Read Achang CHUNGH 22 Bible Online

CHUNGH 22 - Achang bible

CHUNGH 22

¹Ngah Mangso eh, ngah Mangso eh, nvng ngos lyis chamus doeuh tyamp toh lah? Ngos noskyingh zis yah pangh das nyhenshang kaiq sang laus eq houka ma jweh los shih.

²Ngah Mangso eh, nyeih lyis ngos kaiq laus eq nvng ma gyo dyei; nyenh lyis kaiq laus eq ngos nyenstap cho ma yoh.

³Nvng gas Israel jens chungh yvmas nyeis, hwankti Gyingshang Soeu nghuot.

⁴Ngamoq dah phauh thyeih moq nvng lyis loms. Nyamoq loms las nvng nyamoq lyis khyuot yoeus.

⁵Nyamoq nvng lyis lui las jesshoh masyah luiq. Nvng lyis loms las yom ma gyau.

⁶Ngos gas dius ma nghuot, tungde dvnghuot las yuk khanghmuh yah jwangh, choqh.

⁷Ngos lyis nyvng ya nyvng bang nyhap las, maphauh madanh nhuot yhont, lainkamh nocwih las taiq zis gas,

⁸Nyang gas YHENSAIN lhyi loms las Mangso nyang lyis khyuot yoeus bas jungh, YHENSAIN ka nyang lyis nhaiqdoeus yvmvyah nyang lyis khyuot kat bas jungh, tsain ge.

⁹Nghuot laus eq nvng gas ngos lyis ung masyah shwih thuq soeu nghuot. Ngos ngah ungwes sainhkhonh mas dvnghuot shih lyis yah nvng ngos lyis gomh dyei.

¹⁰Ngos gas khoeu los lyis yah nah loq mas nghuot. Ngah ungwes ung masyah nvng ngah Mangso nghuot.

¹¹Chiqjyen zis gas ni los las, pangh das soeu hank ma bos yvmvyah ngos yah we we vnyeis.

¹²Jeswus jens nyoshoq ngos lyis noeulu jens teh lhaink las, nyamoq ngah vyvm vwi mas Bashan mha dah gyukphoh noeuphuk jens teh lhaink toh.

¹³Ngat das ge nyings dah khangkhyi teh nyamoq ngos lyis nhuot tsain haq toh.

¹⁴Ngah yom gas jeis huot tyamp teh thank goeus, yaunyoq dvnganh lhaiq tyamp, Ngah ehnyet dyomanh yaus teh nghuot tyamp goeus.

¹⁵Ngah yom gas auhkhyamh teh kyuk las lhyo eq am mha dap goeus. Nvng ngos lyis shei dah tsoh mas toh.

¹⁶Ma gis dah dius phung jens ngos lyis lhaink toh. Nyamoq Khuih lamh jens[4] teh chomp las ngah khyei ngah loq lyis eq tsain ngat cwe.

¹⁷Ngos ngah shohyau dvnganh lyis yoh suon. Nyamoq ngos lyis nhaiq shei zis yah yoeuh tsuk toh.

¹⁸Nyamoq ngah dyi gvmgoh. Ngah dyi lyis doeugoh.

¹⁹YHENSAIN eh, nvng gas ngos yah vwe loh. Ngah yom eh, nvng ngos lyis lvnyap los pangh aq.

²⁰Ngah kang lhyi sham mhayah, ngah phauhdap kang lhyi lvkhuih yomsoq masyah khyuot kat aq.

²¹Ngos lyis khangkhyi dah nhuot masyah, noeuphuk khyau mhayah khyuot yoeus aq.

²²Ngos nvng kuot goeus cho lhyi ngah boekyis lyis kyoh das. Moqhuom mha ngos nvng lyis chungh das.

²³YHENSAIN dah jyeidwis jens eh, nyang lyis chungh geh; Yakop vshih dvnganh eh, nyah nyoqnho ngelang lyis chungh geh; Israel dius jens eh, nyang lyis paiq geh.

²⁴Nyang shohjyen bang lyis ma tyamp, nghuot ya nyamoq yaukyenh cho lhyi, ma doeuh tyamp toh; nyamoq masyah ma tauh loh. Pangh das xiklyis dung lyis nyang xauhgyo dyei.

²⁵Moqhuom zainsmuh mas nvng ngos lyis kuot dyei goeus cho chungh das. Nvng lyis paiq bang dah xikkhonh mas ngos nvng lyis chungh das, ngos nyhen toh lomhxangh lyis lainh das.

²⁶Nyungs bang jo shoq xauh zo das, YHENSAIN lhyi xo bang nyang lyis tsain chungh das. Nyamoq nhaiqlom vjangh yombos joq bas jungh.

²⁷Dius nyau dvnganh YHENSAIN lhyi soh das. Mungkvn goms shoq bang nyah jyank pheh lhain los das. Dius nyau jens dvnganh nyang lyis paiq das.

²⁸YHENSAIN ka hwankti nghuot las, nyang dius nyau jens lyis guon nyeis.

²⁹Khwank bang dvnganh nyang lyis dupaiq das. Daq shei loh bang dvnganh eq, nyah xikkhonh mas dupaiq das.

³⁰Jweh los das dius caiq eq nyang lyis phuqsoe das. Jweh los thang caiq mas eq dius jens YHENSAIN dah cho nyamoq lyis taiq hoeuh das.

³¹YHENSAIN ka nyah dius jens lyis khyuot yoeus cho, ma khoeu los shih bang lyis eq xauh taiq kyoh das.