Read Achang CHUNGH 119 Bible Online

CHUNGH 119 - Achang bible

CHUNGH 119

¹YHENSAIN dah lyi khyvlyis kang dwis las, nyamoq kang dwis cho mha yobos huon chank ma bos bang gas ngelhoq.

²Nyah tyingtoh dang lyis chank las, nhaiqlom dvnganh yah nyah domsyos gyo bang gas ngelhoq.

³Nyamoq khanhamp eq ma kuot shuot; YHENSAIN dah cho chank yah suh e.

⁴YHENSAIN, nvng ngamoq lyis nah lyi dyei toh, lyi vlhomuh chank das zis eq tying toh.

⁵Nah lyi chank yvmas ngos lomluk luk kuot das oen nghamhloms.

⁶Ngos nah tyingtoh dang dvnganh lyis vlhomuh chank lyis xoq ma phuh das.

⁷Nvng dan khyvlyis soetuon cho lhyi ngos xuq las ngos nvng lyis zungh dah nhaiqlom yah chungh das.

⁸Ngos nah lyi chank das, ngos lyis khanhamp eq vdoeuh tyamp.

⁹Loyvm phoq gas nyah kang dwis cho lhoqshang shoq khasoeh zom das lah? Nah tyingtoh dang yah dvyhangteh kang dwis chah.

¹⁰Ngos nvng lyis ngah nhaiqlom dvnganh yah phuqsoe; ngos lyis nah tyingtoh dang masyah vwhang loh nhang.

¹¹Ngos nvng lyis yaunos ma kuot bas jungh oen, nah dang lyis ngah nhaiqlom mas comh kat toh.

¹²YHENSAIN eh, ngos nvng lyis chungh, ngos lyis nah cho jyauh aq.

¹³Nvng dyei toh dah lyi dvnganh lyis ngos doms kaiq kyoh das.

¹⁴Zisyos nyoshoq yoh thoq lyis ngos nah tyingtoh dang chank yvmas nhaiqdoeus.

¹⁵Ngos nvng shet toh cho lhyi xuq; nvng jyauh cho lhyi kyink yoeuh.

¹⁶Ngos nah lyi mas pyo lha, ngos nah tyingtoh dang lyis ma tohnyhik das.

¹⁷Ngos nah jyeidwis kang dwis las nvng jyauh cho lhyi yoh chank bas jungh gomh dyei aq.

¹⁸Ngos nah lyi mas mauhphoh jyoeng cho nyvng bas jungh, ngah nhaiqlom khomh phank dyei aq.

¹⁹Ngos haih nyeisjvng thoq mas dvsoq dvnyeis; ngos lyis nah tyingtoh dang vtohnyhik nhang.

²⁰Ngos nah soetuon cho lhyi malyenlo omes zis yah ngah nhaiqlom vdyis vmons mus loh.

²¹Nvng gas khwank bang lyis nyho; nah tyingtoh dang ma chank kuot bang gas nhoengh zis xauh.

²²Ngos nah lyi chank yvmvyah nyamoq dah laihwangh cho, jwangh cho mhayah lhuiq kat aq.

²³Guon bang huom zis yah ngos lyis tyi lha tsain lhaink laus eq ngos nvng jyauh cho lhyi xuq das.

²⁴Nvng shet toh cho ka ngos lyis pyo cho dyei; hauh zis gas ngos lyis joeui dyei cho tsain nghuot.

²⁵Ngos somh zis yah tsoh mas lains shei loh nyeis; nvng dangthoengh toh zis yah dvyhangteh ngos lyis kyoeu kat aq.

²⁶Ngos kuot cho dvnganh lyis rhen lha nvng ngos lyis toeuh dyei. Ngos lyis nah cho jyauh aq.

²⁷Ngos nah lyi seqgyo das xiklyis pangh aq, ngos nah mauhphoh dah jyauh cho lhyi nghamh suon yoeuh das.

²⁸Ngos lyis nhaiqkuk cho yah ung loh nyeis; nvng dangthoengh toh zis yah dvyhangteh ngos lyis yombos nhang aq.

²⁹Ngos lyis ma jus cho pheh vloh nhang, ngos lyis nah gis cho mha, nah lyi jyauh aq.

³⁰Ngos gas domsyos gyo das cho khyen yoeus goeus, ngos nah soetuon cho lhyi ngah nhaiqlom mas kat toh.

³¹YHENSAIN eh, ngos nvng shet toh cho lhyi chank kuot; ngos lyis xoq vphuh nhang.

³²Nvng ngos lyis zes seqgyo nhang cho dyei das yvmvyah ngos nah tyingtoh dang cho lhyi nhaiq wvng wvng chank das.

³³YHENSAIN eh, ngos lyis nah lyi dah vjyuk jyauh aq, ngos thank shoq chank das.

³⁴Nah lyi dah vjyuk phant kyoh aq, ngos chank das; ngah nhaiqlom dvnganh yah chank das.

³⁵Nah tyingtoh dang yoh chank nyeis nhang aq, khasoeh ge lyis ngos houmha pyo cho nyvng.

³⁶Ngos lyis dis los nhang das thoq lyis, nah lyi jens chank mes ehnyet bos nhang aq.

³⁷Phauh ma dap cho mha ngos lyis nhaiq vwvng nhang; nvng dangthoengh toh zis yah dvyhangteh ngos lyis gis cho kuot dyei aq.

³⁸Nah domsyos gyo bang lyis nvng thoengh toh dah dangthoengh, ngos nah jyeidwis mas goeng nhang aq.

³⁹Ngos gyuk nyeis dah laihwangh cho mhayah ngos lyis khyuot yoeus aq. Nah soetuon cho ka kha iq mauhphoh nghuot lah!

⁴⁰Ngos nah tyingtoh dang chank mes. Nvng gas dan soeu nghuot las ngos lyis kang vsaiq dyei aq.

⁴¹YHENSAIN eh, nvng ngos lyis kha iq jyetdap cho chixoeuq aq, nah dangthoengh bos zis yah dvyhangteh ngos lyis khyuot yoeus aq.

⁴²Ngos nah dang lyis loms yvmvyah ngos lyis laihwangh bang lyis yoh phuk taiq.

⁴³Ngah dah nghamhloms cho ka nah soetuon cho mha nghuot yvmvyah ngos lyis vjangh jyoeng dang yoh taiq nhang aq.

⁴⁴Housoeh ngos nah lyi vjangh chank kuot das, vcaiq vto chank kuot das.

⁴⁵Ngos nah jyauh cho lhyi tungh chank kuot yvmvyah shon shon yoh nyeis das.

⁴⁶Ngos nah tyingtoh dang hwankti jens xikkhonh mas taiq kyoh das, ngos xoq ma phuh das.

⁴⁷Ngos nah tyingtoh dang chank kuot yvmas ngos nhaiqdoeus: khasoeh ge lyis ngos hauh yvlyis tsain ngwis.

⁴⁸Ngos nah tyingtoh dang lyis ngwis zis yah phauh nyang; nvng shet cho lhyi nghamh yoeuh nyeis das.

⁴⁹Ngos nah jyeidwis xiklyis nah dangthoengh soh dyei aq; Hauh zis gas ngos lyis nghamhloms cho dyei.

⁵⁰Nah dangthoengh gas ngos lyis kang dyei yvmvyah ngos shanghsenh yvmas nhaiq yoh taink goeus.

⁵¹Khwank bang ngos lyis vjangh jwangh laus eq ngos nah lyi yah ma gang loh.

⁵²YHENSAIN eh, ngos gohlhain dah nah soetuon cho lhyi soh, houka ngos lyis nhaiqtaink cho shwih los dyei.

⁵³Ngos lhung soeu nah lyi ma chank zis nyvng lyis, ngos nhaiq svsoh yo mes.

⁵⁴Ngos nyeisjvng thoq mas kang dwis nyeis yoq lyis nah tyingtoh dang lyis chunghthwe kuot.

⁵⁵YHENSAIN eh, nyenh lyis ngos nvng lyis soh, ngos nah lyi lyis nghamh yoeuh.

⁵⁶Ngos nah tyingtoh dang chank yvmas pyo cho xo nyvng.

⁵⁷YHENSAIN eh, nvng gas ngos o zis dvnganh nghuot; ngos nah lyi chank das, oen dangthoengh toh.

⁵⁸Ngos nvng lyis ngah nhaiqlom dvnganh yah dung nyeis; nvng dangthoengh toh zis yah dvyhangteh, ngos lyis nhaiqnyen shohgyo aq.

⁵⁹Ngos ngah cho nghamh yoeuh las, nvng shet toh cho chank das oen dangthoengh toh.

⁶⁰Ngos nah tyingtoh dang chank das zis ma sheq toh lo, lvnyap kuot.

⁶¹Lhung bang ngos lyis lhyik thung toh laus eq ngos nah lyi ma tohnyhik.

⁶²Nah soetuon cho dan gvng mas nvng lyis chungh das zis, ngos gungsgvm lyis soh los.

⁶³Ngos gas nvng lyis phuqsoe bang dvnganh yahge nah lyi chank bang dah dyenschangh nghuot.

⁶⁴YHENSAIN eh, nyeisjvng gas nah mathank magons jyetdap cho yah dyingh joq; ngos lyis nah tyingtoh dang jyauh aq.

⁶⁵YHENSAIN eh, nvng nah dangthoengh tyink dyei, nvng gas ngos nah jyeidwis xiklyis gis.

⁶⁶Ngos nah tyingtoh dang lyis loms yvmvyah, ngos lyis joeui yahge seq cho dyei aq.

⁶⁷Nvng ngos lyis yobos ma dyei shih lyis ngos chowhang gyangh whang loh. Gvshih gas ngos nah dang lyis chank kuot goeus.

⁶⁸Nvng kha iq gis! Kha iq nhaiqbos! Nah tyingtoh dang ngos lyis jyauh aq.

⁶⁹Khwank bang ngah cho hwah taiq laus eq ngos gas nvng shet cho lhyi ngah nhaiqlom dvnganh yah chank.

⁷⁰Haih bang seq cho ma bos, nghuot laus eq ngos gas nah lyi mas pyo nyeis.

⁷¹Ngos xauh dah yobos gas ngah xiklyis gis: khasoeh ge lyis houka ngos lyis nah tyingtoh dang xuq nhang.

⁷²Nvng dyei dah lyi gas ngah xiklyis mungkvn mas dah ngwis dvnganh thoq lyis zes phauh.

⁷³Nvng ngos lyis gvnkhanh las jesluiq shohluiq toh. Ngos nah lyi yoh xuq bas jungh ngos lyis seqgyo cho dyei aq.

⁷⁴Ngos nah dangthoengh lyis loms yvmvyah, nvng lyis gyukwoms bang ngos lyis nyvng lyis nyamoq gaus das.

⁷⁵YHENSAIN eh, nah soetuon cho dan yvlyis ngos seq, nvng gas wontang yvmvyah nvng ngos lyis yobos dyei.

⁷⁶Ngos nah jyeidwis lyis nvng dangthoengh toh zis yah dvyhangteh nah mathank magons jyetdap zis gas ngos lyis nhaiqtaink bas jungh.

⁷⁷Ngos nah lyi mas pyo yvmvyah, ngos lyis nhaiqnyen aq, housoeh lyis ngos kang dwis das.

⁷⁸Khwank bang ngos lyis ma jus khyvlyis kauq yvmvyah nyamoq xoqphuh bas jungh; ngos gas nvng shet toh cho lhyi nghamh yoeuh das.

⁷⁹Nvng lyis gyukwoms bang yahge nah tyingtoh dang lyis seq bang ngah jyank mas los bas jungh.

⁸⁰Ngos somh zis yah xoq ma phuh bas jungh, ngos nah tyingtoh dang lyis top yoh chank bas jungh.

⁸¹YHENSAIN eh, nvng ngos lyis los khyuot yoeus das xiklyis ngos langh nyung nyeis; ngos nah dang mas loms toh.

⁸²Nvng dangthoengh toh yvlyis ngos yoeuh las nyoq nyung nyeis, hauh uhlyis ngos gas, Nvng ngos lyis khanhamp pangh das lah, oen nyei.

⁸³Ngos gas nyi mas won toh dah shohyeis thung teh vkyuh ma bos laus eq nah tyingtoh dang lyis ma tohnyhik.

⁸⁴Ngos khanyhank langh shih das lah? Ngos lyis shoeuhshih bang lyis nvng yobos khanhamp dyei das lah?

⁸⁵Nah lyi ma chank dah khwank bang ngah xiklyis dwang tsain doeu.

⁸⁶Nah tyingtoh dang dvnganh gas wontang: dius jens ngos lyis ma jus khyvlyis shoeuhshih las ngos lyis pangh aq!

⁸⁷Nyamoq ngos lyis vluk yoh sat, nghuot laus eq ngos nah tyingtoh dang lyis ma tyamp toh.

⁸⁸Nah mathank magons jyetdap cho ka ngah xiklyis gis yvmvyah ngos nah lyi chank das.

⁸⁹YHENSAIN eh, nah dang gas vcaiq vto joq das. Hauh zis maukhung mha vcaiq caiq joq.

⁹⁰Nah wontang cho ka vcaiq caiq goeng joq. Nvng nyeisjvng lyis toh toh las houka doengs joq.

⁹¹Nah dang gvng mas hau dvnganh gas khvnyhik jweh shoq joq: Khasoeh ge lyis nyamoq dvnganh gas nah jyeidwis jens nghuot.

⁹²Nah lyi ngah gaus cho dah vgungs ma nghuot lyis gas, ngos shanghsenh yvmas shei das.

⁹³Nvng shet toh cho yah ngos lyis doeng los nhang yvmvyah ngos hauh yvlyis khanhamp eq ma tyamp toh das.

⁹⁴Ngos lyis khyuot yoeus aq, ngos nah zis nghuot! Ngos nvng tyingtoh dang lyis tungh chank goeus.

⁹⁵Lhung bang ngos lyis sat das ge langh nyeis. Nghuot laus eq ngos nah tyingtoh dang lyis suon yoeuh nyeis.

⁹⁶Dvnganh gas vkyo bos cho lhyi ngos xuq yoeus goeus. Nghuot laus eq nah tyingtoh dang gas dyinghjet.

⁹⁷Ngos nah lyi lyis kha iq ngwis! Ngos dvnyeih gonh hauh yvlyis nghamh yoeuh nyeis.

⁹⁸Nah tyingtoh dang gas vjangh ngos yah dvgeh nghuot las, hauh zis gas ngos lyis ngah jeswus thoq lyis joeui zes bos nhang.

⁹⁹Ngos nvng shet toh cho lhyi suon yoeuh yvmvyah ngos ngah svra jens dvnganhmoq thoq lyis zes seqgyo.

¹⁰⁰Ngos nvng tyingtoh dang chank yvmvyah ngos svyenh jens thoq lyis zes dah joeui yoh.

¹⁰¹Ngos nah dang lyis yoh chank shoq ma gis cho khanghmuh lyis jhank nyeis.

¹⁰²Nvng nyang ngos lyis jyauh yvmvyah ngos nvng shet toh cho lhyi ma tyamp toh.

¹⁰³Nah shet toh dang kha iq nauhchau lah! Dyoyhei thoq lyis zes chau.

¹⁰⁴Ngos nah lyi masyah joeui yoh. Housoeh las ngos ma gis cho khanghmuh lyis hoeng.

¹⁰⁵Nah dang gas ngos lyis choshe dah nyitoengh yahge ngah gyung cho dah bvng zis nghuot.

¹⁰⁶Ngos nah lyi jus dah shet toh cho lhyi chank das, oen maukhi lha dangthoengh toh yvlyis doengs nhang das.

¹⁰⁷YHENSAIN eh, ngos xauh dah shanghsenh gas jyoengh gyukphoh nghuot. Nvng dangthoengh toh zis yah dvyhangteh ngos lyis toengh kat aq.

¹⁰⁸YHENSAIN eh, ngos nhaiqshoqlang sang dah shvmanh dung yvlyis lhom yoeus dyei aq. Ngos lyis nah tyingtoh dang jyauh aq,

¹⁰⁹Ngos ngah kang dyei das zis vjangh cicont nghuot, ngos nah lyi lyis ma tohnyhik.

¹¹⁰Lhung bang ngos lyis lhyik thung toh laus eq ngos gas nah tyingtoh dang lyis ma chank ma kuot.

¹¹¹Nah tyingtoh dang gas ngah dah vcaiq vto vso vlho nghuot. Houka ngah nhaiqlom mas gauslaus cho nghuot.

¹¹²Nah lyi lyis ngos shei buisnyeis jweh shoq chank das oen nghamh thyet goeus.

¹¹³Ngos gas nvng lyis dang ma jings bang lyis hoeng. Nghuot laus eq ngos gas nah lyi lyis ngwis.

¹¹⁴Nvng gas ngos lyis gos dyei soeu, khomp kat soeu nghuot. Ngos nah dangthoengh lyis nghamhloms toh.

¹¹⁵Yaunos kuot bang eh, ngah jyank masyah gang loh geh. Ngos ngah Mangso dah tyingtoh dang lyis chank das.

¹¹⁶Ngos dwis nyeis das xiklyis nvng dangthoengh toh zis yah dvyhangteh yomkat dyei aq; Ngos nghamhloms cho mha ngos lyis yom vgyau nhang.

¹¹⁷Ngos jesluiq das xiklyis ngos lyis zwi toh aq, ngos nah tyingtoh dang lyis vjangh kamp gyo das.

¹¹⁸Nvng nah lyi ma chank bang khanghmuh lyis phe tyamp: nyamoq mhuihzo mes cho ka vkyuh ma bos.

¹¹⁹Nvng lhung bang dvnganh lyis mhotkhyot teh kuot. Housoeh las ngos nvng shet toh cho lhyi ngwis.

¹²⁰Nah gvng mas ngos gyuk nyeis. Ngos nah soetuon cho gvng mas gyuk cho yah dyingh joq.

¹²¹Ngos jus cho yahge gis cho kuot goeus. Ngos lyis ngah jeswus jens mas vdoeuh tyamp toh.

¹²²Nah jyeidwis lyis pangh das oen dangthoengh toh aq; lhoq lhoq teh kuot bang yah ngos lyis ma zaiq bas jungh.

¹²³Nvng khyuot kat das ge dah dangthoengh, yahge nah khyuot yoeus cho lhyi yoeuh las ngah nyoq nyung.

¹²⁴Ngos lyis nah mathank magons jyetdap cho yah dvyhangteh kuot las nah tyingtoh dang jyauh aq.

¹²⁵Ngos nah jyeidwis nghuot; ngos nah jyauh cho seq bas jungh, ngos lyis seqgyo cho dyei aq.

¹²⁶YHENSAIN eh, haih zis nvng kuot shishenh nghuot goeus: khasoeh ge lyis dius jens gas nah lyi ma chank.

¹²⁷Ngos nah tyingtoh dang lyis xing thoq lyis zes ngwis, xet dah xing gyingh thoq lyis zes ngwis.

¹²⁸Housoeh las ngos nvng shet toh cho dvnganh lyis chank; ngos ma jus cho dvnganh lyis hoeng.

¹²⁹Nvng jyauh cho mauhphoh nghuot. Ngos hauh yvlyis ngah nhaiqlom dvnganh yah chank.

¹³⁰Nvng jyauh cho vjyuk phui zis gas seq cho ma bos bang lyis bvng zis pank dyei zis yah joeui bos los nhang.

¹³¹Ngos nah tyingtoh dang lyis omes las soqmuh dvnyhank nyeis lo.

¹³²Nvng lyis jyet bang lyis nvng kuot teh ngah jyank pheh lhain los las ngos lyis nhaiqnyen aq.

¹³³Nvng dangthoengh toh zis yah dvyhangteh ngos lyis vlains loh nhang; ngos lyis ma gis zis yah v ung tyamp nhang.

¹³⁴Ngos lyis zaiq bang masyah khyuot yoeus aq, housoeh lyis ngos nah tyingtoh dang yoh chank das.

¹³⁵Nvng jweh los las ngos lyis shvmanh zis yah nah lyi jyauh aq.

¹³⁶Dius jens nah lyi ma chank yvmvyah ngah nyoqdyeis jeislvng soeh yaus nyeis.

¹³⁷YHENSAIN eh, nvng gas dan, nah lyi eq lyi jus.

¹³⁸Nvng dyei toh dah lyi gas top nyang jus, yih eq yih.

¹³⁹Ngah jeswus jens gas nah tyingtoh dang lyis pvlhyahlyoeus kuot yvmvyah ngos nhaiqyo zis gas ngah ungkhau mha nyi soeh ngeh nyeis.

¹⁴⁰Nah dangthoengh gas wontang lha ngos hauh yvlyis kha iq ngwis.

¹⁴¹Ngos gas ma yhaugyen, dius ngis gyoh laus eq ngos nah jyauh cho lhyi ma tyamp toh.

¹⁴²Nah dan cho ka vcaiq vto goeng joq, nah lyi eq vjangh jyoeng.

¹⁴³Ngos mas yaukyenh chiqjyen zis yah dyingh joq laus eq nah tyingtoh dang gas ngos lyis gaus nhang.

¹⁴⁴Nvng shet toh cho ka vjangh lyi jus; ngos lyis seqgyo cho dyei aq, housoeh lyis ngos dwis nyeis das.

¹⁴⁵Ngos nvng lyis ngah nhaiqlom dvnganh yah lui. YHENSAIN eh, ngos lyis toeuh dyei aq; ngos nah tyingtoh dang chank das.

¹⁴⁶Ngos nah kanghjyoeng dang lyis yoh chank bas jungh, ngos nvng lyis lui nyeis, khyuot yoeus aq.

¹⁴⁷Ngos mau ma buh shih lyis toq las pangh das xiklyis lui. Ngos nah dangthoengh lyis nghamhloms.

¹⁴⁸Ngos nvng shet toh cho suon yoeuh das zis dvnyens yah soh nyeis.

¹⁴⁹Nah jyetdap cho ka mathank magons nghuot yvmvyah YHENSAIN eh, ngos lyis gyo yoeus dyei aq; nah nhaiqnyen cho chixoeuq zis yah ngah kang lhyi toengh kat aq.

¹⁵⁰Lhoeng dah dius sat bang ngah jyank ni los, nyamoq nah lyi khanhamp eq ma chank bang nghuot.

¹⁵¹Nghuot laus eq YHENSAIN eh, nvng ngos yah ni nyeis; nah tyingtoh dang dvnganh vjangh goeng joq.

¹⁵²Ngos gohlhain yah nvng shet toh cho lhyi xuq. Nvng hauh yvlyis vcaiq vto joq nhang toh.

¹⁵³Ngos nah lyi lyis ma tyamp toh yvmvyah, ngos shanghsenh yvlyis yoeuh dyei las khyuot yoeus aq.

¹⁵⁴Ngah soe lhyi khomp dyei zis yah ngos lyis lhuiq kat aq; nah dang yah dvyhangteh ngos lyis toengh kat aq.

¹⁵⁵Lhung bang gas nah lyi ma chank yvmvyah, nyamoq khyuot yoeus zis ma xauh.

¹⁵⁶YHENSAIN eh, nah nhaiqnyen shohgyo cho ka kuhxing. Nah nhaiqnyen cho chixoeuq las ngos lyis khyuot yoeus aq.

¹⁵⁷Ngos lyis shoeuhshih bang yahge ngah jeswus jens nyoshoq bos laus eq ngos nah lyi chank cho masyah ma i loh.

¹⁵⁸Dang ma jings bang nah tyingtoh dang lyis ma chank yvmvyah ngos nyamoq lyis nyvng las nhaiqnos.

¹⁵⁹YHENSAIN eh, ngos nvng shet toh cho lhyi kha iq ngwis yvlyis nghamh dyei aq. Nah jyetdap cho khanhamp eq ma thaiq loh las ngos lyis khyuot yoeus aq.

¹⁶⁰Nah lyi vgungs gas jyoeng, nah dan dah soetuon cho dvnganh gas vcaiq vto goeng joq.

¹⁶¹Yomsoq bos bang ngos lyis lyi ma jus khyvlyis zan los, nghuot laus eq ngos nah lyi lyis phauh nyang.

¹⁶²Ngos nah dangthoengh gvng mas kha iq pyo! Zisyos nyoshoq xo nyvng soeu teh pyo.

¹⁶³Ngos gas hwah cho dvnganh lyis hoeng lha choqh. Nghuot laus eq nah lyi lyis ngwis.

¹⁶⁴Nah dan dah soetuon cho gvng mas ngos nvng lyis dvnyeih lyis nyhet lhain nhaiqshoqlang chungh.

¹⁶⁵Nah lyi lyis ngwis bang gas nyenstap zainsmuh yoh. Nyamoq lyis cha yah eq ma yoh thungh lhain.

¹⁶⁶YHENSAIN eh, nvng ngos lyis los khyuot yoeus das nyhenshang langh nyeis, ngos nvng tyingtoh dang lyis chank kuot.

¹⁶⁷Ngos nvng jyauh cho lhyi chank kuot; ngos hauh yvlyis ngah ehnyet dvnganh yah ngwis.

¹⁶⁸Ngos nah tyingtoh dang yahge shet toh cho lhyi chank kuot. Nvng ngos kuot cho dvnganh yvlyis nyvng.

¹⁶⁹YHENSAIN eh, ngos pangh das cho dung zis nah jyank mas jweh bas jungh! Ngos lyis nah dangthoengh yah dvyhangteh seqgyo cho dyei aq.

¹⁷⁰Ngos dung dang gyo yoeus dyei aq, nah dangthoengh yah dvyhangteh ngos lyis lhuiq kat aq.

¹⁷¹Nvng ngos lyis nah lyi jyauh yvmvyah ngos nvng lyis vjangh chungh das.

¹⁷²Nah tyingtoh dang gas lyi jus yvmvyah, ngos nah lyi lyis chunghthwe kat das.

¹⁷³Ngos nah tyingtoh dang lyis chank yvmvyah, ngos lyis pangh das zis vjangh cicont nghuot bas jungh.

¹⁷⁴YHENSAIN eh, ngos nah khyuot yoeus cho lhyi langh nyeis. Ngos nah lyi mas pyo cho xo nyvng.

¹⁷⁵Ngos nvng lyis yoh chungh bas jungh, ngos lyis kang dyei aq. Nah dah jyauh cho ngos lyis pangh bas jungh.

¹⁷⁶Ngos gas dyuk loh yvng teh chowhang whang loh; housoeh las ngos nah jyeidwis lyis xo aq: khasoeh ge lyis ngos nah lyi lyis ma tyamp toh.