Read Achang CHUNGH 74 Bible Online

CHUNGH 74 - Achang bible

CHUNGH 74

¹Mangso eh, nvng ngamoq lyis chamus heisoeh tyamp toh lah? Nvng nvnyang dius jens lyis chamus vjangh nhaiqyo lah?

²Gohlhain yah nah dius nyau duot das xiklyis nvng khyen lha, jons duot nyeis masyah khyuot shwih los zis xauh bang nah dius jens lyis soh aq. Nvng nyeis ku dah Zion boms lyis soh aq.

³Dvnganh dyoqbis joq yvlyis loh yoeuh aq; ngamoq dah jeswus jens gas Yhenmuh mas vyhang dvnganh mhont tyamp goeus.

⁴Nah jeswus jens nah Yhenmuh mas ung thwe tsain kaiq nyeis; nyamoq ung ge dah vlho khyvlyis nyamoq dah khyiq tsain lhangh toh.

⁵Saiq thoeuq bang wuzung yah yoszanh thoeuq tyamp teh nghuot.

⁶Gvshih nyamoq hauh loqmuh lyis wuzung yahge doeus yah thyoq tyamp goeus.

⁷Nyamoq nah Yhenmuh lyis thyoq las ngheq tyamp, nvng lyis paiq dah joqyos lyis vwot v-oeu kuot.

⁸Nyamoq ngamoq lyis dvnganh thungh thyi tyamp mes; Hauh mau mas joq dah gyingshang joqyos khanghmuh lyis ngheq tyamp.

⁹Ngamoq dah gyingshang vlho cha ma joq lo; Lvpe eq ma nyet lo; haih zis khanyhank nyangh das zis hank ma seq lo.

¹⁰Mangso eh, ngamoq dah jeswus jens nvng lyis khanhamp jweh shoq yis nyeis das lah. Nyamoq nah nyings lyis vcaiq vto ma phauh gis kuot das lah.

¹¹Nvng chamus ngamoq lyis pangh das cho yop tyamp? Nvng ma pangh chamus yoeuh nyeis lah.

¹²Mangso eh, nvng vsaiq yoq lyis yah ngamoq dah hwankti duot ku lha nvng ngamoq lyis nyoshoq lhain khyuot yoeus.

¹³Nvng nah yomzains yom yah thomh lyis thyet kangh: nvng jeis khau mha dah mvnjung uhloms lyis tsain khwih tyamp.

¹⁴Mvnjung uhloms lyis tsain khwih las, mhanhdyvp mas nyeis dah dius zo das xiklyis dyei.

¹⁵Nvng jeisthuq dwang yahge jeislo lvng tsain yaus nhang; Nvng jeismuh lvng lyis tsain kanh nhang.

¹⁶Nvng nyeih yahge nyenh lyis gvnkhanh toh: nvng buislom yahge lhamhmuh lyis nyah joqyos mas toh.

¹⁷Nvng nyeisjvng maukyo dvnganh yah toh toh: cungh zvn gvnkhanh toh.

¹⁸YHENSAIN eh, nah jeswus jens nvng lyis yis las nyamoq gas Mangso lhyi ma phauh ma nyang goessang das zis lyis soh aq.

¹⁹Nah shohjyen dah dius jens lyis lhoeng dah jeswus jens jyank mas vtyamp toh; shoeuhshih zis xauh dah nah dius jens lyis vtohnyhik toh.

²⁰Nvng ngamoq yah toh dah thanghchvp lyis soh dyei aq. Hauh mau mas noq joq dah vthunk khanghmuh mas lhuot zo cho bos.

²¹Zaiq zis xauh bang lyis xoq vphuh nhang; Shohjyen bang yahge nyungs bang nvng lyis chungh bas jungh.

²²Mangso eh toq aq, nah muh lyis gos aq: Mangso lhyi ma phauh ma nyang bang nvng lyis dvnyeih gonh jwangh yvlyis soh aq.

²³Nah jeswus jens nhaiqyo zis yah kaiq yvlyis vtohnyhik dyei, nah jeswus jens dah thwe ka tsoq las hoeu nyeis.