Read Achang CHUNGH 5 Bible Online

CHUNGH 5 - Achang bible

CHUNGH 5

¹YHENSAIN eh, ngah dang kamp gyo dyei aq. Ngos soqmuh nyhank yvlyis gyo dyei aq.

²Ngah Hwankti yahge ngah Mangso eh, ngos kaiq thwe lhyi gyo dyei aq: khasoeh ge lyis ngos nvng lyis shvmanh dung nyeis.

³YHENSAIN eh, nvng nvpsangh lyis ngah thwe xauhgyo. Nvpsangh lyis ngos nvng lyis phudyei las langh nyeis.

⁴Nvng gas lhung cho mha nhaiqdoeus dah Mangso ma nghuot. Ma gis cho nvng yah yoh nyeis das zis ma nghuot.

⁵Khwank bang nah nyoqlvtjvng mas yoh yap das zis ma nghuot. Nvng lyi ma chi muh kuot bang dvnganh lyis hoeng.

⁶Ma jus zis taiq bang lyis nvng mhont das. Suih shet soeu yahge mhuihzo bang lyis YHENSAIN choqh.

⁷Nghuot laus eq ngos gas nah kuhxing nhaiqnyen cho gvng mas, nah yhen mha wvng das. Nvng lyis phauh nyang gyukwoms zis yah, nah gyingshang yhenmuh pheh xoeu lha paiq das.

⁸YHENSAIN eh, ngah jeswus jens gvng mas ngos lyis nah dan cho pheh shwih yoeus aq. Ngah xikkhonh mas nah cho lhoq dan dyei aq.

⁹Nyamoq nhuot mas jyoeng cho ma bos; nyamoq dah nhaiqlom lhoqthyoq cho yah dyingh joq; nyamoq dah dang gas shei nhang zis nghuot. Nyamoq dah lhyo yah seq mhuih.

¹⁰Mangso eh, nyamoq dah yobos nyamoq lyis taiq kyoh aq. Nyamoq joeui da yvmas nyamoq gyoh bas jungh. Nyamoq ma shop bang nghuot yvmvyah nah xikkhonh masyah khat tyamp aq: khasoeh ge lyis nyamoq nvng lyis tyi lha gomloeus toq.

¹¹Nvng lyis khaunges bang dvnganh gausyis nyeis bas jungh. Nyamoq vjangh gauslaus cho chunghthwe yoh kat. Nvng lyis jyet bang lyis gomh dyei aq. Nah gvng mas nyamoq jyoengh gauslaus nyeis.

¹²YHENSAIN eh, nvng nah domsyos gyo bang lyis shvmanh dyei. Nah jyet cho ka gos teh nyamoq lyis gomh toh dyei.