Read Achang CHUNGH 116 Bible Online

CHUNGH 116 - Achang bible

CHUNGH 116

¹YHENSAIN ka ngah shvmanh dung dang xauhgyo; nyang ngos shvmanh dung lyis gyo yoeus dyei yvmvyah ngos nyang lyis jyet.

²Dvcaiq gonh ngos dung khanghmuh nyang gyo yoeus dyei.

³Shei cho dah jeswus gas ngos lyis tsain lhaink toh, gyukphoh lop gas ngos lyis nyheih lhunk toh; ngah jyank mas chiqjyen cho yahge gyuk cho yah dyingh joq.

⁴Housoeh ngos YHENSAIN lhyi lui las, YHENSAIN eh, ngos lyis jenh khyuot yoeus aq, oen.

⁵YHENSAIN ka nhaiq seq nyen las gis soeu nghuot. Yah Mangso ka nhaiqnyen shoh seqgyo soeu nghuot.

⁶YHENSAIN ka pangh soeu ma bos bang lyis gos dyei; ngos yaukyenh lyis ngos lyis khyuot yoeus.

⁷YHENSAIN ka ngah xiklyis gis yvmvyah, ngah dyos eh, nghamhnywe aq.

⁸YHENSAIN ka ngos lyis shei cho mhayah khyuot yoeus. Nyang ngah nyoqdyeis doms nhang, ngos somh loh das cho mhayah gomh dyei.

⁹Housoeh las kang dwis dah mungkvn mas ngos YHENSAIN xikkhonh mas suh e das.

¹⁰Ngos thungh thyi zis xauh nyeis oen sang laus eq, ngos lomsjingh nyeis shih.

¹¹Ngos gyuk dvn zoh lyis, Dius dvnganh gas hwah bang nghuot, oen goeus.

¹²YHENSAIN ngos lyis dyei dah gis cho lhyi ngos khasoeh thoq cap das lah?

¹³YHENSAIN ngos lyis khyuot yoeus gvng mas ngos nyang lyis nhaiqshoqlang oen zvbiq jyungshuk chi los dyei das.

¹⁴Ngos YHENSAIN lhyi dangthoengh toh zis, nyah dius jens dvnganh dah huom mas dyei das.

¹⁵YHENSAIN dah dius jens dvyuk yuk shei loh zis gas nyang lyis kha iq nos nhang!

¹⁶YHENSAIN eh ngos nah jyeidwis nghuot; Nah jyeidwis yahge nah jyeidwis nyhiq dah lo nghuot. Nvng gas ngos lyis shei mhayah khyuot yoeus goeus.

¹⁷Ngos nvng lyis nhaiqshoqlang jyungshuk phudyei las, nvng lyis shvmanh dung das.

¹⁸Ngos YHENSAIN lhyi nyhen toh zis nyah dius jens dvnganh dah xikkhonh mas tyink dyei das.

¹⁹Houka Yerusalem mas joq, nah gyingshang Yhenmuh mas nghuot. YHENSAIN lhyi chungh!