Read Achang CHUNGH 17 Bible Online

CHUNGH 17 - Achang bible

CHUNGH 17

¹YHENSAIN eh, lyi bos khyvlyis kuot dyei das xiklyis dung dah dang lyis gyo dyei aq, ngos kaiq dang lyis gyo dyei aq. Mhuih dah nhuotkuk yah ma nghuot, ngah shvmanh dung dang lyis gyo dyei aq.

²Nvng gas jus cho cha nghuot zis seq yvmvyah ngah shot pheh soetuon dyei aq.

³Nvng ngah nhaiqlom lyis seq. Nyenh lyis nvng ngah jyank mas los las ngos lyis dvnganh shi yoeuh lyis, ngos mas ma gis dah omes cho cha ma bos yvlyis nvng nyvng.

⁴Ngos gohyhamh bang teh ma gis zis cha ma taiq. Ngos nah tying dang lyis domsyos gyo. Lhuot zo bang dah cho lhyi jhank nyeis.

⁵Ngos vjangh nah cho chank suh nyeis. Ngos chowhang ma whang loh.

⁶Mangso eh, nvng ngos lyis toeuh dyei das yvmvyah, ngos nvng lyis dung nyeis. Nah no ngah jyank pheh xoeu lha ngah dang gyo dyei aq.

⁷Nah mauhphoh jyetdap cho chixoeuq las nvng ngos lyis khyuot yoeus aq; nah shot pheh ngos ngah jeswus masyah luiq.

⁸Ngos lyis nah nyoqlom lyis teh gomh dyei aq. Ngos lyis nah dungs buisshen mha tamh nhang aq.

⁹Houka lhung bang zan los masyah eq, ngos lyis lhaink toh dah ngah jeswus jens masyah eq nghuot.

¹⁰Nyamoq gas nhaiqnyen cho ma bos, lhoq lhoq teh tsain moengs.

¹¹Gvshih nyamoq gas ngos khalhye loh khalhye ngah yvmlhaink mas nyeis, ngos lyis lang khyoq das ge yoeuh nyeis.

¹²Nyamoq gas khangkhyi teh ngos lyis langchingh tyamp mes las lhom nyeis.

¹³YHENSAIN eh, los aq, ngah jeswus jens lyis zan las ung tyamp dyei aq. Lhung soeu mhayah ngos lyis nah moengsa yah khyuot kat aq.

¹⁴YHENSAIN eh, dius jens yahge mungkvn mas dah gvmboms yoh bang masyah ngos lyis lhuiq yoeus aq. Nvng nyamoq xiklyis sont toh khyvlyis yobos dyei aq. Nyamoq lo jens xiklyis luk shoq tham shoq yoh bas jungh, nyei nyet jens xiklyis eq nyet shih bas jungh.

¹⁵Ngos gas dan cho mha nah nyoqnho lhyi xauh nyvng das. Ngos yhet soh los uhlyis nah gungsdom lyis nyvng lho lhyi nhaiqtap das.