Read Achang CHUNGH 69 Bible Online

CHUNGH 69 - Achang bible

CHUNGH 69

¹Mangso eh, ngos lyis khyuot yoeus aq, jeis gas ngah lainzain mas jweh los nyeis.

²Ngos nauh dah thomhbop mas nyop loh nyeis. Hauh yvmas khyei nang gus ma bos. Ngos jeis nauh yvmas nghuot joq. Jeisbaus yah ngos lyis she loh nyeis.

³Ngos lyis pangh das xiklyis lui zis nyung goeus: ngah khyunghkang eq nos goeus. Ngos nah pangh cho lhyi xo zis ngah nyoq nyung goeus.

⁴Ngos lyis shoh yos gungs mas hoeng bang gas ngah uhloms mas cam thoq lyis nyo. Ngah jeswus jens gas ngos lyis tyi lha hwah. Nyamoq gas yombos zis yah ngos lyis tsain sat mes. Ngos ma khauh dah vyhang tauh dyei nhang.

⁵Mangso eh, nvng lyis ngah yaunos ma yoh shung, ngos kha iq koh zis nvng seq;

⁶Yomzains YHENSAIN eh, ngah gvng mas nvng lyis loms bang lyis vxoq nhang; Israel dah Mangso eh, ngah gvng mas nvng lyis paiq bang lyis xoq vphuh nhang.

⁷Nah gvng mas ngos ma phauh gis kuot zis xauh las ngos xoq nyeis.

⁸Ngos ngah vmang vnoeuh moq mas lvbaus teh, ngah yhenbang mas mau we dius teh nghuot.

⁹Nah Yhenmuh mas nhaiq wvng ehnyet gas ngos lyis nyi teh ngeh nhang, nvng lyis ma phauh gis kuot zis gas ngah jyank mas gyoh los.

¹⁰Ngos gas womkyi zis yah ehnyet nyhen mha khyoq laus eq dius jens ngos lyis ma phauh gis kuot.

¹¹Ngos kuk dah vlho dyi wuot laus eq nyamoq ngos lyis yis.

¹²Nyamoq talhoeu mha ngah cho taiq goh; yhei yet soeu ka ngah cho lvkhyank kat.

¹³YHENSAIN eh, ngos shvmanh dung zis gas nvng yoh lhom yoeus shishenh lyis jweh bas jungh. Nah kuhxing jyetdap cho gvng mas eq, khyuot yoeus das ge nah dangthoengh gvng mas eq ngos lyis jenh gyo dyei aq.

¹⁴Ngos thomhbop mas nyop loh yvmvyah khyuot kat aq; ngah jeswus jens masyah jesluiq nhang aq. Jeis noq masyah eq luiq nhang aq.

¹⁵Jeisbaus yah ngos lyis vnghop nhang, noq dah nvmukdra mas eq ngos lyis vnyop nhang, lop mas eq vgyoh nhang.

¹⁶YHENSAIN eh, nah mathank magons jyetdap dah gis cho mha ngos lyis gyo dyei aq. Nah kuhxing nhaiqnyen zis yah gyo dyei aq.

¹⁷Nah jyeidwis lyis vjenh tamh; ngos chiqjyen zainsmuh xauh nyeis las gvshih jenh toeuh dyei aq.

¹⁸Ngos lyis los jenh khyuot yoeus aq; ngah jeswus jens masyah lhuiq kat dyei aq.

¹⁹Ngos lyis ma phauh gis khasoeh kuot las xoqphuh nyeis zis nvng seq; nvng ngah jeswus dvnganh lyis nyvng.

²⁰Housoeh ma phauh gis kuot zis gas ngos lyis ehnyet dyet nhang lha ngos nhaiqlom thank. Ngos lyis nhaiqnyen das cho nghamhloms laus eq nhaiqnyen das zis hank ma bos. Nhaiqtaink das soeu hank ma xo nyvng.

²¹Ngos zos yuot lyis nyamoq ngos lyis nyonoq teh dah wom dyei; ngos jeis shet lyis shihjyen jeis gvmshuk.

²²Nyamoq dah zo pwe ka nyamoq dyoqbis das cho bweh nhang aq; nyamoq dah gyingshang pwe ka nyamoq somh das cho bweh nhang aq.

²³Nyamoq lyis nyoqjet nhang aq; nyamoq dah thyikdom vjangh nhuk gyoh nhang aq.

²⁴Nvng nyamoq lyis nhaiqyo aq. Nah nhaiqlom dyis cho nyamoq lyis duons nhang aq.

²⁵Nyamoq dah thoenggus vkom joq bas jungh; nyamoq zvng mas kang dwis soeu hank eq ma nyet lo bas jungh.

²⁶Nvng yobos dyei bang lyis nyamoq shoeuhshih, nyamoq nvng dvmtap zis xauh kham cho taiq.

²⁷Nyamoq dah yaunos dvnganh comh toh aq; nyamoq lyis nah khyuot yoeus cho mha vbos nhang.

²⁸Nyamoq dah nyings lyis kang buk masyah thyuk tyamp bas jungh. Nyamoq nah dius jens dah nyings mas ma bos bas jungh.

²⁹Ngos gas nos las nhaiqlom thank nyeis: Mangso eh, ngos lyis toeutoq las khyuot yoeus aq.

³⁰Ngos chunghthwe yah Mangso lhyi chungh das. Ngos nyang lyis nhaiqshoqlang oen zis yah nyah kuhxing cho lhyi hoeuh das.

³¹Haih zis gas YHENSAIN lhyi noeu jyungshuk, zvn dyingh dah noeulu phudyei thoq lyis nhaiqdoeus nhang.

³²Zaiq zis xauh bang haih zis nyvng lyis gaus das; Mangso lhyi paiq bang gas yom yoh das.

³³YHENSAIN ka chah nyeis bang lyis gyo yoeus dyei; thung lungh nyeis, nyah dius jens lyis ma tohnyhik.

³⁴Maukhung yahge nyeisjvng, thomh yahge houmha bos, kang dwis zis dvnganh Mangso lhyi chungh geh.

³⁵Nyang gas Yerusalem yahge doms kuot toh dah Yuda wus jens lyis khyuot yoeus das. Nyah dius jens houmha nyeis las hauh mau lyis sain das.

³⁶Nyah jyeidwis jens dah diusjangh caiq vso kham yoeus das. Nyang lyis jyet bang houmha nyeis das.