Read Achang CHUNGH 19 Bible Online

CHUNGH 19 - Achang bible

CHUNGH 19

¹Maukhung ka Mangso dah phunk lyis kyoh. Maunyaus zoh gas nyah loqmuh lyis dede chixoeuq nyeis.

²Dvnyeih dvnyeih dang taiq hoeuh las, dvnyens dvnyens seq cho phank xoeuq nyeis.

³Dang taiq zis ma bos, nyingh eq ma bos, hauh thwe ma xauhgyo laus eq

⁴nyamoq dah thwe ka mungkvn gonh nyings las, nyamoq dah dang gas nyeisjvng goms shoq jweh goeus. Nyang houmha buislom xiklyis zvng dvkoeuq kuot toh.

⁵Hauh zis gas, nyah yvp masyah thuq los dah loloeu saiq yahge wuih khyank goh das loyangh teh goh thuq los.

⁶Nyah cho ka maukhung dvthang mhayah thuq los las gohtoeu dvthang jweh shoq lhain nyeis las: hau buis gywes mhayah yoh luiq zis cha ma bos.

⁷YHENSAIN dah lyi gas dyinghjet las, ehnyet yombos los. YHENSAIN dah kanghjyoeng dang gas jyoeng lha nhaiq ma bos bang lyis joeui bos nhang.

⁸YHENSAIN dah lyi thungh gas zungh las, nhaiqlom lyis gauslaus nhang. YHENSAIN tyingtoh dang gas gyingh las ehnyet phank dyei zis yah seqgyo nhang.

⁹YHENSAIN lhyi gyukwoms cho gyingh las vcaiq vto joq. YHENSAIN dah soetuon cho ka jus las dan joq.

¹⁰Hauh zis gas xing yahge xing gyingh thoq lyis zes phauhdap, dyoyhei yahge dyotvp thoq lyis zes chau.

¹¹Hauh zis gas ngos nah jyeidwis lyis seq cho dyei. Ngos hauh yvlyis chank kuot yvmvyah, phauh shangh zainsmuh yoh.

¹²Vsainnyang shuot cho vsainnyang hank yoh nyvng lah? Ma nyvng dah yobos masyah ngos lyis lhuiq dyei aq.

¹³Pa-i kuot dah yaunos eq lhuiq dyei aq, hauh zis ngos lyis ma nghop bas jungh: Ma gis dah yaunos masyah luiq nhang aq, housoeh lyis ngos dyinghjet das.

¹⁴Ngah khaugus, ngah khyuot yoeus soeu YHENSAIN eh, ngah nhuot mas dang yahge, ngah ehnyet mas nghamh cho ka, nah nyoqlvtjvng mas nhaiqdoeus zis bweh bas jungh.