Read Achang CHUNGH 66 Bible Online

CHUNGH 66 - Achang bible

CHUNGH 66

¹Nyeisjvng gonh Mangso lhyi gauslaus zis yah kaiq geh.

²Nyah nyings dah phunk lyis chunghthwe kat geh, chungh cho dah nyoqnho ngelang kuot dyei geh.

³Mangso lhyi, Nah muh kha iq mauh chank bos lah! Nah kuhxing yomsoq gvng mas Jeswus jens nah xikkhonh mas gyuk zis yah paiq das, oen taiq geh.

⁴Nyeisjvng thoq dius yuk khanghmuh nvng lyis paiq las chunghthwe kat das. Nyamoq nah nyings lyis chunghthwe kat das. (Selah)

⁵Mangso dah loqmuh lyis los yoeuh geh, cangsoeu lo jens mas nyah mauhphoh muh nghuot.

⁶Nyang thomh lyis tungyos thaiq tyamp; Ngamoq dah phauh thyeih moq hau jeislvng lyis khyei cho suh lai; houmha ngamoq nyang mas gauslaus.

⁷Nyang nyah yomzains yah vcaiq vto guon nyeis; nyah nyoqjeih dius nyau jens lyis yoeuh nyeis. Nyang lyis tyi lha gomloeus hank ma toq nhang. (Selah)

⁸Dius nyau jens dvnganh eh, yah Mangso lhyi chungh geh, nah chungh cho lhyi xauhgyo bas jungh.

⁹Nyang, yang lyis kang dwis nhang lha, yang lyis ma lains loh nhang.

¹⁰Mangso eh, ngwis lyis nyi yah cheihshang teh nvng nyamoq lyis shi yoeuh goeus.

¹¹Nvng ngamoq lyis thung khyoq las, ngamoq nunghkhung mha lyei dah yvwons kih dyei.

¹²Nvng ngamoq lyis ngamoq dah jeswus yah ngamoq lyis nang nheh nhang. Ngamoq jeis mas eq nyi mas eq lai loh. Nghuot laus eq gvshih gas nvng ngamoq lyis jesluiq joqyos mas shwih los.

¹³Ngos nah yhenmuh mas ngheq dyei jyungshuk chi los das: ngos nyhen toh zis nvng lyis dyei das.

¹⁴Hauh zis ngos chiqjyen xauh uhlyis ngos nvng lyis dyei das oen nyhen toh.

¹⁵Ngos phon thoq mas ngheq dyei das gaunyhauq coeu dyei das, ngos noeu yahge shvbeq jens phudyei das las hauh nyikhauh mas doq loh das. (Selah)

¹⁶Mangso lhyi gyukwoms bang dvnganhmoq eh, los gyo geh, Nyang ngah xiklyis kuot dyei cho ngos namoq lyis taiq kyoh das.

¹⁷Ngos lyis pangh das xiklyis nyang lyis dung. Ngos nyang lyis chunghthwe yah chungh.

¹⁸Ngos ngah yaunos ma rhen lhyi YHENSAIN ma gyo yoeus dyei.

¹⁹Nghuot laus eq Mangso ngos lyis jyoengh gyo dyei; nyang ngos dung yvlyis gyo dyei.

²⁰Mangso ngos dung yvlyis ma peq tyamp, nyah mathank magons jyetdap zis eq ngah jyank masyah ma yoeus tyamp yvmvyah ngos nyang lyis chungh.