Read Achang CHUNGH 147 Bible Online

CHUNGH 147 - Achang bible

CHUNGH 147

¹YHENSAIN lhyi chungh geh! Yah Mangso lhyi chunghthwe kat das zis gis. Nyang lyis chungh das zis gas jus las pyo cho nghuot.

²YHENSAIN ka Yerusalem wus lyis doms kuot toh; nyang gas jons loh bang lyis doms shwih tauh los.

³Ehnyet dyet bang lyis gis los nhang lha, nyamoq dah dvm lyis lyet dyei.

⁴Nyang kyi khanyhoq bos chah yvlyis toeuq toh las vzoh yah suon zis yah dvnganh yvlyis nyings nyhink dyei.

⁵Ngamoq dah YHENSAIN kuhxing lha, yomzains bos; nyah joeui lhyi hank ma yoh thoq jyank.

⁶YHENSAIN ka, ehnyet nyhen mha gyoh bang lyis toeutoq; lhung bang lyis gas nyeisjvng mas dvthungh thyi tyamp.

⁷YHENSAIN lhyi chunghthwe kat las chungh geh; yah Mangso lhyi toenk yah chungh geh.

⁸Nyang maukhung mha jyommauh tyo toh, nyeisjvng xiklyis mau wus nhang zisyah jing mas mhanh tsain yuk nhang.

⁹Nyang gaunyhauq lyis nyamoq dah zonoms dyei las kvnhoq lo jens nyhap lyis tsoh.

¹⁰Mangso nhaiqdoeus cho ka yombos dah nyang mas bos zis ma nghuot. Mangso pyo cho eq womh dah jeslo mas bos zis ma nghuot.

¹¹YHENSAIN nhaiqdoeus zis gas, nyang lyis nyoqnho ngelang dyei bang, nyah mathank magons jyetdap cho lhyi loms bang lyis dvnghuot.

¹²Yerusalem eh, YHENSAIN lhyi chungh aq: Zion wus eh, nah Mangso lhyi chungh aq.

¹³Nyang nah khyam khomh lyis goeng nhang, nah dius jens lyis shvmanh dyei.

¹⁴Nyang nah maukyo lhyi gau nhang, nvng lyis eq gis thank gukzos yah jo nhang.

¹⁵Nyang nyeisjvng lyis taiq kat lyis nyang taiq zis lvnyap bweh los.

¹⁶Nyang gas gyu lyis mis teh nyhoeuh las, jyweh lyis tsohmop teh lhank kat.

¹⁷Nyang gyuchen lhyi lukshaq teh sanh kat, nyang nhang kat dah jyamh yvlyis hank eq ma yoh kham.

¹⁸Nyang zau dang doms khyoq lyis hauh nghan ka yaus tyamp. Nyang lyeis los nhang lha jeis yaus loh.

¹⁹Nyang nyah dius jens lyis loeus kyoh kat, Israel xiklyis nyah lyi yahge nyang taiq shet cho nghuot.

²⁰Nyang haih zis gohnyau bang lyis ma kuot dyei, nyamoq gas nyah lyi lyis ma seq. YHENSAIN lhyi chungh geh!