Read Achang CHUNGH 21 Bible Online

CHUNGH 21 - Achang bible

CHUNGH 21

¹Toenk uhjyung xiklyis Dawi lvkhyank dvyang YHENSAIN eh, nvng hwankti lhyi yombos nhang lha nyang gaus nyeis; nvng nyang lyis ung cho kuot dyei las nyang gauslaus nyeis!

²Nvng, nyang lyis nyah ehnyet omes zis dyei goeus, nyang dung cho lhyi ma he tyamp. (Selah)

³Nvng, nyang lyis gis dah shvmanh yah zes yoeus las nyah uhloms mas xing gyingh buismuk tsungh dyei.

⁴Nyang kang dung las nvng, nyang lyis kang xing cho dyei toh.

⁵Nvng pangh yvmvyah nyah phunk kuhxing joq; nvng nyang lyis nyings hoeuh cho yahge phunk nyoqnho ngelang dyei toh.

⁶Nvng gas nyang lyis vcaiq vto ngelhoq nhang lha, nvng nyeis zis sohseq zis yah gaus nhang.

⁷Hwankti ka Maukhung Jesphung YHENSAIN lhyi loms; Nyhang Thank Soeu dah mathank magons jyetdap gvng mas nyang ma lop ma loeh das.

⁸Hwankti ka nyah jeswus dvnganh lyis nyhik das; nyang lyis hoeng bang lyis nyah loqyos loq yah nyhik das.

⁹Nvng thuq los uhlyis nvng nyamoq lyis ngeh dah nyi teh mhont das: YHENSAIN ka nyah nhaiqyo yvmas nyamoq lyis nyhau tyamp das; nyi eq nyamoq lyis ngeh jom das.

¹⁰Nvng nyeisjvng thoq masyah nyamoq mas yaus lyih bang lyis mhont das; cangsoeu lo jens masyah nyamoq dah vnyau vshih lyis mhont das.

¹¹Nyamoq gas nvng yah tyi dah lhung cho kuot mes las khaujeini laus eq ma ung das.

¹²Nvng nah lyei thung lha nyamoq lyis nyo yah baiq lyis nyamoq nungs phuk las phang loh das.

¹³YHENSAIN eh, nah yom lyis chunghtoq zis xauh bas jungh; ngamoq nah yomsoq lyis chunghthwe kat las chungh das.