Read Achang CHUNGH 71 Bible Online

CHUNGH 71 - Achang bible

CHUNGH 71

¹YHENSAIN eh, nvng ngos lyis gomh dyei das nyhenshang ngos nah jyank mas los; ngos lyis khanhamp eq vsomh loh nhang.

²Nvng gas dan yvmvyah ngos lyis pangh aq, khyuot lhuiq kat aq. Ngos lyis gyo dyei las khyuot yoeus aq.

³Ngos lyis gos das zis ngah gau khaugus yahge gau dah thoenkgus jesdvp duot dyei aq. Nvng gas ngah khaugus yahge ngos lyis khomp dyei soeu nghuot.

⁴Ngah Mangso eh, lhung bang masyah ngos lyis khyuot kat aq. Ma gis bang yahge lhoeng bang yomsoq masyah khyuot kat aq.

⁵Yomzains YHENSAIN eh, ngos nvng lyis nghamhloms; ngos loyvm yoq lyis yah nvng lyis loms.

⁶Ngos ngah dvcaiq gonh nvng lyis nges toh: ngos khoeu los lyis yah nvng ngos lyis gos toh dyei. Ngos nvng lyis vjangh chungh das.

⁷Nvng gas ngah xiklyis yombos dah khomp duot dyei yvmvyah ngah kang dwis cho ka dius nyoshoq xiklyis yikhyoh bweh goeus.

⁸Ngos dvnyeih gonh nvng lyis chungh zis yah nah phunk lyis hoeuh dyei.

⁹Gvshih ngos mang goeus las ngos lyis vphe toh; gvshih ngos nvn goeus las ngos lyis vtyamp toh.

¹⁰Ngah jeswus jens gas ngos lyis sat mes; ngah cho taiq, ngos lyis tsain lhaink.

¹¹Nyamoq gas, Mangso nyang lyis tyamp toh goeus; nyang lyis tohnyhik toh; nyang lyis hank ma kyoeu, tsain ge.

¹²Mangso eh, ngos yah we we vnyeis; ngah Mangso eh, ngos lyis lvnyap los pangh aq.

¹³Ngos lyis jes sont bang somh las dyoqbis bas jungh; ngos lyis nos bas jungh ge yomkat bang xoqphuh las vxoq vcaiq mus bas jungh.

¹⁴Ngos nvng lyis vjangh nghamhloms nyeis; ngos nvng lyis zes zes chungh das.

¹⁵Ngos nah gis cho lhyi taiq das, nah khyuot yoeus cho ka ngos seqgyo thoq lyis zes laus eq ngos hauh yvlyis dvnyeih gonh taiq das.

¹⁶Yomzains YHENSAIN eh, ngos nah yomsoq lyis chungh das; nah zis kyingh dvnghuot dah gis cho lhyi ngos hoeuh das.

¹⁷Nvng ngos lyis ngis shih lyis yah jyauh goeus las, ngos nah mauhphoh muh lyis taiq nyeis shih.

¹⁸Mangso eh, gvshih ngos mang las cam thyoeu goeus, ngos lyis vtyamp toh. Jweh los das dius caiq dvnganh mas ngos nah yomsoq yahge yomzains lyis hoeuh uhlyis nvng ngos yah jenh nyeis dyei aq.

¹⁹Mangso eh, nah dan cho ka maukhung lhyi duons, nvng gas kuhxing cho kuot goeus, nvng teh zis hank ma bos.

²⁰Nvng ngah thoq mas yaukyenh cho yahge khamzo cho nhang kat, nghuot laus eq nvng ngos lyis yom doms huiq nhang; nvng ngos lyis lop masyah doms shwih los.

²¹Nvng ngos lyis vkhang thoq lyis kuhxing nhang das; nvng ngos lyis nhaiq doms taink dyei.

²²Ngos nvng lyis jyoengh toenk yah chungh das; Mangso eh, ngos nah wontang cho lhyi chungh das. Israel dah Gyingshang Soeu lhyi ngah toenk yah chunghthwe kat das.

²³Nvng ngos lyis khyuot yoeus goeus yvmvyah ngos nvng lyis toenk bat las kaiq chungh das. Ngos kang dwis nyeis shih lyis chungh das.

²⁴Ngos lyis nos nhang das ge bang somh las xoqphuh goeus yvmvyah ngos nah dan cho lhyi dvnyeih gonh taiq das.