Read Achang CHUNGH 132 Bible Online

CHUNGH 132 - Achang bible

CHUNGH 132

¹YHENSAIN eh, Dawi lyis eq nyang xauh kham dah shanghsenh dvnganh lyis eq vtohnyhik dyei.

²YHENSAIN eh, nvng Yakop dah Yomzains Mangso lhyi nyang nyhen toh dah dangthoengh lyis soh dyei aq.

³Ngos yhen mha ma loh, yhetyos mas ma loh das.

⁴Ngos ma no das, yhet eq ma yhet das.

⁵YHENSAIN xiklyis joqyos, Yakop dah Yomzains Mangso xiklyis yhen ma yoh kuot dyei dvchank ma no.

⁶Ngamoq Betlehem mas Thanghchvp Kwi cho xauhgyo, ngamoq hauh yvlyis Yearim pa mha xo nyvng.

⁷Ngamoq gas, Yang YHENSAIN dah yhen pheh loh goh; Nyah hwankti tank xik mas paiq goh, oen sang.

⁸YHENSAIN eh, nah yomsoq vlho Thanghchvp Kwi yah dvgeh Yhenmuh mas los las heimha vcaiq vto nyeis aq.

⁹Nah phudyei bang vjangh yah jus zis kuot bas jungh; nah dius jens gauslaus zis yah hoeu bas jungh.

¹⁰Nvng nah jyeidwis Dawi lyis dangthoengh dyei toh; YHENSAIN eh, nvng khyen toh dah hwankti lhyi vphe toh.

¹¹Nvng Dawi lyis maukhi lha dangthoengh toh. Hauh dangthoengh nvng ma yop tyamp; nah lo jens mas dvyuk lyis hwankti kuot nhang das. Nyang nah thang mha guon das, ge.

¹²Nah lo jens ngah thanghchvp yahge ngos dyei toh dah tyingtoh dang lyis chank lyis gas nyamoq lo jens eq vjangh yah hwankti xauh kuot das.

¹³YHENSAIN ka Zion wus lyis khyen yoeus; nyang hauh wus lyis nyah yhen kuot mes.

¹⁴Haih zis gas ngos vcaiq vto nyeis mes joqyos nghuot; haih zis gas ngos guon mes joqyos nghuot.

¹⁵Ngos Zion lhyi nyang chah nyeis zis lyis magons magoh shvmanh las, nyah dah shohjyen bang lyis zonoms yah jo nhang das.

¹⁶Ngos nyah phudyei bang kuot cho dvnganh yvmas shvmanh dyei das. Nyah dius jens gas chunghthwe kat las gauslaus zis yah kaiq das.

¹⁷Heimha ngos Dawi diusjangh caiq mas hwankti zainsmuh dvyuk toh das. Ngos heimha khyen toh dah hwankti guon das xiklyis gomh shung toh.

¹⁸Nyah jeswus jens lyis xoqphuh cho dyei das. Nghuot laus eq nyah munghdan gas kuhxing jelvm las phunk bos das, ge.