Read Achang CHUNGH 38 Bible Online

CHUNGH 38 - Achang bible

CHUNGH 38

¹YHENSAIN eh, nvng nhaiqyo zis yah ngos lyis vnyho, nah ehnyet gywes zis yah ngos lyis yobos vdyei.

²Nah nyo yah ngos lyis dvmtap, nvng ngos lyis hwe.

³Nvng nhaiqyo gvng mas ngos nos nyeis. Ngah yaunos gvng mas ngos dvgungs gonh khih nyeis.

⁴Ngos gas ngah yaunos thomh mas nyop loh; houka sunk lyei las ma yoh wons lo dah yvwons nghuot.

⁵Ngah dah koh cho gvng mas ngah dvm bop las nvm.

⁶Ngos goeuh loh, dyis loh. Dvnyeih gonh kuk nyeis.

⁷Ngah thyikdom gas ngeh dah noslom yah dyingh las, ngos shei bah ge loh.

⁸Yaukhih changbuk nos nyeis; ngah ehnyet mas noskyingh yvmvyah kaiq nyeis.

⁹YHENSAIN eh, nvng ngos omes zis dvnganh seq. Ngos noskyingh zis xauhgyo.

¹⁰Ngah sainhguk thungh, yom eq guons goeus. Ngah nyoqjeih dah bvng zis eq dyuk tyamp goeus.

¹¹Ngah dvm gvng mas ngah dyenschangh jens yahge yhenkyoh bang ngah nvm mas ma los; ngah yhenbang yangh we we mas dvnyeis.

¹²Ngos lyis sat mes bang ngah xiklyis twih khyoq toh; ngos lyis gudwvng nhang mes bang gas ngos lyis lhoq thyoq das ge kyuk nyeis, ma no lo vjangh lhaink nyeis.

¹³Ngos gas nojet soeu teh cha ma xauhgyo; nhuot ma haq dah nhuotjet soeu teh nghuot.

¹⁴Ngos gas no ma gyo las ma phuk taiq soeu teh nghuot.

¹⁵Nghuot laus eq YHENSAIN eh, ngos nvng lyis loms nyeis: ngah YHENSAIN Mangso eh, nvng ngos lyis toeuh dyei das.

¹⁶Ngos chiqjyen yvmas ngah jeswus jens lyis nhaiq vshei nhang. Ngos somh loh cho mha nyamoq lyis vmoengs nhang.

¹⁷Ngos lains bah ge, ngos vjangh chiqjyen nyeis.

¹⁸Ngos cu cho lhyi ngos rhen, hau ngah yaunos gas ngos chiqh das cho lung dyei.

¹⁹Ngah jeswus jens gas yanghzan las yombos; ngos lyis shohyos gungs mas hoeng bang nyo.

²⁰Nyamoq gas gis yvlyis ma gis zis yah tauh dyei. Ngos gis cho chank yvmvyah nyamoq ngos yah tyi.

²¹YHENSAIN eh, ngos lyis vshe tyamp toh. Ngah Mangso eh, ngos yah vwe loh.

²²Ngah khyuot yoeus YHENSAIN eh, ngos lyis pangh das zis han aq.