Read Achang CHUNGH 33 Bible Online

CHUNGH 33 - Achang bible

CHUNGH 33

¹Dan bang eh, YHENSAIN lhyi gaus gaus yis yis chungh geh. Ehnyet zungh bang nyang lyis chungh das zis phi.

²Toenk bat las YHENSAIN dah jyehjuh lyis chungh geh, Twih bos dah toenk khvlhank yah nyang lyis chunghthwe kat geh.

³Nyang lyis chunghthwe vsaiq kat geh, toenk lyis lyes lyes bat las gauslaus zis yah kaiq geh!

⁴YHENSAIN dah dang gas wontang. Nyah muhzoh dvnganh eq jyoeng joq.

⁵Nyang gas dan cho yahge soetuon cho lhyi ngwis. YHENSAIN dah mathank magons jyet cho ka nyeisjvng mas dyingh joq.

⁶YHENSAIN dah dang yah maukhung lhyi gvnkhanh toh, Nyah dang yah buislom, lhamhmuh, kyi lhyi joq nhang.

⁷Nyang gas thomh jeis lyis dvjoq mas boms toh las, noq thank thomh jens lyis guk lyis jyi mha kat toh teh dvjoq mas lhunk toh.

⁸Nyeisjvng gonh YHENSAIN lhyi gyukwoms nyeis bas jungh, mungkvn mas nyeis bang dvnganh nyang lyis phauh nyang nyeis bas jungh.

⁹Khasoeh ge lyis, nyang taiq lyis bweh joq. Nyang taiq kat lyis dvnganh gas thuq los.

¹⁰Dius nyau dah kuot mes cho lhyi YHENSAIN yah vkom bweh nhang. Dius dah nghamh toeuq cho lhyi tomp toh.

¹¹YHENSAIN nghamh toeuq zis gas vcaiq vto goeng joq. Nyang nghamh khyvlyis vcaiq vto goeng joq.

¹²Mangso ge dah YHENSAIN lhyi paiq dah vnyau yahge, vso xiklyis nyang khyen yoeus dah dius jens gas ngelhoq.

¹³YHENSAIN ka maukhung mhayah tyoeuq las cangsoeu lo jens dvnganh lyis yoeuh nyeis.

¹⁴Nyang nyeis joqyos masyah nyeisjvng thoq mas nyeis bang dvnganh lyis yoeuh nyeis.

¹⁵Nyang gas nyamoq dah nhaiqlom dvnganh yvlyis kuot dyei las, nyamoq kuot zis dvnganh lyis seq.

¹⁶Hwankti ka nyah yomsoq bos jesphung gvng mas ma yoh ung: Jeslo eq nyah yom yah ma yoh ung.

¹⁷Ung cho mha jes nyang gas vnyet vkom dvnghuot: Nyamoq dah yom zainsmuh yah ma yoh khyuot yoeus.

¹⁸YHENSAIN lhyi gyukwoms bang yahge nyah mathank magons jyetdap cho lhyi loms bang lyis nyang zungh nyeis.

¹⁹Nyamoq lyis shei masyah khyuot yoeus; phanghkhauq gyoh uhlyis eq kang dwis nhang.

²⁰Yang YHENSAIN lhyi nghamhloms toh; Nyang gas yang lyis pangh soeu, yang lyis gos soeu nghuot.

²¹Yang nyah gyingshang nyings lyis loms toh; yang gas nyah gvng mas gaus nyeis.

²²YHENSAIN eh, ngamoq nvng lyis nghamhloms zis yah dvyhangteh, nah mathank magons jyetdap zis gas ngamoq yah dvgeh joq bas jungh.