Read Achang CHUNGH 118 Bible Online

CHUNGH 118 - Achang bible

CHUNGH 118

¹YHENSAIN ka gis, nyah jyetdap cho ka vcaiq vto joq yvmvyah nyang lyis nhaiqshoqlang chungh geh.

²Nyah jyetdap cho vcaiq vto joq, ge Israel jens taiq nyeis bas jungh.

³Nyah jyetdap cho vcaiq vto joq, ge Mangso dah phudyei bang taiq nyeis bas jungh.

⁴Nyah jyetdap cho vcaiq vto joq ge, YHENSAIN lhyi paiq bang taiq bas jungh.

⁵Ngos chiqjyen masyah YHENSAIN lhyi lui lyis, nyang ngos lyis toeuh dyei las ngos lyis luiq nhang.

⁶YHENSAIN ka ngos yah nghuot las ngos ma gyuk das. Ngos lyis hank cha yoh kuot das lah!

⁷Ngos lyis pangh soeu ka YHENSAIN nghuot. Ngos ngah jeswus jens somh loh zis nyvng das.

⁸YHENSAIN lhyi loms zis gas dius lyis nges thoq lyis zes gis.

⁹YHENSAIN lhyi loms zis gas, dius dah uhshe bang lyis nges thoq lyis gis.

¹⁰Jeswus jens nyoshoq ngos lyis lhaink toh, ngos nyamoq lyis YHENSAIN dah yomsoq yah yoh mhont.

¹¹Nyamoq ngos lyis shot khanghmuh lhaink toh, nghuot laus eq ngos nyamoq lyis YHENSAIN dah yomsoq yah yoh mhont.

¹²Nyamoq ngos lyis dyo teh lhyomh los, nghuot laus eq huhyau nyi teh lvnyap shei loh. Ngos nyamoq lyis YHENSAIN dah yomsoq yah mhont tyamp.

¹³Ngos gas yomkat zan los zis xauh las somh loh nyeis laus eq, YHENSAIN ka ngos lyis pangh.

¹⁴YHENSAIN ka ngos lyis yombos nhang, yomsoq dyei. Nyang ngos lyis khyuot yoeus.

¹⁵Mangso dius jens dah zvng jens mas ung cho dah gausyis kaiq thwe lhyi gyo geh. YHENSAIN dah yomzains yomsoq muh kuot goeus.

¹⁶YHENSAIN dah yomsoq gas ngamoq lyis ung cho yoh nhang. Moeng zan yvmas nyah yomzains yomsoq bos.

¹⁷Ngos shei das gungsthaiq kang dwis las YHENSAIN kuot khoq yvlyis taiq hoeuh das.

¹⁸YHENSAIN ngos lyis pot laus eq nyang ngos lyis ma shei nhang.

¹⁹Ngos lyis Yhenmuh khyam khomh phank dyei geh; ngos houmha wvng las YHENSAIN lhyi nhaiqshoqlang chungh das.

²⁰Haih zis gas YHENSAIN dah khyam khomh nghuot; dan bang kyingh dvyoh wvng loh.

²¹YHENSAIN eh, ngos nvng lyis chungh: khasoeh ge lyis nvng ngos lyis gyo dyei, nvng ngos lyis ung cho dyei.

²²Yhen tsuk bang phauh ma dap ge peq tyamp dah luklom gas dvnganh yvmas yhaugyen thank zis bweh los.

²³Haih zis gas YHENSAIN nyang kuot cho nghuot. Hauh zis kha iq mauhphoh nghuot lah?

²⁴Haih zis gas YHENSAIN dah ung los buisnyeis nghuot. Yang pyo goh, pwe kuot goh.

²⁵Ngamoq lyis khyuot yoeus aq, YHENSAIN eh, ngamoq lyis khyuot yoeus aq! YHENSAIN eh, ngamoq lyis ung cho dyei aq.

²⁶YHENSAIN nyings mas jweh los soeu ka ngelhoq. YHENSAIN dah yhenmuh masyah ngamoq nvng lyis phu.

²⁷YHENSAIN ka Mangso nghuot; nyang yah xiklyis gis. Namoq loq mas saiq kyang tsain chi lha pwe xi goh, phon yvmlhaink zomsgoh geh.

²⁸Nvng ngah Mangso nghuot las ngos nvng lyis nhaiqshoqlang chungh. Ngos nah kuhxing cho lhyi taiq hoeuh das.

²⁹YHENSAIN ka gis, nyah jyetdap cho eq vcaiq vto joq yvmvyah nyang lyis nhaiqshoqlang chungh geh.