Read Achang CHUNGH 135 Bible Online

CHUNGH 135 - Achang bible

CHUNGH 135

¹YHENSAIN lhyi chungh! YHENSAIN dah jyeidwis jens eh, nyah nyings lyis chungh geh.

²YHENSAIN dah yhen ge, ngamoq dah Mangso Yhenmuh mas nyeis bang eh,

³YHENSAIN ka gis yvmvyah, nyang lyis chungh geh; Nyang gas nhaiqkhyik yvmvyah nyah nyings lyis chunghthwe kat las chungh geh.

⁴YHENSAIN ka Yakop lyis nyah nyhenshang, Israel lyis nyah vso vlho khyvlyis khyen yoeus.

⁵YHENSAIN ka kuhxing, mangso jens dvnganh thoq lyis zes kuh yvlyis ngos seq.

⁶Maukhung yahge nyeisjvng mas, thomh jens yahge noq joqyos mas YHENSAIN nyang nhaiqdoeus khyvlyis kuot nyeis.

⁷Nyeisjvng vthang mhayah lyeismuh jyang muot los nhang, lyeisjyang xiklyis maunyoq nyik nhang; lyeis lyis eq nyang kat toh joqyos masyah thuq los nhang.

⁸Nyang Egutu mas dah loxeih lyis, dius eq gaunyhauq eq dvyih sat.

⁹Hwankti yahge nyah zau jens dvnganh lyis yobos dyei das zis nyang yomsoq muh yahge mauh loqmuh tsain kuot.

¹⁰Nyang gas dius nyau jens nyoshoq lyis mhont las, yomsoq bos hwankti jens lyis sat.

¹¹Houka Amori hwankti Sihon, Bashan hwankti Og yahge Khanan mas dah hwankti jens dvnganh nghuot.

¹²Nyang nyamoq dah mau nyah dius jens lyis dyei; nyang hauh mau Israel jens lyis dyei.

¹³YHENSAIN eh, nvng gas Mangso nghuot ge vjangh taiq hoeuh das; caiq khanghmuh nvng lyis soh nyeis das.

¹⁴YHENSAIN ka nyah dius jens lyis khomp toh das; nyah jyeidwis jens lyis nhaiqnyen das.

¹⁵Dius nyau jens dah mangso jens gas ngwis xing yah kuot toh; hauh zis dius loq yah dvtsain kuot toh.

¹⁶Nyamoq nhuot dap laus eq dang ma yoh jis, nyoqjeih dap laus eq ma yoh nyvng;

¹⁷No dap laus eq ma yoh xauhgyo; nyamoq soq yangh ma she.

¹⁸Hauh phvra jens kuot bang yahge nyamoq lyis loms bang dvnganh gas hau nyamoq kuot dah phvra jens teh bweh bas jungh.

¹⁹Israel dius jens eh, YHENSAIN lhyi chungh geh, Mangso dah phudyei bang eh, nyang lyis chungh geh.

²⁰Lewi yhenbang eh, YHENSAIN lhyi chungh geh; nyang lyis paiq bang dvnganh eh, nyang lyis chungh geh.

²¹Zion mha YHENSAIN lhyi chungh geh, Yerusalem wus, nyah yhen mha chungh geh. YHENSAIN lhyi chungh!