Read Achang CHUNGH 109 Bible Online

CHUNGH 109 - Achang bible

CHUNGH 109

¹Mangso eh, ngos nvng lyis chungh lyis samlo vjenh nyeis.

²Lhung bang yahge hwah bang ngos lyis zan los. Nyamoq ngah cho hwah taiq.

³Nyamoq ngos lyis hoeng cho taiq, shohyos gungs mas ngos lyis tsain zan.

⁴Ngos nyamoq lyis jyet laus eq nyamoq ngos lyis kauq: ngos gas nyamoq lyis shvmanh dung dyei.

⁵Ngos gis zis kuot laus eq nyamoq ngos lyis ma gis zis tauh dyei, jyet laus eq tsain hoeng.

⁶Ngah jeswus lyis kyink das zis ma jus soetuon bang lyis khyen, nyah jeswus mas zis dvyuk nyang lyis kauq.

⁷Nyang lyis kyink las yaunos nyvng bas jungh, nyah shvmanh dung cho eq dius sat yobos khyvlyis nghamh dyei bas jungh.

⁸Nyah kang lvnyap thank bas jungh, nyah muh gohyuk yoeus loh bas jungh.

⁹Nyah lo jens chauhlo bweh bas jungh, nyah nyi eq chauhmuh muh bas jungh.

¹⁰Nyah lo jens yhen ma bos, lvyon bweh bas jungh; nyamoq nyeis dah dyoqbis yhen masyah khat tyamp zis xauh bas jungh.

¹¹Jyen kat toh bang nyah zisyos dvnganh yoeus loh bas jungh. Nyang zwi toh zis dvnganh lvbaus jens xauh yoeus bas jungh.

¹²Hank eq nyang lyis nhaiq ma bos bas jungh. Nyang chauh toh khoq dah chauhlo jens lyis hank ma dyangh bas jungh.

¹³Nyah vshih jens shei dom bas jungh. Nyah nyings lyis thang caiq mas bang tohnyhik tyamp bas jungh.

¹⁴YHENSAIN ka nyah phauh thyeih moq dah ma gis cho lhyi soh las nyah ungwes dah yaunos lyis khanhamp eq ma tohnyhik dyei bas jungh.

¹⁵YHENSAIN ka nyamoq dah yaunos lyis vjangh soh bas jungh, nyamoq nyang lyis jyah tohnyhik tyamp bas jungh.

¹⁶Hauh soeu ka nhaiqbos cho lhyi khanhamp eq ma nghamh yoeuh ku. Nyang gas shohjyen bang, nyungs bang, yahge mvshoh mvjyen bang lyis shoeuhshih zis yah sat.

¹⁷Nyang gas nhoengh mes, nyang nhoengh zis xauh bas jungh. Nyang shvmanh dyei cho lhyi hoeng, nyang lyis hank eq ma shvmanh dyei bas jungh.

¹⁸Nyang gas nhoengh cho lhyi soenghchoenk dyi wuot toh teh nhoengh; nyang nhoengh zis gas nyah gungs mas jeis shuk teh wvng bas jungh, nyah shohyau mas coeu teh wvng bas jungh.

¹⁹Hau nhoengh zis nyang lyis dyimis teh wuot toh las nyah thyikdom mas dyichih teh vjangh dap joq bas jungh.

²⁰Ngos lyis ma gis zis sang bang ngah jeswus lyis YHENSAIN ka housoeh yobos dyei bas jungh.

²¹Ngah Yomzains YHENSAIN eh, nvng ngos lyis dangthoengh toh zis yah dvyhangteh jenh pangh aq. Nah jyetdap sainhnos gvng mas ngos lyis khyuot kat aq.

²²Ngos shohjyen lha nyungs nyeis. Ngah nhaiqlom khau mha nos nyeis.

²³Ngos gas nyenhthang lhyi dah siyet teh dyuk loh nyeis. Ngos tungde teh muot tangh loh zis xauh.

²⁴Wom ma zo las ngah phvlukchvp yomnhuk; ngos dye gyih loh goeus.

²⁵Dius jens ngos lyis nyvng lyis nyamoq yis; nyamoq lainkamh nocwih las ngos lyis jwangh.

²⁶Ngah YHENSAIN Mangso eh, ngos lyis pangh aq, nah mathank magons jyetdap cho gvng mas ngos lyis khyuot yoeus aq.

²⁷YHENSAIN eh nvng gas ngos lyis khyuot yoeus soeu nghuot zis ngah jeswus jens lyis seq nhang aq.

²⁸Nyamoq ngos lyis nhoengh das laus eq nvng ngos lyis shvmanh dyei das. Ngos lyis shoeuhshih bang somh loh lyis, ngos nah jyeidwis gas gaus das.

²⁹Ngah jeswus jens xoqphuh bas jungh, nyamoq dah xoqphuh zis gas nyamoq dah dyixing teh khuk toh bas jungh.

³⁰Ngos YHENSAIN lhyi nhaiqshoqlang nyoshoq sang das, dius jens huom yvmas ngos nyang lyis chungh das.

³¹Khasoeh ge lyis nyang gas shohjyen soeu lhyi khom kat, nyang lyis shei das nyhenshang thyet bang masyah khyuot yoeus.