Read Achang CHUNGH 25 Bible Online

CHUNGH 25 - Achang bible

CHUNGH 25

¹YHENSAIN eh, ngos nvng lyis chungh.

²Ngah Mangso eh, ngos nvng lyis loms: ngos lyis xoq vphuh nhang, Ngah jeswus jens ngos lyis v-ung nhang.

³Nghuot goeus, nvng lyis nghamhloms bang xoq hank ma phuh. Soe ma bos lyi lhyweq bang xoq dvphuh bas jungh.

⁴YHENSAIN eh, nah cho ngos lyis chixoeuq aq, nah cho ngos lyis jyauh aq.

⁵Ngos lyis khyuot yoeus Mangso nvng nghuot yvmvyah, ngos lyis nah jyoeng cho mha shwih las jyauh aq. Dvnyeih gonh ngos nvng lyis nghamhloms nyeis.

⁶YHENSAIN eh, nah nhaiqnyen shohgyo zis yahge jyetdap sainhnos zis soh aq: houka gohlhain mhayah nghuot joq.

⁷Ngah loyvm yoq lyis dah yaunos yahge ngos lyi lhyweq cho cha lhyi eq vcomh toh dyei. YHENSAIN eh, gis las nah nhaiqnyen shohgyo cho gvng mas ngos lyis soh dyei aq.

⁸YHENSAIN ka gis las zungh. Housoeh yvmvyah nyang gas haih cho mha yaunos dap bang lyis jyauh.

⁹Nyang gas ehnyet nyhen mha gyoh bang lyis lyi jus yvpheh shwih las nyamoq lyis nyah cho jyauh.

¹⁰YHENSAIN dah thanghchvp kanghjyoeng dang chank bang lyis, nyah cho dvnganh gas nhaiqnyen zis yahge jyoeng.

¹¹YHENSAIN eh, nah nyings gvng mas ngah dah lyi ma chi cho lhyi khyuot dyei aq: khasoeh ge lyis houka kuhxing joq.

¹²YHENSAIN lhyi gyukwoms soeu ka hank nghuot lah? Nyang khyen yoeus chah cho lhyi nyang tuonhshet das.

¹³Nyang nyeisgis yaplhoq das las, nyah vnyau eq hau nyeisjvng lyis xauh sain das.

¹⁴YHENSAIN dah nghop toh cho ka nyang lyis gyukwoms bang yah dvgeh nghuot. Nyang nyamoq lyis nyah thanghchvp chixoeuq das.

¹⁵YHENSAIN ka ngah khyei lhyi lhyik masyah she thuq dyei las ngah nyoqjeih nyang lyis vjangh yoeuh nyeis.

¹⁶Ngos gas dvyuk kyingh shohjyen nyeis yvmvyah, ngah jyank pheh xoeu lha ngos lyis nhaiqnyen aq.

¹⁷Ngah ehnyet chiqjyen zis nyo las, nvng ngos lyis ngah shanghsenh masyah she yoeus aq.

¹⁸Ngah yaukyenh cho yahge ehnyet nyung cho lhyi yoeuh dyei aq. Ngah yaunos dvnganh khyuot dyei aq.

¹⁹Ngah jeswus tsain nyo las nyamoq lyis nghamh yoeuh dyei aq. Nyamoq ngos lyis phot phot tsoeu lha hoeng nyeis.

²⁰Ngah dyos lyis zungh dyei las ngos lyis khyuot yoeus aq. Ngos nvng lyis loms yvmvyah xoq vphuh nhang.

²¹Ngah dah nghamhloms cho ka nvng mas bos yvmvyah, ngah dah ehnyet zungh cho yahge dan cho ka ngos lyis gomh bas jungh.

²²Mangso eh, Israel lyis nyah chiqjyen dvnganh masyah khyuot yoeus aq.