Read Achang CHUNGH 7 Bible Online

CHUNGH 7 - Achang bible

CHUNGH 7

¹Ngah YHENSAIN Mangso eh, ngos nvng lyis khau. Ngos lyis chank khat bang dvnganh masyah lhuiq las khyuot yoeus aq.

²Ma nghuot lyis gas, ngos lyis hank ma yoh kyoeu yvmas shwih loh las khangkhyi teh ngat chingh tyamp das.

³Ngah YHENSAIN Mangso eh, ngos dvyuk yuk lyis kuot shuot las,

⁴Ngah dyenschangh lyis phanhlyen zis yah ngah jeswus lyis soe ma bos yvmas thyoq zo, ngos haih zis dvja ja kuot nghuot lyis,

⁵Jeswus gas ngos lyis chank khat duons las, nyang ngos lyis sat bas jungh, nyeisjvng mas ngah mvng joq bas jungh. (Selah)

⁶YHENSAIN eh, nhaiqyo zis yah toq aq; ngah jeswus jens nhaiqyo yvlyis tauh dyei aq, soh los las ngos lyis pangh aq; lyi jyoeng cho ka nvng tying toh goeus.

⁷Dius jens dvnganh lyis nah vwi vyvm mas shwih los las nyhang mhayah hauh bang lyis guon aq.[2]

⁸YHENSAIN ka dius nyau dvnganh dah soetuon soeu nghuot. YHENSAIN eh, ngos mas yobos ma bos zis nvng seq las ngah dan cho yah dvyhangteh ngos lyis soetuon aq.

⁹Nvng gas dan dah Mangso nghuot las ngamoq dah nghamh cho yahge omes cho lhyi soetuon dyei. Ma gis bang dah lhung cho lhyi tomp tyamp las, gis bang lyis phauh shangh dyei.

¹⁰Ngah gos gas ehnyet zungh bang lyis khyuot yoeus dah Nyhang thank Mangso nghuot;

¹¹Mangso ka dan dah soetuon soeu nghuot las, lhung bang lyis vjangh yobos dyei.

¹²Nyamoq dah cho ma thaiq lyis gas nyang moengsa swih las, nyah lyei thung lha cicont kuot toh.

¹³Nyang gas yoh shei nhang dah kyonhkhyi cvvq las; nyi duk nyeis dah nyo yah yings toh.

¹⁴Lhung soeu ka ma gis zis nghamh las ung mha mhuih jyomh cho wons toh zis yah hwah cho lhyi khoeu kat.

¹⁵Nyang dwang doeu toh las, nyang doeu dwang mas nyang gyoms.

¹⁶Nyamoq kuot dah ma gis cho ka nyamoq lyis joeng los. Nyamoq lhuotzo cho eq nyamoq lyis zangh los.

¹⁷Nyah dan cho gvng mas, ngos YHENSAIN lhyi nhaiqshoqlang oen das. Nyhang thank YHENSAIN dah nyings lyis chunghthwe kat las chungh das.