Read Achang CHUNGH 49 Bible Online

CHUNGH 49 - Achang bible

CHUNGH 49

¹Yuk khanghmuh haih zis gyo geh; nyeisjvng gonh dah dius jens eh, gyo yoeus geh.

²Nyhen bang nyhang bang, nyungs bang dis bang dvgeh gyo yoeus geh.

³Ngos joeui dang taiq das, ngos nghamh cho shang shang nghuot.

⁴Ngah no sodang kamp gyo das las toenk bat zis yah wishomp dang phui kyoh das.

⁵Ma gis dah buisnyeis lyis lyi ma chi cho ngos lyis lhaink toh lyis ngos ma gyuk.

⁶Nyamoq dah zisyos lyis loms dah ma gis bang, dis cho nyoshoq yoh las khwank bang yah lhaink toh.

⁷Dius hank eq nyah gungs lyis nyang ma yoh khyuot. Nyang Mangso lhyi nyah kang phauh ma yoh dyei.

⁸Nyah dyos khyuot das zis phauh nyo changh las, nyang yoh dyei zis khanhamp eq ma tham.

⁹Nyang lyis lop masyah khyuot yoeus las vcaiq vto kang dwis nhang.

¹⁰Joeui bos bang seq shei, koh bang yahge ung ma gying soeu eq dvyhangteh shei. Nyamoq dah zisyos nyamoq dah vnyau vshih nyhenshang toh khoq yvlyis nyang yoh nyvng.

¹¹Nyamoq lop gas nyamoq dah vcaiq vto yhen nghuot. Nyamoq maunyeis yossoh bos khoq laus eq nyamoq vjangh lop mas nyeis.

¹²Dius dah kuhxing cho ka nyang lyis shei cho mhayah ma yoh gos toh, dyoqbis dah yewus teh dvnghuot.

¹³Nyang gungs nyang lyis loms bang chamus zis lyis yoeuh geh. Nyamoq dah dis cho mha nhaiq dainh nyeis bang dah uhpui loqkyoq lyis yoeuh geh. (Selah)

¹⁴Nyamoq gas yvng teh shei loh, shei cho ka nyamoq dah yvng yoeuh soeu teh nghuot. Nyamoq yhen yah we dah shei mau mas bop yuq loh zis yah dvyhangteh Dan cho ka nyamoq lyis ung das.

¹⁵Mangso ka ngos lyis khyuot das; nyang ngos lyis shei yomsoq masyah khyuot das. (Selah)

¹⁶Dius dvyuk dis los, nyah zisyos svsoh je los laus eq nvng vgyuk.

¹⁷Nyang shei lhyi cha eq ma yoeus loh, nyah zisyos nyang yah dvgeh lop pheh ma loh.

¹⁸Dwis nyeis shih lyis nyang lyis shvmanh dyei las, nyeisgis yaplhoq gvng mas nyang lyis tsain chungh laus eq,

¹⁹Nyang nyah phauh thyeih moq jyank mas loh das, houmha vcaiq vto noq joq.

²⁰Dius dvyuk dah kuhxing cho yah nyang lyis shei cho lhyi ma yoh gos toh. Nyang eq gaunyhauq teh shei das.