Read Achang CHUNGH 18 Bible Online

CHUNGH 18 - Achang bible

CHUNGH 18

¹Ngah yom nghuot dah YHENSAIN eh, ngos nvng lyis jyetdap.

²YHENSAIN ka ngah luk-uk, ngah thoenkgus jesdvp, ngos lyis lhuiq kat soeu nghuot; ngah Mangso ka ngah luk-uk, nyang lyis ngos khau nges toh. Nyang gas ngos lyis gos yhangteh gomh toh, ngos lyis luiq shoq gos las gomh toh.

³Chungh mon dah YHENSAIN lhyi ngos lui las, ngos lyis ngah jeswus loq masyah khyuot yoeus. YHENSAIN lhyi chungh.

⁴Shei cho dah gudwvng zis gas ngos lyis lhaink toh las, dyoqbis cho ka jeisphauq teh ngos lyis nghop toh.

⁵Shei cho dah gudwvng zis gas ngos lyis lhaink toh, ngah xikkhonh mas shei dah lhyik thung toh.

⁶Chiqjyen yvmas ngos YHENSAIN lhyi lui las ngos lyis pangh das xiklyis ngah Mangso lhyi kaiq sang. Nyang ngah thwe lhyi nyah yhenmuh masyah xauhgyo las, ngos kaiq sang dang nyah no mas wvng goeus.

⁷Hauh uhlyis maunyeis dwis las nvn nyeis. Boms dah vpom vyang eq nonh nyeis: Nyang nhaiqyo yvmvyah hauh zis nvn nyeis.

⁸Nyah nho mhayah nyikhauh thuq las, nyah nhuot masyah ngeh jom nyilhyam yahge nyigywe ngeh nyeis.

⁹Hauh uhlyis nyang gas maukhung phank las gyoh los; jyommauh noq gas nyah khyei o mha tsain joq.

¹⁰Nyang Kherubim mas ji las dang, lyeis yah dang.

¹¹Nyang lyis chuot zis yah gos nhang toh. Jeis noq yahge maukhung mha dah jyommauh puk gas nyang lyis zvng teh yvmlhaink toh.

¹²Nyah xik mas bvng zis yahge nyah jyommauh puk masyah gyutomp eq nyijyenh eq zvn nyeis.

¹³Hauh uhlyis YHENSAIN ka maukhung mhayah maujau jau kat. Nyhang Thank Soeu ka nyah thwe nyhink kat.

¹⁴Nyang jeswus lyis nyo baiq zis yah khat sanh; Maunyoq nyoshoq nyik kat zis yah nyamoq lyis phang nhang.

¹⁵YHENSAIN eh, nvng nhant dang yahge nah nho mhayah she dah soq gas jeismuh khyoh nyvng los, nyeisjvng vpom vyang eq thuq los.

¹⁶Nyang nyhang masyah ngos lyis duons zwi toh; ngos lyis jeisnyaus thomh masyah siq yoeus.

¹⁷Yombos dah ngah jeswus yahge ngah xiklyis yom sunk bos las ngos lyis hoeng bang dvnganh masyah nyang ngos lyis lhuiq kat:

¹⁸Shanghsenh buisnyeis lyis nyamoq ngos lyis zan los laus eq YHENSAIN ka ngos lyis thuk soeu nghuot.

¹⁹Nyang ngos lyis chiqjyen masyah pangh thuq kat, nyang ngos lyis nhaiqdoeus nyeis yvmvyah ngos lyis khyuot yoeus.

²⁰YHENSAIN ka ngos dan khyvlyis kuot las nyang ngos lyis phauh shangh. Ngos yobos ma bos yvmvyah nyang ngos lyis shvmanh dyei.

²¹Ngos YHENSAIN dah cho chank kuot, ngah Mangso jyank mhayah tauh las ma gis zis ma kuot.

²²Nyah lyi dvnganh ngah xikkhonh mas joq las, ngos nyah lyi thungh lyis ma tyamp.

²³Ngos nyah xikkhonh mas yobos huon chank ma bos, yaunos lyis jhank nyeis.

²⁴YHENSAIN ka ngos dan zis yah dvyhangteh ngos lyis phauh shangh, nyah nyoqlvtjvng mas ngah loq lhoqshang.

²⁵Lomluk soeu lhyi nvng lomluk cho chixoeuq. Yobos huon chank ma bos soeu lhyi nvng yobos ma bos cho chixoeuq.

²⁶Gyingshang soeu lhyi gyingshang ehnyet, nhaiqlom guih soeu lhyi tyi dah ehnyet chixoeuq.

²⁷Nvng ehnyet nyhen mha gyoh bang lyis khyuot yoeus las khwank bang lyis khyoq tyamp.

²⁸YHENSAIN eh, nvng ngah nyibung lyis tuonh toh dyei. Ngah Mangso ka ngah mauchuotdwang lyis pank dyei.

²⁹Nvng pangh zis yah ngos ngah jeswus phung lhyi yoh ung, ngos ngah Mangso yomsoq gvng mas gos toh cho lhyi yoh lhyweq.

³⁰Mangso kuot khyvlyis nyah cho ka dyinghjet. YHENSAIN dah dangthoengh kyink lyis jus. Nyang gas nyang lyis khau nges bang dvnganh dah gos nghuot.

³¹YHENSAIN mha lai las Mangso hank bos lah? Yah Mangso mha lai las khaugus Luk-uk hank nghuot lah?

³²Nyang gas ngos lyis yom bos nhang dah Mangso nghuot las ngah cho lhyi dyinghjet nhang.

³³Nyang ngah khyei lyis cvt khyei teh kuot las, ngos lyis nyhang joqyos mas yap nhang.

³⁴Nyang ngah loq lyis jes muh xik dyei las, ngah loqyom thunk lyei yoh thung.

³⁵Nvng ngos lyis gomh zis yah khyuot yoeus. Nah loqyos loq ngos lyis thukxank las, ngos kuhxing los shoq pangh kat.

³⁶Nvng ngos loh cho lhyi jyeq kat dyei las ngah khyei ma jyot loh.

³⁷Ngos jeswus lyis chank khat las duons. Nyamoq ma dyoqbis dvchank ngos ma tauh los.

³⁸Ngos nyamoq lyis zan khyoq las nyamoq ma yoh toq lo. Nyamoq ngah khyei o mha lains loh.

³⁹Nvng ngos lyis moengzan das zis yombos nhang lha, ngos lyis tyixo toq los bang lyis, ngah khyeiyang mas gyoh nhang.

⁴⁰Nvng ngah jeswus lyis nungs phuk phang nhang lha, ngos lyis hoeng bang lyis mhont tyamp.

⁴¹Nyamoq lyis pangh das xiklyis kaiq laus eq nyamoq lyis khyuot yoeus soeu hank ma bos, YHENSAIN lhyi lui laus eq nyang nyamoq lyis ma toeuh dyei.

⁴²Ngos nyamoq lyis lyeis yah muot tangh dah phvlhau teh mhont las, talhoeu mha thomhbop teh nang nheh toh.

⁴³Dius jens zan goh yvmvyah nvng ngos lyis lhuiq las, dius nyau jens dah uhloms duot nhang. Ngos ma seq dah dius jens ngos lyis phuqsoe los.

⁴⁴Nyamoq ngah cho xauhgyo yah dvyih ngah domsyos gyo las gohnyau bang ngah xikkhonh mas dupaiq.

⁴⁵Gohmau bang nhaiqlom thank las, nyamoq tamh joqyos masyah gyuk nvn thuq los.

⁴⁶YHENSAIN nyang nyeis! Ngah Luk-uk ngelhoq bas jungh. Ngah khyuot yoeus Mangso chunghtoq zis xauh bas jungh.

⁴⁷Nyang gas ngah xiklyis lvto phuk dyei las dius nyau jens lyis ngah o mha khyoq dah Mangso nghuot.

⁴⁸Nyang ngos lyis ngah jeswus masyah khyuot las, ngos lyis tyi lha toq los bang thoq mas chunghtoq toh. Lhuotzo bang masyah lhuiq kat.

⁴⁹Housoeh las YHENSAIN eh, dius nyau jens mas ngos nvng lyis nhaiqshoqlang oen, nah nyings lyis chungh dah chunghthwe kat das.

⁵⁰Nyang nyah hwankti lhyi ung cho zainsmuh dyei. Nyah coeu juot xauh soeu ge Dawi yahge nyah vyau vshih lyis nhaiqnyen cho vcaiq vto chixoeuq.