Read Achang CHUNGH 59 Bible Online

CHUNGH 59 - Achang bible

CHUNGH 59

¹ Ngah Mangso eh, Ngos lyis ngah jeswus masyah khyuot kat aq, ngos lyis zan los bang masyah gos dyei aq.

²Ngos lyis ma gis bang loq masyah khyuot yoeus aq; suih shet bang masyah khyuot kat aq.

³Yoeuh aq, nyamoq ngah kang lhyi lhom nyeis. Lhoeng bang ngos lyis tyi lha tsain huom toh. YHENSAIN eh, ngos dvja ja cu gvng mas ma nghuot, ngah yaunos gvng mas eq ma nghuot.

⁴Ngos yobos ma bos laus eq nyamoq joqyos lvnyap wuih yoeus.

⁵Maukhung Jesphung YHENSAIN Mangso eh, ngos lyis pangh das zis toq aq; Israel dah Mangso eh, nvng nah gungs lyis nhauh toq las yoeuh dyei aq. Nvng toq las Mangso lhyi ma seq bang lyis yobos dyei aq. Ma gis dah phanhlyen bang lyis nhaiq ma nyen cho chixoeuq aq. (Selah)

⁶Nyamoq nyenhthang lhyi tauh los las lvkhuih teh ching zoh lyis wus mas suh yenh.

⁷Nyamoq dah laihwangh dang yahge kyuk dang lyis gyo geh. Nyamoq nhuot khau mha dah lhyo ka nyamoq dah moengsa teh nghuot. Nyamoq lyis hank ma xauhgyo das, ge tsain nghamh.

⁸Nghuot laus eq YHENSAIN eh, nvng nyamoq lyis yis las Mangso lhyi ma seq bang dvnganh lyis jwangh nyeis.

⁹Ngos nah yom mas nghamhnywe nyeis; Mangso eh, nvng gas ngah khaugus nghuot.

¹⁰Ngah Mangso ka ngos lyis jyet las ngah jyank mas jweh los das. Nyang ngos lyis ngah jeswus jens somh loh yvlyis yoeuh nhang das.

¹¹Mangso eh, ngah vnyau ma tohnyhik bas jungh, nyamoq lyis vsat. Ngamoq lyis gos dyei soeu YHENSAIN eh, nah yom yah nyamoq lyis lhoq sanh las khyoq tyamp aq.

¹²Yaunos gas nyamoq nhuotkuk mas bos; nyamoq dah dang dvnganh gas yaunos dap. Nyamoq gas khwank las nyamoq lyis Mangso lhyik teh dah yobos dyei bas jungh: khasoeh ge lyis nyamoq gas nhoengh, hwah eq hwah.

¹³Nhaiqyo zis yah nyamoq lyis mhont aq, nyamoq lyis jom nhang aq. Housoeh lyis Mangso ka Israel mas guon nyeis, hauh zis nyeisjvng goms shoq chent loh zis yuk khanghmuh seq das. (Selah)

¹⁴Ngah jeswus jens nyenhthang lhyi tauh los las lvkhuih teh ching zoh lyis wus mas suh yenh.

¹⁵Zos xo zo dah lvkhuih teh nyamoq zos ma tham zo lyis oeu nyeis.

¹⁶Ngos gas nah yom lyis chunghthwe dvkat das; ngos nvp yau nvp nah mathank magons jyetdap cho lhyi chunghthwe kaiq kat das. Nvng gas ngah xiklyis khaunges gus, ngos chiqjyen shishenh lyis ngah khaugus nghuot.

¹⁷Ngos, nvng ngah gos nghuot soeu lyis chungh das. Ngos lyis jyet soeu Mangso, ngah khaunges gus gas Mangso nghuot.