Read Achang CHUNGH 45 Bible Online

CHUNGH 45 - Achang bible

CHUNGH 45

¹Ngos hwankti xiklyis haih lvkhyank ywi jvng uhlyis ngah nhaiq mas dang chau yah dyingh joq. Houka maussauh lhaih lyes soeu dah pen teh ngah lhyo yah lvkhyank kat das zis cicont nghuot.

²Nvng gas cangsoeu lo jens mas yungh thank soeu nghuot; Nvng gas dang taiq duot soeu nghuot. Mangso nvng lyis vjangh shvmanh dyei.

³Yomzains hwankti eh, nah moengsa lhyi wons toh aq. Nvng gas nyoqnho ngelang yahge shoenkkhyi bos soeu nghuot.

⁴Jyoeng zis, yahge lyi jyoeng cho lhyi gos cho mha ung loh das xiklyis shoenkkhyi yah ji los. Nah yom yah ung cho zainsmuh yoh das.

⁵Nah nyo chon joq las, houka nah jeswus jens nhaiqlom mas tsain zuk loh. Dius nyau jens nah khyeiyang mas lains loh.

⁶Mangso nvng lyis dyei toh dah munghdan vcaiq vto joq das; nvng nah dius jens lyis lyi jus zis yah guon das.

⁷Nvng gas dan yvlyis ngwis las, ma gis yvlyis hoeng. Housoeh yvmvyah Mangso, nah Mangso nvng lyis khyen yoeus las gohtoeu hwankti thoq lyis gausyis cho zes huot kat dyei.

⁸Nah dyimis gas mura, vjyo, saiq xangh yah xangh joq, cangzwis hwankti yhen mha toenk bat zis gas nvng lyis lhoq pyo nyeis.

⁹Hwankti yhen mha dah vmesbih jens gas hwankti lonyi jens nghuot. Nah hwankti tank loqyos shot pheh gas Ophira xing shunk chi dah hwankti nyhiq.

¹⁰Hwankti dah hwank nyhiq eh, ngos taiq zis gyo aq. Nah dius jens yahge nah sainhchangh jens dah dang lyis vgyo lo.

¹¹Hwankti ka nvng yungh zis lyis svsoh ngwis das. Nyang gas nah YHENSAIN nghuot yvmvyah nyah domsyos gyo chah.

¹²Taire dius jens gas nah jyank jyungshuk chi los das. Dis bang nah nyoqnho xo das.

¹³Hwankti lonyi gas hwankti yhen mha nyeis. Nyang kha iq yungh! Nyah dyixing ka xing khying yah yoq zis nghuot.

¹⁴Svtung dyi yah hwankti jyank mas lonyi changh jens yah dvgeh shwih los dyei das. Nyamoq lyis eq hwankti jyank mas shwih los dyei.

¹⁵Nyamoq gausyis zis yah gauslaus gausseq los las, hwankti yhen mha xauh wvng.

¹⁶Nvng ngah hwankti eh, nah phauh thyeih moq hwankti kuot teh kuot das zis nah lo jens nyo das. Nvng nyamoq lyis nyeisjvng gonh zau kuot nhang das.

¹⁷Ngos nah nyings vcaiq vto hoeuh cho lhyi chungh. Housoeh las yuk khanghmuh nvng lyis vcaiq caiq vto to chungh nyeis das.