Read Achang CHUNGH 37 Bible Online

CHUNGH 37 - Achang bible

CHUNGH 37

¹Nvng ma gis zis kuot bang gvng mas vchiqh, lyi ma chi muh kuot bang lyis vnoh.

²Nyamoq gas kyuk goeus dah mhanh teh lvnyap dyuk tyamp das, nyhauh loh dah vzains teh shei loh das.

³YHENSAIN lhyi loms las gis gis kuot aq. Hauh mau mas nyeis las jesluiq bas jungh.

⁴Nah gaus cho lhyi YHENSAIN mha xo aq, housoeh lyis nyang nah ehnyet mas omes zis lyis dyei das.

⁵Nah cho YHENSAIN lhyi kyauh aq: nyang lyis eq loms aq, nyang nvng lyis pangh das.

⁶Nyang gas nah dan cho lhyi nyeihgungs dah buis teh bvng nhang das.

⁷YHENSAIN jyank mas ehnyet xing xing langh aq; lhung khyvlyis kuot las yoh bweh los zis yahge, ma gis cho khaujeini las ung los bang gvng mas ehnyet vnyo.

⁸Nhaiq vyo, chiqh eq vchiqh. Hauh zis gas, yau cho pheh dvshwih loh.

⁹Lhung bang khat tyamp zis xauh das. YHENSAIN lhyi loms nyeis bang gas nyeisjvng lyis xauh sain das.

¹⁰Ma nyangh lyis lhung soeu dyuk loh das. Nvng, nyang lyis xo laus eq ma nyvng das.

¹¹Ehnyet nyens bang nyeisjvng lyis xauh sain lha, nyeisgis yaplhoq las nyenstap das.

¹²Lhung soeu ka dan soeu lhyi ma gis khyvlyis lhaink las hoeng zis yah nyoqtyi yoeuh nyeis.

¹³Nghuot laus eq YHENSAIN ka nyamoq monh lo bah ge zis nyvng yvmvyah, nyang lyis yis dyei.

¹⁴Lhung bang gas shohjyen bang yahge nyungs bang lyis sat das ge, nyamoq dah sham she. Jus zis kuot bang lyis sat das ge, lyei tsain thung.

¹⁵Nghuot laus eq nyamoq nyang sham yah nyamoq shei bas jungh, nyamoq lyei eq gyau tyamp das.

¹⁶Dan soeu dvtsiq yoh zis gas Lhung soeu magons magoh yoh thoq lyis zes phauhdap.

¹⁷Khasoeh ge lyis, lhung bang dah yomsoq lyis thyuk dyei zis xauh das, dan bang lyis gas YHENSAIN gos toh dyei.

¹⁸YHENSAIN ka nyah domsyos gyo bang lyis gomh toh dyei. Nyamoq dah mau vso vcaiq vto joq.

¹⁹Yau shishenh lyis nyamoq ma shanghsenh das, phanghkhauq lyis tham shoq yoh das.

²⁰Lhung bang gas shei das; YHENSAIN dah jeswus gas, mhanhdyvp mas dah banbuh teh dyoq dyuk das. Nyamoq nyikhauh teh bi dyuk das.

²¹Lhung soeu ka jyeih las ma doms cap; dan soeu ka dyei zis yah nhaiqnyen cho chixoeuq.

²²Nyah shvmanh yoh bang gas nyeisjvng lyis xauh sain das. Nyang nhoengh zis xauh bang gas thyet tyamp zis xauh das.

²³YHENSAIN ka dius lyis nyang loh vvng dah cho chank shwih loh. Nyang lyis nhaiqdoeus bang lyis gos toh dyei.

²⁴YHENSAIN ka nyamoq lyis pangh yvmvyah, nyamoq lains laus eq jyah lains joq das zis ma nghuot.

²⁵Ngos kang dwis zis nyangh las gvshih gas mang goeus; nghuot laus eq dius gis lyis YHENSAIN yah doeuh tyamp toh zis ma nyvng, nyah lo jens dungzo zis eq ma nyvng ku.

²⁶Nyang vjangh nhaiqnyen las jyeih dyei: Nyah lo jens gas shvmanh zis xauh.

²⁷Ma gis yvlyis jhank aq, gis zis kuot lyis nah vnyau vshih houmha vcaiq vto nyeis.

²⁸YHENSAIN ka lyi jus yvlyis ngwis las, nyah lomluk bang lyis ma she tyamp toh. Nyamoq lyis vjangh gomh toh. Nghuot laus eq lhung bang dah vshih gas thyet tyamp zis xauh das.

²⁹Dan bang gas maunyeis lyis xauh sain lha, houmha vcaiq vto xauh nyeis das.

³⁰Dan soeu dah nhuot gas joeui dang taiq, nyah lhyo lyi jus zis taiq nyeis.

³¹Nyah Mangso dah lyi gas nyah nhaiqlom mas bos; nyang hauh zis yah khanhamp eq ma gang loh.

³²Lhung soeu ka dan soeu lhyi sat das zis xo lha zungh yoeuh nyeis.

³³YHENSAIN ka nyang lyis nyah loq mas ma toh dyei khoq, lhung soeu soetuon zis xauh lyis nyang gas dang thang thyet zis xauh bas jungh.

³⁴YHENSAIN lhyi loms toh las nyah tyingtoh dang chank aq; hauh munghdan nvng lyis dyei zis yah nvng lyis chungh das: nvng hauh lhung bang lyis thyet tyamp zis nyvng das.

³⁵Lhung soeu ka yoh zau las, nyang gas yuk khanghmuh thoq mas zau las Lebanon mas yuk dah arit zains teh nghuot.

³⁶Nyang lai loh goeus las, yoeuh aq, nyang ma nyvng lo. Ngos nyang lyis xo laus eq ma nyvng.

³⁷Dius gis lyis comh toh aq, ehnyet zungh soeu lhyi yoeuh toh aq: Nyenstap soeu ka vnyau vshih bos.

³⁸Nghuot laus eq, cu bang dvnganh gas dvlhain dvm lyis dyoqbis tyamp das; nyamoq vnyau vshih jens eq thyuk zis xauh das.

³⁹YHENSAIN ka dan bang lyis khyuot yoeus las, chiqjyen shishenh lyis nyamoq lyis gos toh dyei.

⁴⁰YHENSAIN ka nyamoq lyis pangh las khyuot yoeus: Nyamoq gas nyang lyis loms nyeis yvmvyah, nyang nyamoq lyis lhung bang masyah khyuot yoeus.