Read Achang CHUNGH 40 Bible Online

CHUNGH 40 - Achang bible

CHUNGH 40

¹YHENSAIN pangh das xiklyis ngos ehnyet xing xing langh nyeis. Nyang kamp gyo las ngos kaiq dung yvlyis xauhgyo dyei.

²Nyang ngos lyis gyukphoh dwang yahge thomhbop masyah she thuq kat. Nyang ngos lyis luk-uk thoq mas jesluiq shohluiq toh zis yah ngos lyis goeng nhang.

³Ngamoq dah Mangso lhyi chunghthwe saiq yah chungh das zis, nyang ngos lyis jyauh. Dius nyoshoq hauh yvlyis nyvng zis yah yoeuh yoeus las, nyamoq YHENSAIN lhyi loms das.

⁴YHENSAIN lhyi loms las, silho shot pheh ma xoeu, ma jus dah mangso jens lyis paiq bang yah ma zomh bang gas ngelhoq.

⁵YHENSAIN, ngah Mangso eh, nvng ngamoq xiklyis nyoshoq ja kuot dyei goeus; Nvng teh zis hank ma bos: nvng ngamoq xiklyis mauhphoh nghamh toeuq cho nyoshoq kuot dyei. Hauh zis gas svsoh nyo, ma thoq suon lo shoq nghuot.

⁶Nvng lomhxangh yahge jyungshuk lyis ma o; Nvng ngos lyis ngheq phudyei yahge yaunos jyungshuk ma sang. Hauh gungsthaiq ngos lyis xauhgyo das no dyei.

⁷Hauh thang lhyi ngos gas, Yoeuh aq, ngos jweh las Sauhdain mas ngah cho lhaih toh.

⁸Ngah Mangso eh, ngos nah ehnyet chank mes: nghuot goeus, nah lyi gas ngah nhaiqlom khau mha bos, oen.

⁹Ngos gas moqphung zainsmuh mas dan cho kyoh goeus: YHENSAIN eh, ngos ngah nhuotkuk lyis ma nyheih toh zis nvng seq.

¹⁰Ngos nah dan cho lhyi ngah nhaiqlom khau mha ma zauh toh; ngos nah wontang cho yahge khyuot yoeus cho taiq hoeuh: hau moqphung zainsmuh mas nah jyetdap sainhnos zis yahge jyoeng yvlyis ma shung toh.

¹¹YHENSAIN eh, nvng nah nhaiqnyen cho ngah jyank masyah vyoeus tyamp dyei: nah jyetdap sainhnos zis yahge jyoeng zis gas ngos lyis tsoq gomh toh dyei aq.

¹²Ma thoq suon dah yau cho ngos lyis lhaink toh: ngos ma yoh nghank yoeuh lo shoq ngah yaunos ngos lyis duons goeus. Hauh zis gas ngah uhloms mas cam thoq lyis nyo: housoeh yvmvyah ngos yomgyau.

¹³YHENSAIN eh, ngos lyis khyuot yoeus aq, ngos lyis gvshih pangh aq.

¹⁴Ngos lyis sat das ge yomkat bang somh las uhnungh nungh bas jungh; ngos yaukyenh yvmvyah, pyo bang gas xoqphuh zis yah tauh loh bas jungh.

¹⁵Ngos lyis jwangh nyhap bang somh zis yah yomgyau loh bas jungh.

¹⁶Nah jyank mas los bang dvnganh gas gausyis zis yah gauslaus bas jungh; nah khyuot yoeus cho lhyi nhaiqshoqlang ge bang gas vjangh, YHENSAIN ka kha iq kuhxing, ge sang bas jungh.

¹⁷YHENSAIN eh, ngos shohjyen zis yah yomnhuk nyeis. Nghuot laus eq nvng ngos lyis ma tohnyhik. Nvng gas ngah khyuot yoeus soeu yahge ngah Mangso nghuot. Ngos lyis lvnyap los pangh aq.