Read Achang CHUNGH 77 Bible Online

CHUNGH 77 - Achang bible

CHUNGH 77

¹Ngos Mangso lhyi kaiq ngaus, ngos kaiq ngaus lyis nyang xauhgyo dyei.

²Ngos chiqjyen shishenh lyis ngos YHENSAIN lhyi dung; dvnyens yah ngah loq toeu lha shvmanh dung laus eq ngos nhaiqtaink cho ma yoh.

³Ngos Mangso lhyi nghamh lyis ngos soqmuh nyhank; nghamh suon yoeuh nyeis lyis yomgyau zis soh. (Selah)

⁴Nyang ngos lyis dvnyens gonh gying nyeis nhang; ngos svsoh chiq las dang ma yoh taiq.

⁵Ngos lai loh goeus buisnyeis yahge gohlhain dah zvn lyis nghamh yoeuh nyeis.

⁶Ngos noq noq nghamh yoeuh zis yah nyenh ku; ngos nghamh suon yoeuh las ngvnyang nyeizo zis gas,

⁷YHENSAIN ngamoq lyis vjangh phe toh das lah? Ngamoq lyis khanhamp eq nhaiq ma doms doeus lo das lah?

⁸Nyang ngamoq lyis jyet cho no toh goeus lah? Nyah dangthoengh ma doengs joq lo lah?

⁹Mangso ka nhaiq ma soh nyen lo lhyeh. Nyang nhaiqyo zis yah nyah nhaiqnyen cho nyheih tyamp lo das lah. (Selah)

¹⁰Housoeh ngos gas, ngos lyis nos nhang thank zis gas haih zis nghuot, Mangso ka cha ma kuot dyei lah, oen.

¹¹YHENSAIN eh, ngos nah kuhxing muhzoh lyis soh das. Gohlhain nah mauh loqmuh lyis ngos doms soh das.

¹²Ngos nah muhzoh dvnganh yvlyis suon yoeuh das; ngos nah yomzains muhzoh dvnganh lyis suon yoeuh das.

¹³Mangso eh, nvng kuot cho dvnganh gas gyingshang. Ngamoq Mangso teh kuhxing dah mangso ma bos.

¹⁴Nvng gas yomsoq muh kuot dah Mangso nghuot. Nvng dius nyau jens mas nah yomzains chixoeuq.

¹⁵Nvng nah yomsoq yah nah dius jens lyis khyuot yoeus; Houka Yakop yahge Yosep dah dius jangh caiq nghuot. (Selah)

¹⁶Mangso eh, jeis gas nvng lyis nyvng lyis tsain gyuk: jeisnyaus thomh eq tsain nvn nyeis.

¹⁷Jyommauh gas mau huot khyoq, maukhung mhayah maujau jau las, maunyoq eq shot khanghmuh nyik loh.

¹⁸Nah maujau thwe ka buk thuq los las, maunyoq nyhik zis eq mungkvn lyis pank dyei; nyeisjvng eq nvn las dwis nyeis.

¹⁹Nvng jeisphauq chank suh los las noq dah thomh lyis goeu thyet, nghuot laus eq nah khyeiyos ma yoh nyvng.

²⁰Nvng nah dius jens lyis Moshe yahge Aron lyis yah yvng phung lhyi teh shwih los.