Read Achang CHUNGH 65 Bible Online

CHUNGH 65 - Achang bible

CHUNGH 65

¹Mangso eh, Zion mha nvng lyis pyo pyo chungh las nvng lyis nyhen toh cho yoh tyink das.

²Shvmanh dung dang gyo yoeus soeu eh, Dius dvnganh nah jyank mas jweh das.

³Lyi ma bos cho ka ngos lyis ung los laus eq, nvng ngamoq lyi lhyweq cho lhyi shangphu cho kuot dyei das.

⁴Nvng yah tanh tanh nah khyam mha xauh nyeis das xiklyis nvng khyen yoeus zis xauh bang gas ngelhoq. Nah gyingshang yhenmuh yahge nah yhen mha dah gis zis yah ngamoq nhaiqtap das.

⁵Ngamoq lyis khyuot yoeus Mangso eh, nvng ngamoq lyis dan khyvlyis gyukphoh muhzoh yah toeuh dyei. Nyeisjvng gonh yahge we we joq dah thomh jens dah nghamhnywe joqyos eq nvng nghuot.

⁶Yom yah chih toh las nyah yomsoq yah boms jens lyis joq nhang.

⁷Thomh nyings thwe, hauh jeisphauq nyings thwe yahge dius hoeu toq yvlyis nyang sam nhang.

⁸We thank joqyos mas nyeis bang eq nah vlho lhyi tsain gyuk nyeis. Nvp lyis buisthuq joqyos yahge nyenhthang lhyi buiswvng joqyos lyis gauslaus nhang.

⁹Nvng nyeisjvng lyis komh las mau jyweq nhang. Nvng hauh yvlyis gvgis coeu nhang. Mangso dah jeislvng jens gas jeis yah dyingh las dius jens lyis guk yuk los dyei nhang. Nyang housoeh sont toh dyei.

¹⁰Nvng tsohbungh lyis jeis daiq nhang, khontkhyoh lyis eq tamp tyamp dyei. Nvng mau wus khyoq zis yah hauh yvlyis nhuk nhang, houmha yuk ya yuk yvlyis nvng shvmanh dyei.

¹¹Nvng gas zvn yau zvn nah dah gis cho yah dyingh nhang lha, nah khyeiyos mas coeu yaus nyeis.

¹²Mhanhdyvp katjang eq coeu yaus las jing jens eq gauslaus zis yah chih toh.

¹³Katjang mas yvng phung yah dyingh joq. Langhkhau mha guk zains dyingh joq. Nyamoq gas kaiq hoeu lha chunghthwe eq kat nyeis.