Read Achang CHUNGH 68 Bible Online

CHUNGH 68 - Achang bible

CHUNGH 68

¹Mangso toq las nyah jeswus jens lyis sanh tyamp. Nyang lyis hoeng bang somh las phang loh.

²Nyamoq lyis nyikhauh muot tangh tyamp teh khat tangh tyamp aq. Mangso dah xikkhonh mas lhung bang, nyi mas dyomanh yaus teh dyoqbis nhang aq.

³Nghuot laus eq dan bang gas Mangso xikkhonh mas gauslaus bas jungh; Nyamoq pyo zis yah gauslaus cho kaiq.

⁴Mangso lhyi chunghthwe kat geh, nyah nyings lyis chunghthwe kat geh. Jyommauh ji los soeu xiklyis cho sont geh, nyah nyings YHENSAIN nghuot. Nyah xikkhonh mas svsoh gauslaus nyeis geh.

⁵Nyah gyingshang yhenmuh mas nyeis dah Mangso ka, chauhmuh chauhlo jens lyis gomh dyei, gos dyei.

⁶Nyang gas dvyuk kyingh nghuot bang lyis yhenkhung yoskhyangh kuot dyei las, thung lungh bang lyis pyo pyo luiq los nhang. Gomloeus toq bang lyis gas jyamhjyuklhyuk yvmas toh.

⁷Mangso eh, nvng nah dius jens lyis shwih las hau mhanhdyvp mas suh lai los uhlyis, (Selah)

⁸Israel dah Mangso, Sina boms dah Mangso gyoh los yvmvyah nyeisjvng dwis las maukhung eq mau huot khyoq.

⁹Mangso eh, nvng mau gvgis wus nhang lha, nyungdaus dah nah vso mau lyis doms huiq nhang.

¹⁰Mangso eh, nah dius jens houmha yhen kuot las nyeis, nvng yoh dah vbomsdom masyah shohjyen bang lyis dyei.

¹¹YHENSAIN vmingh dyei las, hauh loeus lyis dius nyoshoq moq tsain taiq hoeuh.

¹²Hwankti jens yahge nyamoq dah jesphung ka phang loh. Yhen mha gyoh nyeis dah vmesbih jens gas nyamoq yoh los dah lvnyhvp lyis tsain gvm.

¹³Nyamoq yvng khom mas nyeis laus eq, xing teh xwi dah mauh yuk las ngwis shauq teh thyoeu dah khotjyauh dungs teh yungh dah vyhang yoh.

¹⁴Hauh uhlyis Maukhung Jesphung Mangso ka hauh hwankti jens lyis Zalmon boms mas gyu teh sanh tyo tyamp.

¹⁵Bashan boms gas kha iq kuh, hauh Bashan boms mas boms tsenh nyoshoq bos.

¹⁶Hau Mangso nyeis das ge khyen yoeus dah boms lyis boms tsenh nyoshoq bos dah boms jens chamus yoeuh noh nyeis? YHENSAIN ka hauh yvmas vcaiq vto nyeis das.

¹⁷YHENSAIN ka Sina boms masyah nyah Gyingshang joqyos pheh los. Nyah jeslhyingh vboms vbeq yah los.

¹⁸Nyang nyhang thank joqyos mas doq loh, thung dius nyoshoq shwih loh: Nyang gomloeus jens jyank masyah jyungshuk xauh yoeus. Housoeh YHENSAIN Mangso houmha nyeis das.

¹⁹Dvnyeih dvnyeih yah yvwons wons tyamp dyei dah YHENSAIN lhyi chungh geh! Nyang gas yang lyis khyuot yoeus Mangso nghuot. (Selah)

²⁰Ngamoq dah Mangso ka khyuot yoeus Mangso nghuot. Nyang gas yang lyis shei masyah khyuot kat dah YHENSAIN nghuot.

²¹Mangso ka nyamoq dah yaunos tsoq kuot loh nyeis bang jeswus jens dah uhloms lyis jyoengh khyauh das.

²²YHENSAIN taiq zis gas, Ngos Bashan mhayah nah jeswus lyis shwih tauh los das, noq dah nvmukdra masyah shwih tauh los das.

²³Housoeh las namoq gas nyamoq dah suih mas naiq las, namoq dah lvkhuih jens eq nyamoq o nyhoq lyoq das, ge.

²⁴Mangso eh, nah ung cho jens los yvlyis dvnganhmoq nyvng, ngah hwankti Mangso dah jens los zis gas gyingshang joqyos mas wvng loh.

²⁵Chunghthwe kat bang xik pheh loh, toenk khvlhank bat bang gas thang mha chank loh, janghau bat dah lonyi jens vgungs mas nghuot.

²⁶Nyah moqphung mha Mangso lhyi chungh geh; Yakop dah diusjangh caiq dvnganh eh, Mangso lhyi chungh geh.

²⁷Ngis thank dah Benyamin vkoq shih los, Hauh thang mha Yuda uhshe bang yahge nyamoq dah phung, hauh thang mha Zebulun yahge Napthali dah uhshe bang chank los.

²⁸Mangso eh, nah yomsoq chixoeuq aq. Hauh zis ngamoq xiklyis yhung ku.

²⁹Hauh zis hwankti jens nvng lyis jyungshuk chi los dyei, Yerusalem Yhenmuh masyah nghuot.

³⁰Egutu jvmbu gyomh mas dah yewus lyis kyuk aq; dius nyau jens dah noeulo jens eq bos dah noeulu phung jens lyis kyuk aq. Hauh bang gas ngwis chi lha los paiq shoq kyuk aq. Jes lhoq thuq mes bang lyis sanh tyamp aq.

³¹Egutu masyah lvgyo jens los das; Ethiopia jens nyamoq loq toeu lha Mangso lhyi shvmanh dung das.

³²Nyeisjvng munghdan jens eh, Mangso lhyi chunghthwe kat geh; YHENSAIN lhyi chunghthwe kat las chungh geh. (Selah)

³³Gohlhain dah maukhung ji soeu lhyi chungh geh. Nyang thwe zainsmuh yah nyah thwe kat kat yvlyis gyo geh.

³⁴Mangso dah yomsoq lyis hoeuh geh. Nyah shoenkkhyi ka Israel thoq mas, nyah yomzains gas maukhung mha joq.

³⁵Israel dah Mangso nyang nyah gyingshang joqyos mas los lyis kha iq gyukphoh Mangso nghuot lah! Nyang nyah dius jens lyis yom eq, yomsoq eq dyei. Mangso lhyi chungh geh.