Read Achang CHUNGH 148 Bible Online

CHUNGH 148 - Achang bible

CHUNGH 148

¹YHENSAIN lhyi chungh geh! Nyhang thank thoq mas nyeis bang eh, YHENSAIN lhyi maukhung mhayah chungh geh.

²Nyah loeuswons bang dvnganh, maukhung jesphung jens dvnganh nyang lyis chungh geh.

³Buislom Lhamhmuh eh, nyang lyis chungh geh; bvng dah kyi jens eh, nyang lyis chungh geh.

⁴Nyhang thank maukhung jens eh, maukhung nyhang mha dah jeis jens eh, nyang lyis chungh geh.

⁵Nyamoq dvnganhmoq YHENSAIN nyings lyis chungh bas jungh. Nyang zaudang khyoq lyis hauh zis dvnganh gvnkhanh toh goeus.

⁶Nyah vmingh yah hauh vyhang jens gas nyah joqyos mas vcaiq vto joq goeus. Nyamoq domsyos ma gyo ma yoh kuot.

⁷Thomh mas mvnjung jens yahge noq dah nvmukdra jens nyeisjvng masyah YHENSAIN lhyi chungh geh.

⁸Maunyoq, gyutomp, gyu yahge jyommauh, nyah vmingh lyis gyo dah lyeis than, YHENSAIN lhyi chungh geh.

⁹Boms jens jing jens, shihzains yahge saiq khyam jens dvnganh;

¹⁰yewus yahge gaunyhauq, shweh loh ja yahge maudang nghoq dvnganh, nyang lyis chungh geh.

¹¹Hwankti jens yahge dius jens dvnganh, zau jens yahge gohtoeu guon bang dvnganh;

¹²loloeu lonyi jens, lokhoq jens yahge loshang jens YHENSAIN lhyi chungh geh.

¹³Dvnganhmoq YHENSAIN nyings lyis chungh bas jungh; Nyah nyings gas gohtoeu dvnganh thoq lyis zes kuhxing joq. Nyah phunk gas maukhung nyeisjvng thoq lyis zes.

¹⁴Nyang nyah dius nyau jens lyis yombos nhang, housoeh las nyah dius jens dvnganh nyang lyis chungh. Israel dius jens nyang lyis jyet. YHENSAIN lhyi chungh!