Read Achang CHUNGH 139 Bible Online

CHUNGH 139 - Achang bible

CHUNGH 139

¹YHENSAIN eh, nvng ngos lyis kyink goeus las, seq toh.

²Nvng gas ngos cha kuot zis dvnganh seq; ngos cha nghamh yvlyis nvng gas we masyah yoh nyvng dyei.

³Ngos muh zwi nyeis lah, no nyeis lah zis nvng nyvng nyeis; nvng gas ngos cha kuot zis dvnganh seq.

⁴Ngos cha ma taiq shih lyis yah yangh ngos cha taiq das yvlyis nvng seq toh.

⁵Nvng gas ngos lyis shot khanghmuh mas lhaink toh, nvng ngos lyis nah yomsoq yah gos toh dyei.

⁶Nvng ngos lyis seq dah seq cho ka ngah xiklyis sunk noq; houka nyhang lha ngos ma yoh thoq seq.

⁷Ngos nah jyank masyah khapheh yoh phang luiq das lah? Ngos nah xikkhonh masyah khalhye yoh phang das?

⁸Ngos maukhung mha doq lyis nvng houmha nyeis; ngos shei mau mas lhain toh lyis, nvng houmha nyeis.

⁹Ngos buisthuq mau thyitvp pheh dang loh, nghuot ya buiswvng pheh we thank yvmas nyeis lyis,

¹⁰houmha nvng ngos lyis choshe lha, houmha nvng ngos lyis pangh das.

¹¹Ngos mauchuotdwang lyis, Nvng ngos lyis gos dyei aq, nghuot ya ngah yvmlhaink mas dah bvng zis lyis nyenh pheh lhaiq kat dyei aq, oen ngos taiq lyis,

¹²mauchuotdwang yangh nah xiklyis ma noq lo, nyenh gas nyeih teh bvng das. Nah xiklyis mauchuotdwang yahge bvng zis gas dvyhangteh nghuot joq.

¹³Nvng ngah gungsdoeus khanghmuh lyis gvnkhanh toh; housoeh nvng ngos lyis ngah ungwes ung mha kat toh.

¹⁴Nvng gas gyukwoms phoh zis nghuot yvmvyah ngos nvng lyis chungh; nvng kuot zis dvnganh gas mauhphoh zis nghuot yvlyis ngos vlhomuh seq.

¹⁵Ngah shohyau jens lyis tsom lha ngah ungwes ung mha vlhomuh kat toh lyis ngos houmha samlo bes los, ngos houmha bos zis nvng seq.

¹⁶Ngos ma khoeu shih lyis nvng ngos lyis nyvng. Ngah xiklyis toeuq toh dyei buisnyeis xiklyis cha ma xi shih lyis yah hau dvnganh nah dah comh buk mas lhaih toh goeus.

¹⁷Mangso eh, ngos nvng nghamh cho xo nyvng das zis kha iq yau! Kha iq nyo joq lah?

¹⁸Ngos hauh yvlyis suon lhyi sihsho thoq lyis nyo das: ngos yhet soh los lyis ngos nvng yah dvgeh nghuot shih.

¹⁹Mangso eh, nvng lhung bang lyis sat das zis ngos kha iq o; thyoqzo bang ngos yah we loh bas jungh.

²⁰Nyamoq nah cho ma gis zis taiq. Nah nyings lyis tyi lha ma gis zis taiq.

²¹YHENSAIN eh, nvng lyis hoeng bang lyis ngos kha iq hoeng! Nvng lyis gomloeus toq bang lyis ngos kha iq choqh!

²²Ngos nyamoq lyis vthanklang mas hoeng; ngos nyamoq lyis ngah jeswus teh dvsuon.

²³Mangso eh, ngos lyis kyink yoeuh las ngah ehnyet seq aq; ngos lyis shi yoeuh las ngos nghamh zis lyis seq dyei nyeis aq.

²⁴Ngos mas bos dah ma gis cho lhyi xo thuq kat las ngos lyis vcaiq vto cho pheh shwih loh aq.