Read Achang CHUNGH 50 Bible Online

CHUNGH 50 - Achang bible

CHUNGH 50

¹Yomzains YHENSAIN Mangso taiq kat las buisthuq masyah buiswvng pheh jweh shoq nyeisjvng lyis khi.

²Yunghshop thank dah Zion boms masyah Mangso dah bvng zis pank kat.

³Yah Mangso jweh los, samlo ma nghuot, nyah xikkhonh mas nyi ngeh nyeis. Vyvm vwi mas eq lyeismuh jyang muot nyeis.

⁴Nyang nyah dius jens lyis soetuon das zis maukhung yahge nyeisjvng lyis kanghjyoeng khyvlyis khi.

⁵Phudyei las Ngos yah thanghchvp chvp toh, Ngos yoh loms bang eh, ngah jyank mas huom los geh, ge.

⁶Mangso nyang soetuon lha, maukhung ka nyah dan cho lhyi kyoh bas jungh. (Selah)

⁷Ngah dius jens eh, gyo geh, ngos taiq bah. Israel eh, Ngos nvng lyis tyi lha kanghjyoeng kat bah; Ngos gas Mangso, nah Mangso nghuot.

⁸Phudyei cho gvng mas ngos nvng lyis ma nyho das. Nvng ngheq dyei jyungshuk ngah xikkhonh mas vjangh joq.

⁹Nghuot laus eq ngos nah yhen mha noeulu, nah zungs mas beqlus ma yoeus das.

¹⁰Mhanhdyvp mas nyeis dah yewus dvnganh, jing khyoengh khyoengh mas nyeis dah gaunyhauq dvnganh ngah zis nghuot.

¹¹Boms mas nghoq dvnganh lyis ngos seq. Pa mha yewus gas ngah zis nghuot.

¹²Ngos yuot lyis nvng lyis wom ma sang das; mungkvn gonh yahge houmha zis dvnganh, ngah zis nghuot.

¹³Ngos noeulu shoh ma zo; shvbeq jens dah suih ma shuk.

¹⁴Mangso lhyi nhaiqshoqlang ge chungh dah jyungshuk dyei aq. Nyhang Thank Soeu lhyi nvng nyhen toh zis dvnganh dyei aq.

¹⁵Yaukyenh los lyis nvng Ngos lyis lui aq khyuot yoeus das, nvng Ngos lyis chungh das, ge.

¹⁶Nghuot laus eq Mangso ka lhung soeu lhyi, Nvng ngah lyi chamus taiq? Nvng ngah dang thanghchvp lyis chamus taiq?

¹⁷Nvng Ngos jyauh dang lyis hoeng lha nungsyos toh.

¹⁸Nvng khauh soeu nyvng lyis nyang yah xamxonh, nyilvng shuot bang yah nvng zomh nyeis.

¹⁹Nvng ma gis zis taiq das zis vjangh cicont nghuot, nvng hwah dang lvnyap taiq.

²⁰Nvng nah vmang vnoeuh lyis tyi dang taiq las, nyamoq lyis jausxo.

²¹Hauh nvng kuot yvlyis Ngos samlo nyeis yvmvyah Ngos nvng teh nghuot ge nvng nghamh. Nghuot laus eq Ngos nvng lyis jyauh las, nah xikkhonh mas kauq das, ge.

²²Mangso lhyi tohnyhik bang eh, haih cho gyo yoeus geh. Housoeh ma nghuot lyis Ngos namoq lyis mhont las namoq lyis hank ma khyuot kat das.

²³Nhaiqshoqlang ge phudyei soeu ka ngah nyoqnho ngelang toeu zis nghuot. Ngah domsyos gyo bang dvnganh lyis Ngos jyoengh khyuot yoeus das.