²²Nyang houmha mauhphoh muh cha kuot! Thomh Nes yvm mas mauhphoh zis kuot goeus!

²³Mangso ka, nyah dius jens lyis mhont das ge taiq uhlyis nyang khyen toh dah jyeidwis Moshe ka nyah xikkhonh mas yap las sang lhyi, mhont das ge nhaiqyo yvlyis yoh gyoh nhang.

²⁴Hauh thang lhyi nyamoq hau pyo dah mau lyis peq tyamp; khasoeh ge lyis nyamoq Mangso dah dangthoengh lyis ma lomsjingh.

²⁵Nyamoq gas nyamoq zvng mas tsain lop nyeis las, YHENSAIN dah thwe lhyi ma gyo.

²⁶Housoeh las nyang nyamoq lyis mhanhdyvp mas shei nhang das ge, nyamoq lyis zaih nhang.

²⁷Nyamoq dah vnyau vshih lyis eq gohnyau bang mas sanh tyamp das, lvbaus mau mas shei nhang das, ge.

²⁸Peor mas Mangso dah dius jens gas Ba mangso lhyi bos paiq, soq ma bos dah mangso lhyi kyangh dah shoh tsain zo.

²⁹Nyamoq housoeh kuot zis yah YHENSAIN lhyi nhaiq lhoq yo las nyamoq mas gyukphoh yomh los.

³⁰Nghuot laus eq Phineha toq yap las yobos bos bang lyis joeng thang lhyi yomh doms tyamp.

³¹Hou mhayah nyang nyoqnho yoh cho lhyi jweh los das vcaiq caiq vjangh yah soh nyeis das, ge.

³²Meriba jeisthuq dwang jens mas dius jens gas YHENSAIN lhyi nhaiqyo nhang. Nyamoq gvng mas Moshe eq yau cho bos loh.

³³Nyamoq gas nyang lyis nhaiq khoh nhang yvmvyah nyang nghamh das shishenh ma bos lo nhuot taiq shuot loh.

³⁴YHENSAIN taiq toh zis yah dvyhangteh nyamoq gohnyau bang lyis shank shoq ma sat.

³⁵Gohnyau bang yah lhukgoh nyeisyap loh las nyamoq dah lyi lyis tsain xuq.

³⁶Mangso dah dius jens phvra lyis bos paiq las, hauh zis nyamoq dah dyoqbis cho bweh loh.

³⁷Khanan phvra jens lyis phudyei das xiklyis nyamoq dah loloeu lonyi jens dyei tyamp.

³⁸Nyamoq gas yobos ma bos dah loshang jens lyis sat. Dius sat bang yah hauh mau lyis vwot v-oeu mus nhang.

³⁹Nyamoq muhzoh gvng mas nyamoq ma lhoq ma shang mus los. Houka Mangso lhyi lom ma luk cho nghuot.

⁴⁰Housoeh yvmvyah YHENSAIN ka nyah dius jens lyis nhaiqyo, nyang nyamoq lyis choqh.

⁴¹Nyang nyamoq lyis gohnyau loq mas kyauh tyamp las, nyamoq dah jeswus gas nyamoq lyis los guon.

⁴²Nyamoq dah jeswus jens yah nyamoq lyis zaiq, nyamoq hauh loq khau mha gop joq.

⁴³YHENSAIN ka nyah dius jens lyis nyoshoq lhain khyuot kat laus eq, nyamoq gas nyang lyis gomloeus dvtoq. Housoeh las nyamoq gas yaunos mas zes nyop loh.

⁴⁴Nghuot laus eq nyamoq kaiq lui lyis YHENSAIN xauhgyo dyei. Nyang nyamoq dah chiqjyen lhyi yoeuh dyei.

⁴⁵Nyang nyamoq xiklyis nyah thanghchvp lyis soh zis yahge nyah kuhxing jyetdap cho gvng mas nyah nhaiqyo gyoh tyamp.

⁴⁶Nyamoq lyis zaiq bang dvnganh lyis eq nhaiq seq nyen das cho phank dyei.

⁴⁷YHENSAIN, ngamoq dah Mangso eh, ngamoq lyis khyuot yoeus aq, ngamoq lyis dius nyau jens jyank masyah shwih tauh los aq. Housoeh lyis ngamoq nhaiqshoqlang oen nah gyingshang nyings lyis chungh das.

⁴⁸YHENSAIN, Israel dah Mangso lhyi chungh geh. Nyang lyis gvshih eq vcaiq caiq eq chungh geh! Dius yuk khanghmuh Amen, ge bas jungh. Haleluya!