Read Achang CHUNGH 44 Bible Online

CHUNGH 44 - Achang bible

CHUNGH 44

¹Mangso eh, gohlhain phauh thyeih moq zaih lyis nvng kuot ku dah muh, nyamoq taiq kyoh zis lyis ngamoq no yah xauhgyo ku.

²Nvng gohnyau jens lyis khasoeh khat tyamp las nah dius nyau lyis hauh mau mas nyeis nhang cho; gohnyau bang lyis yobos dyei zis yah nah dius lyis bais los nhang cho nghuot.

³Nyamoq dah moengsa yah nyamoq hauh mau lyis yoh sain zis ma nghuot, nyamoq dah yomsoq yah nyamoq yoh ung zis ma nghuot. Nvng nyamoq lyis jyetdap yvmvyah nah yom, nah yomsoq, nah nyoqnho dah bvng zis yah nyamoq khyuot yoeus zis dvxauh.

⁴Nvng gas ngah hwankti yahge ngah Mangso nghuot, nvng nah dius jens lyis ung cho dyei.

⁵Ngamoq nah yomsoq yah ngamoq jeswus lyis yoh ung. Nah nyings gvng mas jeswus jens lyis yoh nhoeuh tyamp.

⁶Ngos ngah lyei lyis ma loms, ngah moengsa eq ngos lyis ma yoh khyuot yoeus.

⁷Nghuot laus eq nvng ngamoq lyis ngamoq dah jeswus masyah khyuot yoeus las ngamoq lyis hoeng bang lyis somh nhang.

⁸Ngamoq vjangh nvng lyis chungh nyeis. Ngamoq nah nyings lyis vcaiq vto chungh das. (Selah)

⁹Nghuot laus eq nvng ngamoq lyis tyamp las, ngamoq lyis somh nhang. Nvng ngamoq dah jesphung yah ma loh.

¹⁰Nvng ngamoq lyis ngamoq dah jeswus jens masyah phang nhang lha, hoeng bang ngamoq lyis thyoq loh.

¹¹Nvng ngamoq lyis sat zo das yvng lyis teh kyauh tyamp las, ngamoq lyis dius nyau jens mas sanh tyo tyamp.

¹²Nvng nah vnyau lyis phauh dvmhauh yah ungh, ma phauh teh dv ung.

¹³Nvng ngamoq lyis khasoeh kuot zis gohnyau bang nyvng las ngamoq lyis jwangh, yis.

¹⁴Nvng ngamoq lyis dius nyau jens mas jwangh gus kuot las, nyamoq ngos lyis hoeng dah vlho lainkamh nocwih kuot.

¹⁵Ngos vjangh nyoqnho ngelang gyoh nyeis. Xoqphuh zis gas ngos lyis nghop toh.

¹⁶Ngos ngah jeswus jens goessang, laihwangh zis xauhgyo las eq, ngos lyis hoeng bang gvng mas eq nghuot.

¹⁷Ngamoq hounyhoq xauh laus eq ngamoq nvng lyis ma tohnyhik. Nvng ngamoq yah kuot toh dah thanghchvp lyis eq ma thyoq.

¹⁸Ngamoq dah nhaiqlom ma phanh, nah tyingtoh dang lyis domsyos ma gyo ma kuot.

¹⁹Nvng ngamoq lyis yewus joqyos mas vshoh vjyen toh, ngamoq lyis soeng soeng noq yvmas doeuh tyamp toh.

²⁰Ngamoq dah Mangso lhyi paiq cho no las, lvbaus dah mangso lhyi paiq lyis,

²¹nhaiqlom mas shung toh yvlyis seq dah Mangso ka hauh yvlyis yoh xo thuq das nghuot.

²²Nah gvng mas ngamoq nyeih yau nyeih sat zis xauh. Ngamoq lyis sat das sont toh yvng lyis teh kuot zis xauh.

²³YHENSAIN eh toq aq, nvng chamus yhet joq? Soh aq, ngamoq lyis vjangh vphe tyamp toh.

²⁴Nvng ngamoq lyis chamus tamh? Ngamoq dah kham zo cho yahge yau cho lhyi vtohnyhik dyei.

²⁵Ngamoq gas nyeisjvng mas gyoh dyis goeus; ngamoq somh las tsoh mas lains joq.

²⁶Ngamoq lyis los pangh aq, nah nhaiqnyen cho gvng mas ngamoq lyis khyuot yoeus aq.