Read Achang CHUNGH 39 Bible Online

CHUNGH 39 - Achang bible

CHUNGH 39

¹Ngos gas, Ngos cha kuot yvlyis zaih das; ngah lhyo yah ma shuot bas jungh, ma gis soeu ngah xikkhonh mas nghuot shih lyis ngos ngah nhuot shung das, oen.

²Ngos samlo nyeis; dang dvkhonh eq ma taiq, gis zis yangh cha ma taiq: nghuot laus eq housoeh nyeis lyis ngah shanghsenh cho dvzes xungh los.

³Chiq cho ka ngos lyis ung loh; ngos she nghamh she zes yau los. ngos ma nyei ma yoh kuot lo.

⁴YHENSAIN eh, ngos khanyhank jweh shoq kang dwis das lah? Ngos khanhamp shei das? Ngah kang khanhamp thank das zis jenh taiq aq.

⁵Nvng ngah kang dvsoq dvdwis nhang, ngah dvcaiq gas nah xikkhonh mas cha eq ma nghuot. Jyoengh dius gas soq dvnghuot. (Selah)

⁶Jyoengh dius gas siyet teh suh nyeis, nyamoq kuot zis dvnganh vkom dvnghuot. Nyang xo yung toh laus eq hank xauh yoeus das zis ma seq.

⁷Housoeh lyis, YHENSAIN eh, ngos cha lhyi nghamhloms das lah? Ngos nvng lyis nghamhloms.

⁸Ngah yaunos dvnganh masyah ngos lyis khyuot kat aq: ngos lyis koh bang yah vjwangh nhang.

⁹Nvng haih cho bweh nhang yvmvyah, ngos dang ma taiq samlo nyeis das.

¹⁰Ngos lyis yobos vdyei lo. Nvng chwiq yvmvyah ngos shei loh nyeis.

¹¹Dius dah yaunos gvng mas nvng yaus zis yah yobos dyei, nyang ngwis cho lhyi yuszo teh mhont tyamp dyei. Jyoengh dius gas soq dvnghuot. (Selah)

¹²YHENSAIN eh, ngah shvmanh dung dang lyis gyo dyei aq. Ngos kaiq dung yvlyis gyo yoeus dyei aq. Ngos ngaus lyis los pangh aq. Ngos gas ngah phauh thyeih moq teh nah boenghwus dvsoq dvnghuot.

¹³Ngos ma nyangh lyis shei loh lo das. Ngos yoh pyo das xiklyis ngos lyis kyingh nyeis nhang aq.