Read Achang CHUNGH 28 Bible Online

CHUNGH 28 - Achang bible

CHUNGH 28

¹Ngos khaugus nghuot dah YHENSAIN eh, ngos nvng lyis lui nyeis; ngos kaiq thwe jenh gyo dyei aq. Nvng ngos lyis ma toeuh dyei lyis, ngos gas shei mau mas gyoh bang teh mus das.

²Ngah loq nah Gyingshang Yhenmuh lyis tuonh las ngos nvng lyis jenh pangh aq oen lui lyis, ngos dung thwe lhyi gyo yoeus dyei aq.

³Ma gis zis kuot dah lhung bang, nyamoq dang gas buisnoms teh taiq laus eq nyamoq nhaiqlom gas hoeng cho bos; housoeh ngos lyis lhung bang yah dvgeh yobos vdyei.

⁴Nyamoq ma gis muhzoh yahge nyamoq kuot khyvlyis nyamoq lyis yobos dyei aq. Nyamoq ma gis cho yobos kuot goeus. Nyamoq kuot dah yobos yah mon khyvlyis nyamoq lyis yobos dyei aq.

⁵YHENSAIN dah muhzoh yahge nyang kuot goeus dah muh lyis pvlhyahlyoeus kuot yvmvyah, nyang nyamoq lyis yobos dyei las vcaiq vto mhont tyamp das.

⁶YHENSAIN ka ngos dung dang gyo dyei yvmvyah ngelhoq bas jungh.

⁷YHENSAIN ka ngah yom yahge gos nghuot; Nyang ngos lyis pangh las ngos nyang lyis loms; ngos lyis gauslaus nhang. Gauslaus dah Chunghthwe yah ngos nyang lyis chungh das.

⁸YHENSAIN ka nyah dius jens lyis gos toh dyei. Nyang khyen toh dah hwankti lyis gos dyei, khyuot yoeus.

⁹YHENSAIN eh, nah dius nyau lyis khyuot yoeus aq. Nah vso lhyi shvmanh dyei aq. Vjangh nyamoq lyis nyhoeu tsoh las shwih gomh dyei aq.