Read Achang CHUNGH 31 Bible Online

CHUNGH 31 - Achang bible

CHUNGH 31

¹YHENSAIN eh, nvng ngos lyis gomh dyei das nyhenshang, ngos nah jyank mas los; ngos lyis khanhamp eq vsomh loh nhang; Nvng gas dan dah Mangso nghuot las ngos lyis jenh khyuot yoeus aq, oen dung.

²Ngos dung dang gyo dyei las ngos lyis gvshih jenh khyuot yoeus aq. Ngah khaugus duot las ngos lyis gos toh dyei aq. Ngah Jesdvp duot las ngos lyis khyuot yoeus aq.

³Nvng gas ngah khaugus yahge thoenkgus jesdvp nghuot. Nvng ngos lyis dangthoengh toh zis yah dvyhangteh ngos lyis cho shwih she dyei aq.

⁴Nvng gas ngah khaugus nghuot. Ngos lyis nyamoq thung dah lhyik masyah lhuiq kat aq.

⁵Ngos gas nvng gomh toh yvmas nyeis; YHENSAIN eh, nvng gas wontang dah Mangso nghuot las, ngos lyis khyuot yoeus das.

⁶Nvng gas ma jus mangso jens lyis paiq bang lyis hoeng. Ngos gas YHENSAIN lhyi dvloms.

⁷Nah mathank magons jyetdap cho gvng mas ngos gaus das, gauslaus das. Ngos khamzo cho lhyi nvng nyvng; ngos yau cho lhyi nvng seq.

⁸Nvng ngah jeswus ngos lyis ma nyhik nhang. Nvng ngos lyis loh mes yvmas loh nhang.

⁹YHENSAIN eh, ngos yau nyeis yvmvyah ngos lyis nhaiqnyen aq; ngos nyo ngaus las ngah nyoqjeih nyung goeus; ngos nyungdaus nyeis.

¹⁰Ngos kuk zis yah nyungdaus nyeis, ngaus cho ka ngah kang lhyi lyung loh nhang. Ngos yau cho bos gvng mas yomnhuk loh. Ngah shohyau yangh yom loh.

¹¹Ngos gas ngah jeswus jens, zes las ngah yhenkyoh jens dah nyhap joqyos duot las, ngos yah seqgoh bang ngos lyis gyuk: nghe pheh nyamoq ngos lyis nyvng lyis tsain phang loh.

¹²Ngos gas shei soeu lhyi teh, tohnyhik zis xauh, ngos gas gwi dah yamjvp teh nghuot.

¹³Nyoshoqmoq loeusmus zis lyis ngos xauhgyo las, gyukphoh zis gas yvmlhaink yah nghuot joq: nyamoq ngah cho xamgoh las ngah kang yoeus tyamp das zis joeui da.

¹⁴Nghuot laus eq YHENSAIN eh, ngos gas nvng lyis loms: Nvng ngah Mangso nghuot.

¹⁵Ngos gas vjangh yah nvng gomh toh yvmas nyeis. Ngah jeswus jens yahge ngos lyis shoeuhshih bang dah loq masyah khyuot kat aq.

¹⁶Nah jyeidwis thoq mas nah nyoqnho bvng joq bas jungh, nah mathank magons jyetdap cho mha khyuot yoeus toh aq.

¹⁷YHENSAIN eh, ngos nvng lyis lui; ngos lyis xoq vphuh nhang. Lhung bang lyis xoqphuh nhang aq; nyamoq lyis shei mau mas samlo gyoh loh nhang aq.

¹⁸Khwank las lhoq lhoq teh, dan bang lyis dius ngis khyoq las hwah bang gas samlo nyeis bas jungh.

¹⁹Nvng lyis phauh nyang bang xiklyis nvng gomh toh dyei dah vyhang gis gas kha iq mauhphoh nghuot lah! Yuk khanghmuh nvng kha iq gis zis seq. Nvng lyis loms bang lyis kha iq gau shoq gos toh dyei!

²⁰Nvng nyamoq lyis dius jens dah khaujeini masyah, nah xikkhonh gau joqyos mas shung toh; nvng nyamoq lyis nyamoq dah jeswus ma phauh gis kuot masyah nah dah gau joqyos mas shung toh.

²¹Ngos lyis lhaink las zan zis xauh uhlyis nyang ngos lyis kha iq mauhphoh jyetdap cho chixoeuq! YHENSAIN ka ngelhoq bas jungh:

²²Ngos gas, nyang ngos lyis nyah xikkhonh masyah khat tyamp goeus oen nghamh gyuk nyeis. Nghuot laus eq ngos nyang lyis pangh cho dung lyis nyang ngos dung dang gyo yoeus dyei.

²³YHENSAIN dah lomluk bang eh, nyang lyis jyetdap geh: YHENSAIN ka lomluk bang lyis gomh nyeis: khwank soeu lhyi ka mon yih nyhoq yobos dyei.

²⁴YHENSAIN lhyi nghamhloms nyeis bang dvnganhmoq eh, yombos geh, womh womh kuot geh.