Read Achang CHUNGH 72 Bible Online

CHUNGH 72 - Achang bible

CHUNGH 72

¹Mangso eh, hwankti ka nah dan cho khyvlyis soe yoh tuon das zis nyang lyis jyauh aq. Nah lyi jus nyang lyis gvm dyei aq.

²Housoeh lyis nyang gas nah dius jens lyis lyi jus khyvlyis whop las zaiq zis xauh bang lyis dan khyvlyis yoh guon das.

³Dan cho gvng mas nyeisjvng gas dius lyis gis dah jyo yoh los nhang das.

⁴Hwankti ka shohjyen bang lyis lyi bos khyvlyis soe yoh tuon bas jungh; Nyang chah nyeis bang lyis yoh pangh las nyamoq lyis zaiq bang lyis yoh ung bas jungh.

⁵Nah dius jens gas buis bos dvchank nvng lyis yoh paiq bas jungh. Lhamhmuh joq joq dvchank nyamoq nvng lyis vcaiq caiq paiq nyeis das.

⁶Hwankti ka mhanhyos mas mau wus teh, nyeisjvng lyis jyweq nhang dah mau gyoh teh nghuot bas jungh.

⁷Nyah caiq mas dan cho ka bvng bvng nghuot bas jungh; ung cho ka lhamhmuh tso dvchank doengs joq bas jungh.

⁸Nyah munghdan gas thomh masyah thomh jweh shoq, jeismuh lvng masyah nyeisjvng goms shoq nghuot das.

⁹Mhanhdyvp mas nyeis bang nyah xikkhonh mas gop das; nyah jeswus jens gas tsoh mas lains loh das.

¹⁰Spain hwankti jens yahge goeujo mas bang jyungshuk chi los das. Arabia, Ethiopia hwankti jens gas jyungshuk dyei das.

¹¹Hwankti dvnganh nyah xikkhonh mas gop das, dius nyau dvnganh nyang lyis phuqsoe das.

¹²Nyang gas, nyang lyis lui dah nyungs bang lyis kyoeu kat das; pangh soeu ma bos shohjyen bang lyis eq khyuot das.

¹³Nyang shohjyen bang yahge nyungs bang lyis nhaiqnyen, nyungs bang dah kang lhyi khyuot yoeus.

¹⁴Nyang nyamoq lyis lhuotzo cho yahge zaiq cho mhayah khyuot las, nyamoq dah kang ka nyah xikkhonh mas phauhdap.

¹⁵Hwankti kang xing bas jungh, nyang lyis Arabia masyah xing tsain dyei bas jungh: nyah xiklyis vjangh shvmanh tsain dung dyei bas jungh; Mangso dah shvmanh gas vjangh nyah thoq mas joq bas jungh.

¹⁶Hauh mau mas jyo vbomsdom joq bas jungh; jing jens mas wom yah nghop bas jungh. Houka Lebanon mas dah vshih teh gis joq. Pa mha mhanh dyingh teh hauh wus mas dius dyingh bas jungh.

¹⁷Hwankti nyings khanhamp eq ma dyuk bas jungh; nyah nyings hoeuh cho buis joq teh goeng joq bas jungh. Mangso ka hwankti lhyi shvmanh zis yah dvyhangteh dius nyau jens dvnganh eq nyamoq lyis shvmanh das nyhenshang bos sang bas jungh.

¹⁸Israel dah Mangso, YHENSAIN lhyi chungh geh; nyang kyingh haih mauh loqmuh kuot.

¹⁹Nyah phunk bos nyings lyis vcaiq caiq chungh geh; nyah phunk gas mungkvn gonh mas dyingh joq bas jungh. Amen, Amen.

²⁰Heika Yese lo Dawi dah shvmanh dung dang dye goeus.