Read Achang CHUNGH 107 Bible Online

CHUNGH 107 - Achang bible

CHUNGH 107

¹YHENSAIN ka gis yvmvyah, nyang lyis nhaiqshoqlang sang geh. Nyah jyetdap cho vcaiq vto joq.

²YHENSAIN yah khyuot yoeus toh bang dvnganh eh, nyang lyis chungh yvmas haih dang doms taiq taiq kuot geh. Nyamoq lyis nyamoq dah jeswus masyah khyuot kat.

³Nyang namoq lyis lvbaus mau masyah, Buisthuq, buiswvng, mautsung, mautyi mau masyah shwih los.

⁴Dvyhamh gas mhanhdyvp chokhyoh ma bos yvmas suh whang loh, nyeis das wus pheh loh cho ma xo nyvng.

⁵Nyamoq yuot shet las nyamoq nghamhloms cho dvnganh dyuk loh.

⁶Hauh thang lhyi nyamoq yaukyenh las YHENSAIN lhyi lui, housoeh nyang nyamoq lyis nyamoq dah shanghsenh masyah khyuot yoeus.

⁷Nyang nyamoq lyis, nyamoq nyeis das wus mas cho dan cho yah choshe los.

⁸Nyamoq gas YHENSAIN dah mathank magons jyetdap cho yahge, nyamoq lyis kuot dyei dah mauhphoh muh nyhenshang nyang lyis nhaiqshoqlang sang gis.

⁹Nyang gas zosyuot jeisshet bang lyis gis zis yah jo nhang zis yah nhaiqtap nhang.

¹⁰Dvyhamh gas nhaiqkuk zis yah mauchuotdwang mas nyeis, thung lungh bang eq shamjvng twih zis xauh.

¹¹Khasoeh ge lyis nyamoq gas Yomzains Mangso dah tyingtoh dang lyis gomloeus toq, nyang shet toh cho lhyi peq tyamp.

¹²Nyamoq gas muh changh las nyungdaus, nyamoq lains lyis hank ma toeu.

¹³Hauh thang lhyi nyamoq yaukyenh las YHENSAIN lhyi lui, housoeh nyang nyamoq lyis nyamoq dah shanghsenh masyah khyuot yoeus.

¹⁴Nyang nyamoq lyis nhaiqkuk cho mauchuotdwang masyah shwih thuq los, nyamoq dah shamjvng lyis vdoeus doeus thyet tyamp dyei.

¹⁵Nyamoq gas YHENSAIN dah mathank magons jyetdap cho yahge nyamoq lyis kuot dyei dah mauhphoh muh nyhenshang nyang lyis nhaiqshoqlang sang gis.

¹⁶Nyang gas thunk khomh jens lyis khyauh tyamp las, thyeq khomhkyank lyis eq vdoeus doeus thyet tyamp dyei.

¹⁷Koh bang gas, nyamoq yaunos kuot, ma gis zis kuot yvmvyah yobos xauh kham.

¹⁸Nyamoq zonoms lyis nghoengh las shei bah ge loh.

¹⁹Hauh thang lhyi nyamoq yaukyenh las YHENSAIN lhyi lui, housoeh nyang nyamoq lyis nyamoq dah shanghsenh masyah khyuot yoeus.

²⁰Nyang nyamoq lyis nyah vmingh yah gis los nhang, nyamoq lyis shei masyah khyuot yoeus.

²¹Nyamoq gas YHENSAIN dah mathank magons jyetdap cho yahge nyamoq lyis kuot dyei dah mauhphoh muh nyhenshang nyang lyis nhaiqshoqlang sang gis.

²²Phudyei zis yah jyehjuh chungh gis, nyang kuot dyei goeus cho dvnganh lyis gauslaus chunghthwe taiq kyoh gis.

²³Dvyhamh gas sangpho cho yah nvmukdra pheh goeu loh zis yah thomh thoq mas kang khoeu.

²⁴Nyamoq gas thomh thoq mas YHENSAIN nyah mauhphoh muh cha yoh kuot zis tsain nyvng.

²⁵Nyang vmingh dyei lyis lyeismuh jyang muot los las jeisphauq lyis lhoeu toq kat.

²⁶Sangpho ka lyeis mas nyhang shoq toq kat lho lha thomh khau mha doms duon pyeh wvng loh. Housoeh mus yvmvyah dius jens womh cho ma bos lo.

²⁷Nyamoq yhei yet soeu teh vtyi vkamh thungh dwes lains loh las, nyamoq dah lyes cho vkom dvnghuot lo.

²⁸Hauh thang lhyi nyamoq yaukyenh las YHENSAIN lhyi lui, housoeh nyang nyamoq lyis nyamoq dah shanghsenh masyah khyuot yoeus.

²⁹Nyang hau lyeisjyang lhyi tam nhang lha, thomh mas jeisphauq eq sam tyamp.

³⁰Hau jeisphauq sam loh yvmvyah nyamoq gaus. Housoeh nyang nyamoq lyis nyamoq omes dah goeukhanh mas jesluiq shohluiq shwih jweh loh.

³¹Nyamoq gas YHENSAIN dah mathank magons jyetdap cho yahge nyamoq lyis kuot dyei dah mauhphoh muh nyhenshang nyang lyis nhaiqshoqlang sang gis.

³²Nyamoq gas dius huom mha nyah kuhxing cho lhyi taiq hoeuh gis, uhshe bang dah huom xik mas nyang lyis chungh gis.

³³YHENSAIN ka jeislvng jens dvnganh kyuk kyuk kuot, jeisthuq dwang jens lyis eq jeis yaus zoh doms nhang.

³⁴Nyang gas jenh tsoh yos lyis coh ngvm dah nyeisgyih yos bweh nhang: khasoeh ge lyis houmha lhung bang nyeis.

³⁵Nyang gas sihsho yos lyis eq jeisthomh thaiq tyamp dyei, nyeiskyuk yos lyis eq jeisthuq dwang jeis yaus nhang.

³⁶Nyang yuot shet bang lyis houmha nyeis nhang lha nyamoq nyeis das wus tsain kuot.

³⁷Nyamoq yos mas zvbiq tsungh las vboms vbeq xauh yhomh yoeus.

³⁸Nyang nyah dius jens lyis shvmanh dyei las nyamoq nyoshoq jebais los. Nyamoq dah noeu kyunk ma yoms loh nhang.

³⁹Mangso dah dius jens gas lhoeng bang zaiq zis xauh las somh zis yah xoqphuh cho xauh kham nyeis lyis,

⁴⁰Nyang nyamoq lyis zaiq bang lyis hoeng cho chixoeuq zisyah mhanhdyvp, cho ma bos yvmas whang yenh nhang.

⁴¹Nghuot laus eq nyang nyungs bang lyis nyamoq khamzo nyeis masyah khyuot kat. Nyamoq dah yhenbang lyis yvng phung jens lyis teh jebais los nhang.

⁴²Dan bang haih zis nyvng las gaus. Nghuot laus eq lhung bang dvnganh gas samlo nyeis.

⁴³Joeui bos bang gas haih cho lhyi tsain nghamh yoeuh bas jungh; nyamoq gas YHENSAIN dah mathank magons jyetdap cho lhyi nghamh suon yoeuh bas jungh.