Read Achang CHUNGH 34 Bible Online

CHUNGH 34 - Achang bible

CHUNGH 34

¹Ngos YHENSAIN lhyi vjangh phu das. Ngah nhuot mas nyah Chungh Dang vjangh bos joq bas jungh.

²Ngah dyos YHENSAIN mha lat das: dius ngis gyoh bang xauhgyo las gaus das.

³Ngos yah dvgeh YHENSAIN lhyi chungh geh, yang nyah nyings lyis chomp chunghtoq goh.

⁴Ngos YHENSAIN lhyi xo lha, nyang ngos lyis gyo dyei, nyang ngos lyis gyuk cho dvnganh masyah khyuot yoeus.

⁵Nyamoq gas nyang lyis yoeuh las bvng zis nyvng das, nyamoq dah nyoqnho xoq ma phuh das.

⁶Hai shohjyen soeu kaiq lyis YHENSAIN gyo dyei las, nyah chiqjyen cho dvnganh masyah khyuot yoeus.

⁷YHENSAIN lhyi gyukwoms bang dah yvmlhaink yah, nyah loeuswons soeu lhaink las jes shoh masyah khyuot kat.

⁸YHENSAIN dah gis yvlyis shi yoeuh las seq geh; nyang lyis loms soeu ka ngelhoq.

⁹YHENSAIN dah gyingshang bang eh, nyang lyis gyukwoms goh: khasoeh ge lyis nyah domsyos gyo bang nyamoq chah zis dvnganh yoh.

¹⁰Khangkhyi kyoh jens zonoms chah las tsain yuot laus eq, YHENSAIN domsyos gyo bang gas cha eq ma chah.

¹¹Loshang jens eh, los geh, ngah dang gyo geh: ngos namoq lyis YHENSAIN lhyi gyukwoms das cho jyauh bah.

¹²Kang xing mes lah, gis zis yoeuh mes lah? Kang xing lha pyo mes lah?

¹³Nah lhyo ma gis cho taiq dang jhank las, hwah dang taiq cho no tyamp chah.

¹⁴Ma gis yvlyis jhank las gis zis kuot aq. Nyenstap zis lyis xo lha chank kuot aq.

¹⁵YHENSAIN dah nyoqjeih gas dan bang lyis yoeuh nyeis las, nyah no gas nyamoq kaiq zis lyis gyo nyeis.

¹⁶YHENSAIN ka ma gis zis kuot bang lyis tyi toh, housoeh nyamoq shei loh lyis lvnyap tohnyhik tyamp goeus.

¹⁷Dan bang kaiq lyis YHENSAIN gyo dyei las, nyamoq lyis nyamoq dah chiqjyen dvnganh masyah khyuot kat dyei.

¹⁸YHENSAIN ka nhaiqlom thank bang yah ni nyeis. Ehnyet dyet bang lyis khyuot yoeus.

¹⁹Dan soeu ka shohjyen nyoshoq xauh laus eq, YHENSAIN ka nyang lyis hau dvnganh masyah khyuot yoeus.

²⁰YHENSAIN ka nyang lyis gomh toh las nyah shohyau dvkhvt eq ma gyau nhang.

²¹Ma gis cho ka lhung bang lyis sat; dan soeu lhyi hoeng bang gas dang thang thyet zis xauh das.

²²YHENSAIN ka nyah dius jens lyis khyuot kat das. Nyang lyis loms bang hank eq dang thang thyet zis ma xauh das.