Read Achang CHUNGH 145 Bible Online

CHUNGH 145 - Achang bible

CHUNGH 145

¹Ngah Mangso hwankti eh, ngos nah kuhxing cho lhyi taiq hoeuh das. Ngos nah nyings lyis vcaiq caiq vto to nhaiqshoqlang sang das.

²Ngos nvng lyis nyeih yau nyeih nhaiqshoqlang sang das. Ngos nvng lyis vcaiq caiq vto to chungh das.

³YHENSAIN ka kuhxing lha, loh thank chungh mon soeu nghuot. Nyah kuhxing cho lhyi hank ma yoh thoq seqgyo.

⁴Nah muhzoh lyis dvcaiq thang lhyi dvcaiq chungh das; nyamoq gas nah yomzains muhzoh lyis taiq hoeuh das.

⁵Nyamoq gas nah phunk, nah shoenkkhyi cho taiq das, ngos eq nah mauhphoh muhzoh lyis nghamh yoeuh das.

⁶Dius jens gas nah yomzains muhzoh lyis taiq das; ngos eq nah kuhxing cho lhyi taiq hoeuh das.

⁷Nyamoq nah gis cho dvnganh lyis taiq das. Nyamoq nah shohgyo cho lhyi chunghthwe kat das.

⁸YHENSAIN ka jyetdap, nhaiqnyen, nhaiq lvnyap ma yo, mathank magons jyetdap zis yah dyingh joq.

⁹YHENSAIN ka dvnganhmoq xiklyis gis, nyang kuot toh zis dvnganh lyis nhaiqnyen shohgyo nyeis.

¹⁰YHENSAIN eh, dwis ya dwis zis dvnganh gas nvng lyis chungh das. Nah dius jens dvnganh nvng lyis nhaiqshoqlang sang das.

¹¹Nyamoq gas nah phunk yahge nah yomsoq lyis taiq das. Nah yomzains cho lhyi taiq das.

¹²Housoeh lyis nah yomzains muhzoh yahge, nyah phunk bos munghdan lyis yuk khanghmuh seq das.

¹³Nvng guon cho vcaiq caiq nghuot; nvng gas vcaiq vto Hwankti nghuot. YHENSAIN ka nyang toh dah dangthoengh lyis wontang nhang; nyang kuot cho dvnganh yvlyis nhaiqnyen nyeis.

¹⁴YHENSAIN ka yaukyenh bang lyis pangh; lains loh bang lyis eq toeutoq.

¹⁵Kang bos zis dvnganh gas nvng lyis nghamhloms zis yah yoeuh nyeis lyis, nvng gas nyamoq chah nyeis uhlyis zonoms dyei.

¹⁶Nvng nyamoq chah zis dvnganh lyis jo shoq luk shoq, duons shoq dyei.

¹⁷YHENSAIN ka nyang zwi loh cho dvnganh yvmas dan, nyang kuot zis dvnganh mas nhaiqnyen cho bos.

¹⁸YHENSAIN ka nyang lyis lui bang dvnganh yahge jyoeng cho mha nyang lyis lui bang dvnganh yah ni nyeis.

¹⁹Nyang lyis gyukwoms bang chah nyeis cho lhyi tyink dyei. Nyang nyamoq dung cho lhyi xauhgyo dyei las nyamoq lyis khyuot yoeus.

²⁰YHENSAIN ka, nyang lyis jyetdap bang dvnganh lyis gomh nyeis. Nghuot laus eq lhung bang dvnganh lyis mhont das.

²¹Ngos YHENSAIN lhyi vjangh chungh das. Dwis ya dwis zis dvnganh gas nyah gyingshang nyings lyis vcaiq caiq chungh bas jungh.