Read Achang CHUNGH 35 Bible Online

CHUNGH 35 - Achang bible

CHUNGH 35

¹YHENSAIN eh, ngos lyis phyen-goh los bang yah nvng phyen-goh aq, ngos lyis zan los bang yah zan goh aq.

²Gos yahge jesgungs chi lha ngos lyis pangh das zis toq yap aq.

³Ngos lyis chank khat los bang lyis nah lham yahge jes wuzung yings aq. Nvng ngos lyis khyuot das, oen dangthoengh toh aq.

⁴Ngah kang lhyi xo bang xoqthuq las somh loh bas jungh, ngos lyis gudwvng nhang das ge sont bang, nungsjik loh las uhnungh nungh bas jungh.

⁵Nyamoq lyis lyeis mas dang dah phihsan teh mus nhang aq. YHENSAIN dah loeuswons soeu eq nyamoq lyis khat bas jungh.

⁶Nyamoq dah cho soeng soeng noq las jyuot bas jungh, YHENSAIN dah loeuswons eq nyamoq lyis khat bas jungh.

⁷Soe ma bos zis nyamoq ngos lyis twih khyoq las, soe ma bos zis ngah kang xiklyis dwang tsain doeu.

⁸Nyamoq masoh mathamh monh tyamp bas jungh; nyang khyoq twih mas nyang nyih las nyang doeu dwang mas nyang gyoms bas jungh.

⁹Ngos gas YHENSAIN mha gauslaus nyeis. Nyah khyuot yoeus cho mha gauslaus nyeis das.

¹⁰YHENSAIN eh, nvng teh hank nghuot lah? Yomnhuk soeu lhyi nyah thoq lyis yom zes bos soeu jyank masyah, shohjyen soeu yahge nyungs soeu lhyi shoeuhshih soeu jyank masyah nvng gos toh dyei, oen ngos ngah ehnyet nhaiqlom dvnganh yah taiq das.

¹¹Ma ying kanghjyoeng jens toq las nyamoq ngos ma seq yvlyis nyei.

¹²Nyamoq gas gis zis kuot yvlyis ma gis zis yah tauh dyei. Ngos gas nhaiqkuk yomgyau nyeis.

¹³Nghuot laus eq ngos gas nyamoq nos nyeis lyis yanghthung dyi wuot, womkyi lha, ngos gop zis yah shvmanh dung las nhaiqkuk zis chixoeuq.

¹⁴Ngos ngah dyenschangh yahge vmang vnoeuh nyhenshang teh kuot. Nyah ungwes xiklyis kuk soeu teh ngos gop las kuk nyeis.

¹⁵Nghuot laus eq ngos lains lyis nyamoq gauslaus, tsain huom lha ngos lyis yis. Lvbaus yah ngos lyis tsain lyuk, nyamoq ngos lyis ma no lo bat chingh.

¹⁶Nyamoq ngos lyis jwangh goeus thang lhyi doms jwangh. Nyamoq ngos lyis hoeng zis yah yoeuh.

¹⁷YHENSAIN eh, nvng khanyhank jweh shoq yoeuh nyeis das lah? Nyamoq ngos lyis mhont tyamp cho mhayah, ngah phauhdap kang lhyi khangkhyi jens masyah khyuot yoeus aq.

¹⁸Ngos nvng lyis nah moqphung zainsmuh mas chungh das; dius nyoshoq dah xikkhonh mas chungh das.

¹⁹Ngah jeswus, hwah bang lyis ngos shoeuh cho mha vgaus nhang. Soe ma bos yvmas ngos lyis hoeng bang lyis ngah nhaiqkuk cho mha vyis nhang.

²⁰Khasoeh ge lyis nyamoq nyenstap dang ma jis, hauh mau mas samlo nyeis bang lyis mhuih jyomh cho tsain lhaink.

²¹Nyamoq ngos lyis kaiq las kauq zis gas, Nvng cha kuot zis ngamoq dah nyoqjeih yah nyvng goeus, ge.

²²YHENSAIN eh, haih zis nvng nyvng goeus, samlo vnyeis: YHENSAIN eh, ngos yah we we vnyeis.

²³Ngah YHENSAIN Mangso eh, ngos lyis gos dyei das zis yahge ngos lyis dang thang thyet das zis nah gungs lyis nhauh las toq aq.

²⁴Ngah YHENSAIN Mangso eh, nah dan cho khyvlyis ngos lyis yobos ma bos cho hoeuh dyei aq. Nyamoq lyis ngah thoq mas vgaus nhang.

²⁵Ah, ngamoq o khyvlyis nghuot goeus, ge nyamoq nhaiqlom mas ma yoh taiq bas jungh: Ngamoq nyang lyis yoh nyhau tyamp goeus, ge ma yoh taiq bas jungh.

²⁶Ngos gudwvng yvmvyah gaus bang xoqphuh las uhnungh nungh bas jungh; nyamoq ngah thoq lyis zes, ge chunghzo bang xoqphuh zis yah nyoqnho shen bas jungh.

²⁷Ngos yobos ma bos cho lhyi nyvng mes bang gas gauslaus zis yah kaiq las doms chungh doms chungh kuot bas jungh. Nyah jyeidwis dah ung cho lhyi nhaiqdoeus dyei dah YHENSAIN ka kha iq kuhxing!

²⁸Housoeh ngos nah dan cho hoeuh dyei das. Ngos nvng lyis dvnyeih gonh chungh das.