Read Achang CHUNGH 36 Bible Online

CHUNGH 36 - Achang bible

CHUNGH 36

¹q1 Yaunos gas lhung bang dah nhaiqlom khau mha taiq nyeis; Nyamoq gas Mangso lhyi peq tyamp las nyang lyis gyukwoms cho ma bos, ge.

²Khasoeh ge lyis nyang nyah gungs lyis nghamh kuh zo las, Mangso ka nyah yaunos lyis ma nyvng das, yobos eq ma dyei das, ge nghamh.

³Nyah nhuot mas dah dang gas lhung lha mhuih dang nghuot; nyang gas joeui yahge gis cho lhyi toh tyamp.

⁴Nyah yhetyos mas lhung khyvlyis nghamh toeuq toh. Nyang gis zis cha ma kuot. Nyang ma gis cho lhyi ma he.

⁵YHENSAIN eh, nah mathank magons jyetdap cho ka maukhung jweh las, nah wontang cho ka jyommauh mas duons loh.

⁶Nah dan zis gas bomszains teh, nah lyi jus cho ka thomh noq teh nghuot. YHENSAIN eh, nvng gas dius yahge yewus lyis gomh nyeis.

⁷Mangso eh, nah jyetdap sainhnos cho kha iq phauhdap lah! Housoeh yvmvyah cangsoeu lo jens nah dungs khau mha khau nges nyeis.

⁸Ngamoq gas nvng yung toh dyei dah zonoms vboms vbeq xauh zo. Nvng ngamoq lyis nah gis cho dah jeislvng mas jeis shuk nhang.

⁹Hau kang jeisthuq dwang gas nvng yah dvgeh nghuot. Nah bvng cho gvng mas ngamoq bvng zis lyis nyvng.

¹⁰Nvng lyis seq bang xiklyis nah jyetdap cho, dan bang xiklyis nah gis cho lhyi tsoq dyei nyeis shih aq.

¹¹Khwank dah khyei ngos lyis ma duons bas jungh, lhung bang ngos lyis ma khat bas jungh.

¹²Lyi ma bos khyvlyis kuot bang houmha lains loh zis nyvng. Nyamoq houmha joq goeus las ma yoh toq lo.